1O le mea foi lenei ua gatete ai lo‘u loto, ua sapotuvale ai foi i le mea o i ai.
2Ina matuā faalogologo atu ia i le taalili o lona siufofoga, ma le gogolo ua oo atu nai lona fofoga.
3Ua ia ta‘ita‘iina ai i lalo o le lagi atoa uma, ma lona uila foi e oo i tuluiga o le lalolagi.
4E mulimuli ane ai, ona taalili mai ai lea o le leo; ua ia faapā mai le faititili i lona siufofoga silisili; ua ia le taofi foi i ai pe a lagona lona siufofoga.
5Ua faapā mai e le Atua le faititili silisili ese i lona siufofoga; e faia e ia mea tetele e le mailoa e i tatou.
6Auā e fetalai ane o ia i le kiona, Ina to ia oe i le laueleele; ua faapea foi i le timuga, ma ona uaga e matuā tetele.
7Na te taofi lima o tagata uma, ina ia iloa e tagata uma lana galuega.
8Ona o ai lea o manu feai i mea latou te fale ai, ma taooto i o latou ana.
9E sau le asiosio mai le itu i toga, ma le maalili mai le itu i matu.
10O le mānava mai o le Atua e au mai ai le vaito‘a; e faaitiitiina ai foi le lautele o vai.
11O lona pupula foi e to ifo ai le ao uliuli; o lona malamalama e taapeape ai ao.
12E feaveaiina ai e ia faataamilomilo i lana pule, ina ia fai ai mea uma ua ia finagalo i ai i luga o le atu laulau uma lava.
13Na te faaooina mai ai, po o le aoaiga, po o lona laueleele, po o le alofa.
14Iopu e, faafofoga mai ia i lenei mea; ina tulai mai ia, ma mafaufau i vavega o le Atua.
15Ua e iloa ea pe faapefea ona saunia o ia mea e le Atua, ma faaemoina mai e ia le uila o lona ao?
16Ua e iloa ea le fuatia o le mamafa o ao uliuli, o vavega o Le e ona le poto atoatoa?
17Pe faapefea foi ona vevela ai ou ofu ina ua faamaninoaina e ia le lalolagi i le matagi mai le itu i toga?
18Na oulua fofola faatasi ea ma ia le lagi, ua mălōlō e pei o se faaata ‘apa memea?
19Ina e faailoa mai ia pe se a se upu matou te fai atu ai ia te ia; matou te le mafai ona sauni atu ai ona o le pouliuli.
20E ta‘uina atu ea ia te ia ua ou tautala? Afai e tautala atu se tasi, e fano ai lava o ia.
21O lenei, e le vaaia le malamalama pupula o loo i ao o le lagi; a e agi mai le matagi, ona matafitafi ai lea.
22E sau le pupula faaauro mai le itu i matu; o loo i le Atua le mamalu matautia.
23A o Le e ona le malosi uma lava, tatou te le mafai ona iloa o ia; e silisili ese lona malosi ma lona faamasinoga, e sili foi lana amiotonu, na te le agaleaga.
24O le mea lea e matatau ai tagata ia te ia; na te le silasila i se tasi o e o popoto o latou loto.
Who We AreWhat We EelieveWhat We Do
2025 by iamachristian.org,Inc All rights reserved.
