LEVITIKO 9 - Samoan Old Version Bible

O LE MATAUPU IX.O taulaga na faia e Arona; ua talia e le Atua.

1Ua oo foi i le po valu, ona valaau atu ai lea o Mose ia Arona ma na atalii, ma toeaina o Isaraelu;

2ua ia fai atu foi ia Arona, Ina ave ia se tamai povi e fai ma taulaga mo le agasala, ma se mamoe poa e fai ma taulaga mu, ia sao ona lelei i laua, ma avatu ai i luma o Ieova;

3ma ia e fai atu i le fanauga a Isaraelu, ia faapea atu, Ia outou ave se ‘oti poa e fai ma taulaga mo le agasala, o se tamai povi foi ma se tamai mamoe e tasi lo la tausaga, ia sao ona lelei i laua, e fai ma taulaga mu.

4O se povi poa foi ma se mamoe poa e fai ma taulaga faafetai, e fai ai le taulaga i luma o Ieova, ma se taulaga i mea e ‘ai ua palua ma le uu; auā o le asō e faaali mai ai Ieova ia te outou.

5Ua latou au mai i luma o le fale fetafai o le faapotopotoga o mea na poloai atu ai e Mose; ona faalatalata ane ai lea o le faapotopotoga uma, ma latou tutū i luma o Ieova.

6Ona fai atu ai lea o Mose, O lenei le mea ua poloai mai ai Ieova tou te faia, e faaali mai ai foi le pupula o Ieova ia te outou.

7Ua fai atu foi Mose ia Arona, Ina faalatalata atu ia oe i le fata faitaulaga, ma e fai ai lau taulaga mo le agasala, ma lau taulaga mu, ma fai ai se togiola mo oe lava, atoa ma le nuu, ma fai ai le taulaga mo le nuu, ia fai foi se togiola mo i latou; pei ona poloai mai ai o Ieova.

8Ona faalatalata atu ai lea o Arona i le fata faitaulaga, ma na fasi le tamai povi o le taulaga mo le agasala, mo ia lava lea.

9Ona au mai lea e atalii o Arona le toto ia te ia; ona fufui ai lea o lona tamatamai lima i le toto, ma tuu ai i nifo o le fata faitaulaga, ma sasaa ai le toto i lalo o le fata faitaulaga;

10a o ga‘o ma fatuga‘o, ma le ga‘o punipu i luga o le finagalo o le taulaga mo le agasala ua ia susunu ai i le fata faitaulaga, e pei ona poloai mai ai o Ieova ia Mose.

11A o le tino ma le pa‘u ua ia susunu ai i le afi i tua o le toagālauapi.

12Ua ia fasi foi le taulaga mu; ona avatu ai lea e atalii o Arona le toto ia te ia; na ia sausau foi ua soo ai i luga o le fata faitaulaga.

13Ona avatu ai lea e i latou o le taulaga mu ia te ia, o ona tufaaga atoa ma le ulu; ua ia susunu ai foi i luga o le fata faitaulaga.

14Ua ia mulumulu foi i tōtōga ma vae, ma susunu ai i luga o le taulaga mu i le fata faitaulaga.

15Ona ia avatu ai lea o le taulaga a le nuu; ua ia ave foi le ‘oti poa, o le taulaga mo le agasala lea mo le nuu, ua ia fasia foi, ma fai ai le taulaga mo le agasala, e pei o le na muamua.

16Ua ia avatua foi le taulaga mu, ma na sauni ai e tusa ma le tu.

17Ua ia avatu foi le taulaga i mea e ‘ai, ma luluu mai ai le luutaga, ma susunuina ai i luga o le fata faitaulaga, atoa lava ma le taulaga mu o le taeao.

18Ua ia fasi foi le povi poa ma le mamoe poa o le taulaga faafetai, mo le nuu lava lea; ua avatu foi e atalii o Arona le toto ia te ia; ua ia sausau i luga o le fata faitaulaga ua soo ai.

19A o ga‘o o le povi poa ma le mamoe poa, ma le iu, ma le ga‘o alo, ma fatuga‘o, ma le ga‘o punipu i luga o le finagalo;

20ua latou faaee ga‘o i luga o le fatafata, ua ia susunu foi ga‘o i le fata faitaulaga.

21Ua luluina foi e Arona o fatafata ma le ālagālima taumatau, o le taulaga lulu i luma o Ieova; e pei ona poloai atu ai o Mose.

22Ona sisii ai lea e Arona ona lima i luga o le nuu, ma faamanuia atu ai ia i latou; ona alu ifo ai lea o ia ina ua uma ona fai o le taulaga mo le agasala, ma le taulaga mu, ma le taulaga faafetai.

23Ua ulufale atu Mose ma Arona i le fale fetafai o le faapotopotoga, ona ulufafo ai lea, ma faamanuia atu i le nuu; ona faaali mai ai lea o le pupula o Ieova i le nuu uma.

24Ona alu ane ai lea o le afi mai luma o Ieova, ma susunu ai le taulaga mu i luga o le fata faitaulaga, atoa ma ga‘o; ua iloa e le nuu uma, ona latou alalaga ai lea, ma faapauufao.