1Ua nofo le tupu i lona fale; ua maua foi e ia le mapusaga mai ia Ieova ai e ua ita ia te ia uma i itu uma lava;
2ona fai atu lea o le tupu ia Natano le perofeta, Faauta mai ea, ou te nofo a‘u i le fale arasi, a o le atolaau a le Atua, ua i ai ia i totonu o ie puipui.
3Ona fai mai lea o Natano i le tupu, O mea uma ua e finagalo i ai, maliu ane ia, ma e faia, auā o loo ia te oe Ieova.
4O lea lava po na tŭlei mai ai le afioga a Ieova ia Natano, ua faapea mai, Alu ia,
5e te fai atu i la‘u auauna o Tavita, o loo faapea ona fai mai Ieova, E te faia ea e oe se fale mo a‘u ou te nofo ai?
6Auā ou te lei nofo i se fale talu mai le aso na ou aveina ae ai le fanauga a Isaraelu nai Aikupito, e oo i lenei lava aso; a ua ou fealuai i se fale ie ma se fale feaveai.
7O mea uma na ou fealuai ai ma le fanauga a Isaraelu uma, pe na ou fai atu ai ea se upu i se tasi itu aiga o Isaraelu, na ou poloai e leoleo i lo‘u nuu o Isaraelu, e faapea, Se a le mea tou te le fai ai se fale arasi mo au?
8O lenei, ia faapea ona e fai atu i la‘u auauna o Tavita, O loo faapea ona fetalai mai o Ieova o ‘au, O a‘u na ou aumaia oe ai le lotoā mamoe, na e mulimuli atu i mamoe, ina ia faia oe ma ta‘ita‘i i lo‘u nuu o Isaraelu.
9Sa ou i ai foi ia te oe i mea uma na e alu i ai, ma ou faaumatia i ou luma e na ita ia te oe uma lava; na ou faia foi mo oe le igoa mamalu, pei o igoa o alii tetele i le lalolagi.
10Ou te tuu atu foi se mea e nofo ai lo‘u nuu o Isaraelu, ma ou totōina i latou, e mau ai lava i lo latou lava nuu; e le toe faagaeetia i latou, e le toe faasaua foi ia te i latou o ē amio leaga,
11e pei o anamua, e afua mai i le aso na ou tofia ai faamasino e pule i lo‘u nuu o Isaraelu. Ua maua foi e oe le mapusaga mai ia te au i e na ita ia te oe uma lava; ua ta‘u atu foi e Ieova ia te oe, o le a faia e Ieova sou aiga.
12A faaatoaina ou aso, ma e taoto faatasi ma ou tamā, ona ou faatuina ai lea o so lau fanau pe a mavae atu oe, e tupu mai ai ia te oe, ou te faatumauina foi lona malo.
13O ia lava na te faia se fale mo lo‘u igoa; ou te faatumauina foi le nofoālii o lona malo e faavavau.
14E fai a‘u mona tamā, e fai foi o ia mo‘u atalii; a agasala o ia ou te aoai atu ia te ia ma le sasa a tagata, ma ta a tagata;
15a e le aveeseina lo‘u alofa ia te ia, pei ona ou aveesea ia Saulo, o lē na ou aveesea i o‘u luma.
16Ou te faatumauina lou aiga ma lou malo e faavavau i ou luma; e mausali lou nofoālii e faavavau.
17E pei o nei upu uma, ma nei mea uma ua faalia mai, sa faapea ona tautala atu ai o Natano ia Tavita.
18Ona alu atu lea o le tupu o Tavita, ma nofo atu i luma o Ieova; ona fai atu a lea o ia, Lo‘u Alii e Ieova, o ai ea a‘u nei? O ai foi lo‘u aiga ina ua e faaoo mai ia te au i lenei aso?
19A o le mea itiiti lava lea ia te oe, lo‘u Alii e Ieova, a ua e fetalai mai foi i le aiga o lau auauna e oo i tupulaga amuli lava; lo‘u Alii e Ieova e, e faapena ea le masani a tagata?
20Se a foi se upu e toe tautala atu ai Tavita ia te oe? Auā o oe lo‘u Alii e, Ieova, ua e silafia lau auauna.
21Ona o lou afioga, e tusa foi ma lou finagalo, ua e faia nei mea tetele uma, e faailoa mai ai i lau auauna.
22O le mea lea e sili ai oe Ieova le Atua e; auā e leai sē tusa ma oe, e leai foi se Atua na o oe lava, e tusa ma upu uma na matou faalogologo ai i o matou taliga.
23O ai ea se tasi nuu i le lalolagi, e tusa ma lou nuu o Isaraelu lava, na afio mai ai le Atua e laveai ia te i latou e fai mona nuu, ia ta‘ua ai lona suafa, ia fai foi mā outou mea tetele ma le matautia, ona o lou nuu, i luma o ou tagata na e laveaiina mo oe nai Aikupito, o nuu ese atoa ma o latou atua?
24Ua e faatumauina mo oe o lou nuu o Isaraelu e fai mou nuu e faavavau; o oe foi o Ieova, ua fai oe mo latou Atua.
25O lenei, Ieova le Atua e, o le afioga na e fetalai mai ai i lau auauna ma lona aiga, ia e faatumau lea e faavavau, ma e faia, e pei ona e fetalai mai ai;
26ma ia faamamaluina lou suafa e faavavau, o loo faapea ane, O Ieova o ‘au, o ia le Atua o Isaraelu; o le aiga foi o lau auauna o Tavita, ia faatumauina lea i ou luma.
27Auā o oe Ieova o ‘au, le Atua o Isaraelu ua e faaali mai i lau auauna, ua faapea mai, Ou te faia se aiga mo oe; o le mea lea ua manatu ai a‘u lau auauna e tatalo ia te oe i lenei tatalo.
28O lenei, lo‘u Alii e Ieova, o oe lava le Atua, o au afioga e faamaoni lava ia; ua e fetalai mai foi i lau auauna i nei mea lelei;
29o lenei, ia e finagalo ia faamanuia le aiga o lau auauna, ina ia i ai i ou luma e faavavau; auā o oe lo‘u Alii o Ieova ua e fetalai mai; o lau faamanuia mai e manuia ai le aiga o lau auauna e faavavau.
Who We AreWhat We EelieveWhat We Do
2025 by iamachristian.org,Inc All rights reserved.
