1Ua fai atu Elia le Tisepi, o so le nuu e nonofo i Kiliata, ia Aapo, O loo soifua Ieova le Atua o Isaraelu, o ia ou te tu ai i ona luma, e leai se sau po o se timu i nisi tausaga se‘i iloga ou fai atu.
2Ua oo mai foi le afioga a Ieova ia te ia, ua faapea mai,
3Tuu ia lenei mea, ma e liliu ane i le itu i sasae, ma e lafi i le alia o Kirita, e feagai ma Ioritana.
4E te inu foi i le alia; ua ou fai atu foi i oreva latou te fafaga ia te oe i lea mea.
5Ona alu ai lea o ia, ma na faia e tusa ma le afioga a Ieova; ua alu o ia, ma nofo i le alia o Kirita, e feagai ma Ioritana.
6Na au mai foi e oreva ia te ia o areto ma aano o manu i le taeao; o areto foi ma aano o manu i le afiafi; ua ia inu foi i le alia.
7Ua mavae nisi aso, ona mate ai lea o le alia, auā sa leai ni ua i le nuu.
8Ona oo mai ai lea o le afioga a Ieova ia te ia, ua faapea mai,
9Tulai ia oe, ma e alu i Sarefata, o le aai o Saitonu, ma e nofo ai; faauta, ua ou fai atu i le fafine o i ai ua oti lana tane, na te fafaga ia te oe.
10Ona tulai lea o ia, ma alu i Sarefata; ua oo ia i le faitotoa o le aai, faauta, ua i ai le fafine ua oti lana tane, o loo fai fafie; ona valaau lea o ia ia te ia, ua faapea atu, Se‘i e au mai sina vai itiiti i se ipu, so‘u inu ai.
11Ua alu o ia e au mai ai, ona toe valaau ai lea o ia ia te ia, ua faapea atu, Se‘i e au mai i lou lima se fāsi areto ma‘u.
12Ona tali mai lea o ia, O loo soifua Ieova lou Atua, e leai se potoi areto ia te au; ua na o le luutaga o falaoa i le kate, ma sina suāuu itiiti i le fagu; faauta, ua ou fai nei ni fafie se lua, ina ia ou alu, ma ou tunu ai mā maua ma si a‘u tama tane, ma te aai ai, ona ma oti lea.
13Ona fai atu lea o Elia ia te ia, Aua e te fefe; alu ia, ina e faia le mea na e fai mai ai; a e muamua ona e fai se potoi areto itiiti ma‘u, ma au mai ai ia te au; e mulimuli ane ona e faia lea mā oulua ma lau tama tane.
14Auā ua faapea ona fetalai mai o Ieova le Atua o Isaraelu, E le uma le kate falaoa, e le faaitiitia le suāuu i le fagu, seia oo i le aso e foaiina mai ai e Ieova le ua i le laueleele.
15Ona alu lea o ia, ua ia faia e tusa ma le upu a Elia; ua latou aai ai, o ia, ma Elia, ma lona aiga, ua tele aso.
16Sa le uma le falaoa i le kate, sa le faaitiitia foi le suāuu i le fagu, e tusa ma le afioga a Ieova na fai atu ai Elia.
17Ua mavae ia mea, ona ma‘i ai lea o le tama tane a le fafine, o le matai o le aiga; sa tele lava lona ma‘i, ua iu ai ina le toe se mānava ia te ia.
18Ona fai atu lea o ia ia Elia, Le tagata o le Atua e, se a ea lau na ia te au? Ua e maliu mai ea e faamanatu mai i a‘u agasala, ma faaoo le oti i la‘u tama?
19Ona fai atu lea o ia ia te ia, Ina aumaia lau tama ia te au; ona au mai lea o ia ia te ia mai lona fatafata, ua ia avae ia te ia i le afeafe sa nofo ai o ia, na ia faataoto foi ia te ia i lona moega.
20Ona alaga lea o ia ia Ieova, ua faapea atu, Ieova e, lo‘u Atua, ua e faaoo ea le leaga i le fafine ua oti lana tane, o lē ou te aumau ai, ina ua faaoo le oti i lana tama?
21Ona faō faatolu lea o ia i luga o le tama, ma alaga atu ia Ieova, ua faapea atu, Ieova e, lo‘u Atua, ia e faafoisia mai le agaga o lenei tama i totonu ia te ia.
22Ona faafofoga mai lea o Ieova i le leo o Elia; ua toe foi mai ai le agaga o le tama i totonu ia te ia, ona ola ai lea o ia.
23Ona sii lea e Elia o le tama, ma ave ifo ia te ia i le fale ai le afeafe, ma tuu atu ia te ia i lona tinā; ua fai atu foi Elia ia te ia, Faauta mai, ua ola lau tama.
24Ona fai mai lea o le fafine ia Elia, O lenei, ua ou iloa i lenei mea o le tagata o le Atua oe; o le afioga foi a Ieova ua oo mai i lou fofoga e moni lea.
Who We AreWhat We EelieveWhat We Do
2025 by iamachristian.org,Inc All rights reserved.
