1 E faalogo le atalii poto i le a‘oa‘o atu a lona tamā; a o lē faatauemu, e le faalogo ia i le aoaiga.
2E ‘ai le tagata i mea lelei ai le fua o lona gutu; a o le manao o e amio leaga, e ‘ai ia i le sauaga.
3O le na te leoleo i lona gutu, e tausia e ia lona agaga; a o lē faamaga ona laugutu, e ia te ia le malaia.
4Ua tu‘inanau le loto o le paie, a e leai se mea e maua; a o le manao o e filigā i galuega e matuā ma‘ona ia.
5Ua ‘ino‘ino le amiotonu i le upu pepelo; a o lē amio leaga e inosia o ia ma faamāina.
6O le amiotonu e leoleoina ai lē ua sao lana amio; a o le amio leaga e lafotuina ai le ua agasala.
7O i ai le tasi e faatagā mauoa, a e leai lava sana mea; o i ai le faatagā mativa, a e tele ana oloa.
8O le togiola o le tagata, o lana oloa lea; a o lē mativa, e le faalogo o ia i le aoaiga.
9E fiafia le malamalama o e amiotonu; a o le lamepa a e amio leaga, e tineia lea.
10Na o le faamaualuga lava e tupu ai le misa; a o e filifili, e popoto i latou.
11E faaitiitia le oloa i lē fai mea faatauvaa; a o lē faaputu mea i galuega, e faateleina ana mea.
12O le faamoemoe ua tuai ona taunuu e faanoanoa ai le loto; a o le manao ua taunuu, o le laau o le ola lea.
13O lē ‘ino‘ino i le upu, e fano o ia ia te ia; a o lē mata‘u i le poloaiga, e filemu lava o ia.
14O le tulafono a le ua poto, o le puna o le ola lea, e ‘alo ese ai i mailei e oti ai.
15O le mafaufau lelei e tupu mai ai le alofa; a o le ala o e amio leaga ua faigata lea.
16O tagata mafaufau uma, e taitasi ma amio poto ia; a o le vale, na te faasalalauina lona valea.
17O le avefeau e amio leaga, e paū o ia i le leaga; a o le tausavali faamaoni e malolo ai.
18O le mativa ma le faamāina, e i ai ia i le na te teena mea e a‘oa‘oina; a o le ua usiusitai i le aoaiga, e mamalu lava ia.
19O le manao ua oo e suamalie lea i le loto; a e ‘ino‘ino o e valelea ina ‘alu ese i le leaga.
20O lē latou te feoai ma tagata popoto, e poto lava ia; a o le uo a e valelea, e leaga ai lava ia.
21Ua tulituliloaina ē agasala i le leaga; a e tauia e amiotonu i le lelei.
22O le tagata lelei na te tofia ana mea i le fanau a lana fanau; a o le oloa o le tagata agasala, e teua lea mo lē amiotonu.
23E tele le mea e ‘ai i le faatoaga a e matitiva; a o i ai le tasi ua faaumatia ina ua leai se faamasinoga.
24O le ua tuuna lana sasa, ua ‘ino‘ino o ia i lona atalii; a o le ua alofa ia te ia, ua saili le aoaiga mo ia.
25E ‘ai le amiotonu e ma‘ona ai o ia; a o manava o e amio leaga, e momole ia.
Who We AreWhat We EelieveWhat We Do
2025 by iamachristian.org,Inc All rights reserved.
