I TUPU, 12 - Samoan Old Version Bible

O LE MATAUPU XII.Ua tete‘a ma Reopoamo o itu aiga e sefulu o Isaraelu.

1Ua alu atu Reopoamo i Sekema, auā ua o mai Isaraelu uma lava i Sekema ia fai o ia ma tupu.

2Ua faalogo ai Ierepoamo le atalii o Nepata a o i Aikupito o ia; auā na sola o ia ai luma o le tupu o Solomona, na nofo foi Ierepoamo i Aikupito.

3Ona latou aauina atu lea nisi e aami atu ia te ia. Ona latou o mai lea o Ierepoamo ma le faapotopotoga uma o Isaraelu, ua latou tautala atu ia Reopoamo, ua faapea atu,

4Na faamamafaina e lou tamā o la matou amo; o lenei, ia e faamāmā le galuega tiga a lou tamā, ma lana amo mamafa na ia faaeetia ia te i matou, ona matou auauna ai lea ia te oe.

5Ona fai atu lea o ia ia te i latou, Ina o ia outou seia oo i ē luā, i le tou toe foi mai ai ia te au; ona ō ai lea o le nuu.

6Ona filifili lea o le tupu o Reopoamo ma toeaina e na tutū i luma o lona tamā o Solomona ina o ola o ia, ua faapea atu, Se a se mea tou te fai mai ou te tali atu ai i lenei nuu?

7Ona latou tali mai lea ia te ia, ua faapea mai, Afai e te fai ma auauna i lenei nuu i le aso nei, ma e auauna ia te i latou, ma e tali atu ia te i latou, ma e tautala atu ia te i latou i upu lelei, ona fai ai lea o i latou mau auauna e faavavau.

8A e peitai ua tuua e ia le upu a toeaina na latou faatonu mai ai ia te ia, ona filifili lea o ia ma taulelea o e na tutupu faatasi ma ia, o e na tutū i ona luma.

9Ua fai atu ia ia te i latou, Se a la outou e fai mai ina ia tatou tali atu ai i lenei nuu ua tautala mai ia te au, ua faapea mai, Ia e faamāmā le amo na faaeetia e lou tamā ia te i matou?

10Ona fai mai lea ia te ia o taulelea o e na tutupu faatasi ma ia, ua faapea mai, Ia e faapea atu i lenei nuu na tautala mai ia te oe, ua faapea mai, Na faamamafaina e lou tamā o la matou amo, a ia e faamāmāina ia te i matou; ia faapea ona e fetalai atu ia te i latou, O lo‘u lima tama e tele lava lea i le sulugatiti o lo‘u tamā.

11Na faaeetia e lo‘u tamā le amo mamafa ia te outou; a o a‘u, ou te faaopoopoina atu i la outou amo; na aoai atu lo‘u tamā ia te outou i sasa; a o a‘u, ou te aoai atu ia te outou i akarava.

12Ona o mai lea o Ierepoamo ma le nuu uma ia Reopoamo i le aso tulu, e pei ona fai mai ai o le tupu, ua faapea mai, Tou te toe foi mai ia te au i e luā.

13Ona tali atu lea o le tupu i le nuu male saua; ua tuua e ia le upu a toeaina na latou faatonuina atu ia te ia;

14a e tautala atu ia te i latou e tusa ma le upu a taulelea, ua faapea atu, Na faamamafaina e lo‘u tamā o la outou amo; a o a‘u, ou te faaopoopoina atu i la outou amo; na aoai atu lo‘u tamā ia te outou i sasa; a o a‘u, ou te aoai atu ia te outou i akarava.

15Ua le faalogo lava le tupu i le nuu; auā mai ia Ieova lea mea ina ia faataunuu lana afioga a fetalai mai ai Ieova na aumaia e Akia le Sailo ia lerepoamo le atalii o Nepata.

16Ua iloa e Isaraelu uma lava e lei faalogo mai le tupu ia te i latou, ona tali atu lea o le nuu i le tupu, ua faapea atu, So matou tofi ea Tavita? E le so matou tofi le atalii o Iese. Isaraelu e, ina o ia outou i o outou fale ie. O lenei, Tavita e, faitalia oe i lou aiga. Ona o ai lea o Isaraelu i o latou fale ie.

