1Ua oo mai foi le afioga a Ieova ia te au, ua faapea mai,
2O oe na le atalii o le tagata, ia e sauni se pese e aualofa a‘i ia Turo;
3ma ia e fai atu ia Turo, O oe o lē nofo i le mea e ui atu ai i le sami, o le faatauoa o nuu mo nuu tu matafaga e tele, ua faapea ona fetalai mai o le Alii o Ieova, Turo e, ua e fai mai, O a‘u ua atoatoa lo‘u matagofie.
4Ua i totonu o le sami ou tuaoi, ua faaatoatoaina e ou tufuga lou matagofie.
5Na latou faia ou laupapa uma i perosi mai Senira; na latou ave foi arasi mai Lepanona e fai a‘i ou fanā.
6O aluna mai Vasana na latou fai a‘i ou foe; ua faia ou nofoa i nifo elefane ua faamatagofie a‘i i tasura mai nuu tu loto o Kitimo.
7O le ie vavae lanu eseese mai Aikupito na e sisi e fai ai mou la; o le ie uli ma le ie pāuli mai nuu tuloto o Elisa na ufitia ai oe.
8O tagata o Saitonu ma Arati, na fai i latou mou auvaa; o ou tagata popoto, Turo e, o e na ia te oe, sa fai mou tautai.
9O toeaina o Kavali ma ona tagata popoto na fai mou tufuga monomono vaa; o vaa uma o le sami ma o latou auvaa na ia te oe e faatau ai lou oloa.
10Sa i lou itu taua o tagata o Peresia, ma Luti, ma Futu, e fai mou tagata tau; na latou tautau le talita ma le puloutau i totonu ia te oe; na latou faamatagofie ai oe.
11O tagata o Arati ma lou itu taua, sa latou i ai i luga i ou pa i itu uma, na i ai foi o Kamati i ou ‘olo; na latou tautau faataaliolio o latou talita i ou pa; na latou faaatoatoaina lou matagofie.
12O Tasesa, o le faatauoa lea ia te oe, ina ua tele o oloa uma; o ario, o uamea, o ‘apa sisina, ma pulu, na latou faatau ai i au faataugāoa.
13O Iavana o Tupalu, ma Meseko, o faatauoa ia ia te oe, na latou faatau tagata, ma ipu ‘apa memea i ou faataugāoa.
14Na faatau sa Tokaremo i ou faataugāoa, o solofanua, ma solofanua e tietie ai atoa ma falata.
15O le fanauga a Titana o faatauoa i latou ia te oe; o nuu tu matafaga e tele na fai ma mea e faatau ai au mea na fai, na latou au mai ia te oe o nifo elefane ma apeni e taui a‘i.
16O Suria o le faatauoa lea ia te oe ina ua tele o au mea na e faia, na latou faatau i ou faataugāoa, o le nofeka, ma ie pāuli, ma ofu lanu eseese, ma ie vavae, ma ramuta, ma maa mūmū.
17O Iuta foi ma le nuu o Isaraelu, o faatauoa ia ia te oe; na latou faatau i ou faataugāoa o le saito Meniti, ma panaka, ma meli, ma suāuu, ma pulu pasama.
18O Tamaseko o le faatauoa lea ia te oe i le tele o au mea na e faia, ina ua tele foi o oloa uma, o uaina o Elepona, ma fulufulu mamoe sina.
19O Vetana ma Iavanameusala, na latou faatau i ou faataugāoa, o uamea gaosia, ma kesia, ma kani sa i ai i ou faataugāoa.
20O Titana o le faatauoa lea ia te oe i ofu matagofie mo e tietie i solofanua.
21O Arapi, ma alii uma o Kitara, o faatauoa ia ia te oe, o tamai mamoe, ma mamoe poa, ma ‘oti poa; o mea ia na latou faatau ai ia te oe.
22O tagata faatauoa o Seepa ma Ragama, o faatauoa ia ia te oe; o mea manogi uma e sili, ma maa tāua uma, ma auro na latou avane i ou faataugāoa.
23O Karana, ma Kane, ma Etena, o faatauoa o Seepa, ma Asura, ma Kilemata, o faatauoa ia ia te oe.
24O i latou ia na faatau ia te oe o mea matagofie, o ofu uli, ma ofu lanu eseese, ma ofu lelei silisili ua saisaitia i maea, ua mau, sa i ai i au mea faatau.
25O vaa o Tasesa na latou pepese ia te oe i lou faataugāoa; na faatamaoaigaina foi oe, na matuā mamalu lava oe i totonu o le sami.
26O lou auvaa ua latou aveina oe i le moana sausau; ua lepetia lava oe i totonu o le sami i le matagi mai sasae.
27O lou oloa, ma ou faataugāoa, o au mea faatau, o lou auvaa, ma ou tautai, o ou tufuga monomono vaa, ma tagata e faatau lou oloa, ma ou tagata tau uma o ia te oe, atoa ma ou tagata uma lava o loo ia te oe, e fano i latou i totonu o le sami i le aso e malaia ai oe.
28O le taalili o le alaga o ou tautai e luluina ai ou tuafanua.
29O i latou uma foi o e alo foe, o auvaa, ma tautai uma o le sami e o ae i latou ai o latou vaa, ma tutū i le laueleele.
30Latou te leo tetele ona o oe, ma tagiaue faalotulotu, latou te asu ae le efuefu i o latou ulu; latou te taafilifili i le lefulefu.
31Latou te selemamaina o latou lauulu ona o oe, ma latou lavalava i ie talatala; latou te fetagisi foi ona o oe ma le tiga tele o le loto, ma le tagitu‘i faalotulotu.
32Latou te faia le pese e aualofa a‘i ona o oe, o latou o pepese, e faapea ane, O se fea nuu e tusa ma Turo, e tusa ma le ua fano i totonu o le sami?
33O le tautuu ae o lou oloa ai le sami na e faamalilie ai nuu e tele; o lou oloa ma au mea faatau ina tele na e faatamaoaigaina ai tupu o le lalolagi.
34A ua lepetia nei oe i le sami i le loloto o le moana; ua fano ai au mea faatau, ma ou tagata uma i totonu ia te oe.
35O i latou uma o e nonofo i nuu tu matafaga ua fememeai i latou ona o oe, o latou tupu foi ua matuā fefefe, ua soona gatete lava.
36O tagata faatauoa i nuu ua uisa i latou ia te oe; ua avea oe ma mea e ala ai le mata‘u, e le toe ai lava oe e faavavau.
Who We AreWhat We EelieveWhat We Do
2025 by iamachristian.org,Inc All rights reserved.
