I. NOFOAIGA A TUPU, 13 - Samoan Old Version Bible

O LE MATAUPU XIII.O le amiga o le atolaau i Kiriata-iarima.

1Ua filifili Tavita ma alii o taitoaafe ma taitoaselau, ma ta‘ita‘i sili uma.

2Ua fai atu foi Tavita i le faapotopotoga uma o Isaraelu, Afai e tatau ia te outou na, ma ua finagalo i ai Ieova lo tatou Atua, ia tatou feausoloina atu o tatou uso o totoe i nuu uma o Isaraelu, o le au faitaulaga ma sa Levī faatasi ma i latou i a latou aai ma tuāfanua, ia faapotopoto mai ia te i tatou;

3ia tatou aumaia le atolaau a lo tatou Atua ia te i tatou; auā na tatou le saili atu i ai i ona po o Saulo.

4Ona tali mai ai lea o le faapotopotoga uma, Ia tatou faia o lea; auā sa lelei lea mea i le manatu o le nuu uma.

5Ona faapotopotoina lea e Tavita o Isaraelu uma, e afua mai i Seora i Aikupito e oo atu i le mea e ui atu ai i Amato, e au mai ai le atolaau a le Atua mai Kiriata-iarima.

6Ua o atu Tavita ma Isaraelu uma i Paala, o Kiriata-iarima lea, o le aai o Iuta, e aveina ae ai nai lea mea o le atolaau a le Atua, o Ieova, o lē afio i le va o kerupi, e ona le suafa ua valaauina i lea mea.

7Ua latou ave le atolaau a le Atua i le fata faataavalevale fou ai le fale o Apinatapa; o Usa ma Aio na la ta‘ita‘iina atu ai le fata faataavalevale.

8Ua sasaa Tavita ma Isaraelu uma i luma o le Atua ma lo latou malosi atoa, ma latou fai pesega, ua ta kitara, ma napeli, ma topa, ma sumepalo, ma ili pu.

9Ua oo i latou i le mea e soli ai saito a Kitonu, ona tago atu lea e Usa o lona lima e taofi ai i le atolaau, auā ua taupaū povi.

10Ona tupu ai lea o le toasa o Ieova ia Usa, ona fasia lea o ia, auā ua tago atu lona lima i le atolaau. Ua oti ai o ia i lea mea i luma o le Atua.

11Ua tiga Tavita ina ua lipi Usa ia Ieova; ona ia faaigoaina ai lea o lea mea, O Faresausa, ua oo i nei ona po.

12Ua mata‘u Tavita i le Atua i lea aso, ua faapea ane, Pe faapefea ona ou aumaia le atolaau a le Atua ia te au?

13Ona le aumaia ai lea e Tavita o le atolaau ia te ia i le aai o Tavita, a ua avane i le fale o Opete-etoma, o le sa Katā ia.

14Ona tuu ai lea o le atolaau a le Atua i le aiga o Opete-etoma i lona fale e tolu masina; ona faamanuia ai lea e Ieova o le aiga o Opete-etoma, atoa ma mea uma sa ia te ia.