17A o le fanauga a Isaraelu sa nonofo i aai o Iuta, na fai Reopoamo ma tupu ia te i latou.

18Ona auina atu lea e le tupu o Reopoamo o Aturamo o le pule i taulaga, a ua fetogi Isaraelu uma ia te ia i maa, ua oti ai o ia. Ona faataalise lea o le tupu o Reopoamo e alu ae i lona kariota, e sola atu i Ierusalema.

19Ua foua foi e Isaraelu le aiga o Tavita, ua oo lava i ona po nei.

20Ua faalogo e Isaraelu uma ua foi mai Ierepoamo, ona latou aauina atu ai lea nisi e aami atu ia te ia e sau i le faapotopotoga, ona latou fai lea o ia ma tupu i Isaraelu uma; e leai se na mulimuli atu i le aiga o Tavita, ua na o le itu aiga lava o Iuta.

21Ua oo Reopoamo i Ierusalema, ona faapotopoto ai lea e ia o le aiga uma lava o Iuta, ma le itu aiga o Peniamina e selau afe ma afe e valu sefulu, o e ua filifilia, o e ua taulia taua, e tau ma le aiga o Isaraelu, ia toe maua mai le malo mo Reopoamo le atalii o Solomona.

22A ua tŭlei mai le afioga a le Atua ia Semaia le tagata o le Atua, ua faapea mai,

23Ina fai atu ia ia Reopoamo le atalii o Solomona le tupu o Iuta, ma le aiga uma o Iuta ma Peniamina, ma e o totoe i le nuu, ia faapea atu,

24O loo ua faapea ona fetalai mai o Ieova, Aua ne‘i tou o ae, aua ne‘i tou sii atu le taua i o outou uso le fanauga a Isaraelu; ia taitasi outou ma foi atu i lona aiga; auā e mai ia te au lenei mea. Ona latou faalogo lea i le afioga a Ieova, ua liliu ma toe foi atu, e tusa ma le afioga a Ieova.

25Ua faia e Ierepoamo o Sekema i le mauga o Efaraima, ma nofo ai; na ia alu atu ai foi ma na faia o Penueli.

26Ona fai ifo lea o Ierepoamo i lona loto, Anei e toe foi le malo i le aiga o Tavita;

27afai e o ae lenei nuu e fai taulaga i le fale o Ieova i Ierusalema, ona toe liliu ai lea o le loto o lenei nuu i lo latou alii, o Reopoamo le tupu o Iuta, ona latou fasioti ai lea ia te au, ma toe foi atu ia Reopoamo le tupu o Iuta.

28Ona filifili lea o le tupu, ma ia faia tamai povi auro e lua, ua fai atu foi o ia ia te i latou, E faigata ia te outou ona o ae i Ierusalema; Isaraelu e faauta mai ia i o outou atua o e na aveina ae outou mai le nuu o Aikupito.

29Ua ia tuu le tasi i Peteli, ua ia tuu foi le isi i Tanu.

30Na fai lenei mea ma agasala; auā na o atu le nuu i luma o le tasi i Tanu.

31Ona faia lea e ia o le fale o mea maualuluga; na tofia foi e ia nisi o le nuu uma e fai ma faitaulaga, e le ni o le fanauga a Levi i latou.

32Ua faia foi e Ierepoamo le tausamiga i le masina e valu, i le aso e tasi le sefulu ma le lima o le masina, e pei o le tausamiga ua i ai i Iuta; ona alu ae lea o ia i le fata faitaulaga. Sa faapea ona faia e ia i Peteli, e fai taulaga i tamai povi na ia faia; ua ia tofia foi i Peteli o faitaulaga o mea maualuluga na ia faia.

33Ua alu ae o ia i le fata faitaulaga na ia faia i Peteli i le aso e sefulu ma le lima o le masina e valu, o le masina lea na ia filifilia i lona lava loto; ua faia foi e ia le tausamiga mo le fanauga a Isaraelu; ua ia alu ae foi i le fata faitaulaga e faamu ai mea manogi.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help