1Ua toe aulia mai le tausaga, o ona po ia e o atu ai o tupu, ona auina atu lea e Tavita ia Ioapo, ma ana auauna faatasi ma ia, atoa ma Isaraelu uma; ona latou faaumatia lea o le fanauga a Amoni, ma latou vagaia Rapa; a o Tavita sa nofo o ia i Ierusalema.
2Ua oo i le tasi afiafi na tulai Tavita ai lona moega, ua fealuai i luga o le fale o le tupu; ona ia iloa atu ai lea ai luga o le fale o le fafine o loo taele, o le fafine ua matuā lalelei lava.
3Ona au atu lea e Tavita se tasi e fesili po o ai le fafine. Ua fai ane le tasi, E le o Patesepa ea lenei, le afafine o Eliamo, le avā a Uria le sa Hetī?
4Ua aauina atu e Tavita o auauna, ua aami ia te ia; ona sau ai lea o ia ia te ia; ona la momoe lea ma ia; a o le fafine, na faamamā o ia ia te ia ai lona leaga, ona foi ai lea o ia i lona fale.
5Sa to ai le fafine, ona auina atu lea e ia se tasi e ta‘u atu ai ia Tavita, na faapea atu, O a‘u nei ua to.
6Ona au atu lea e Tavita se tasi ia Ioapo, ua faapea, Ia e auina mai Uria le sa Hetī ia te au. Ona auina mai lea o Uria e Ioapo ia Tavita.
7Ua sau Uria ia te ia, ona fesili lea o Tavita, po ua saogalemu Ioapo, ma saogalemu le nuu, po ua manuia foi le taua.
8Ona fai atu lea o Tavita ia Uria, Ia e alu ifo i lou fale, ma mulumulu i ou vae. Ua alu atu Uria nai le fale o le tupu, ua mulimuli atu ia te ia le tasi ma mea fono mai le tupu.
9A ua taoto Uria i le faitotoa o le fale o le tupu faatasi ma auauna uma a lona alii, ua le alu ifo lava i lona fale.
10Ona latou ta‘u atu lea ia Tavita, ua faapea atu, E lei alu ifo Uria i lona fale. Ua fai atu Tavita ia Uria, E te lei sau malaga ea oe? Se a le mea e te le alu ifo ai i lou fale?
11Ona fai mai lea o Uria ia Tavita, O le atolaau, ma Isaraelu, atoa ma Iuta, o loo nonofo i latou i fale apitaga; o le alii foi o Ioapo, ma auauna a lo‘u alii, o loo i togālauapi i latou i le fogāeleele; ou te alu ea a‘u i lo‘u fale, ou te ‘ai ai ma inu, ma te momoe foi ma la‘u avā? Ua e soifua oe, ma ua soifua lou agaga, ou te le faia lava lea mea.
12Ua fai atu Tavita ia Uria, Nofo ia oe iinei i lenei aso foi, a taeao ona ou tuuina atu ai lea o oe e alu. Ona nofo lea o Uria i Ierusalema i lea aso ma le tasi aso.
13Ua valaau Tavita ia te ia, ona ‘ai lea o ia ma inu i ona luma, ma ua na faaonā ia te ia. Ona alu atu lea o ia i le afiafi, ua taoto i lona moega faatasi ma auauna a lona alii, a e lei alu ifo lava i lona fale.
14Ua oo i le taeao, ona tusi lea e Tavita le tusi ia Ioapo, ua avatu e ave e Uria.
15Ua ia tusi ai i le tusi, ua faapea, Ia e tuu atu ia Uria i tinā‘au a le taua, a e tou tuumuli mai ia te ia, ina ia fasia o ia ia oti ai.
16Ua oo ina vagaia le aai e Ioapo, ona ia tofia lea o Uria i le mea ua na iloa o i ai tagata totoa.
17Ona o mai lea o tagata o le aai, ua latou tau ma Ioapo; ua fāsia nisi tagata o auauna a Tavita; ua oti ai foi Uria le sa Hetī.
18Ona auina atu lea e Ioapo le tasi, ua ta‘u atu ai ia Tavita i tala uma o le taua.
19Ua ia fai atu foi i le ua ave le feau, ua faapea, A ē faauma ona tala atu i le tupu o tala uma o le taua,
20pe afai e toasa le tupu, ma fetalai mai ia te oe, Se a le mea na outou faalatalata atu ai i le aai ina ua outou tau i ai? Na outou le iloa ea latou te fanafana mai i luga o le ‘olo?
21O ai ea na fasia Apimeleko le atalii o Ierupese? E le o le fafine ea sa lafo i ona luga se fāsi maaolo ai luga o le ‘olo, ma fasioti ai ia te ia i Tipesa? Po o le a lava le mea na outou faalatalata atu ai i le ‘olo? Ona e fai atu lea, Ua oti foi lau auauna o Uria le sa Hetī.
22Ona sau lea o lē na auina, ua oo mai ma ta‘u ia Tavita i mea uma na poloai mai ai Ioapo ia te ia.
23Ua fai mai le na auina ia Tavita, Na malo mai le nuu ia te i matou, ma latou o mai ia te i matou i le vao; a ua matou tetee atu ia te i latou ua oo i le faitotoa o le aai;
24a o e fanafana na latou fanafana mai i luga o le ‘olo i au auauna, ua oti ai nisi auauna a le tupu; ma lau auauna o Uria le sa Hetī, ua oti foi o ia.
25Ona fai atu lea o Tavita i le na auina mai, Ia e faapea atu ia Ioapo, Aua e te faavaivai i lenei mea, auā e ‘aina e le pelu, e le faailogaina. Ia e faamalosi i lau taua i le aai, ma e lepetia, ma faamalosi i ai.
26Ua lagona e le avā a Uria, ua oti Uria lana tane, ona tagitu‘i ai lea o ia i lana alii.
27Ua mavae le faanoanoa, ona feau atu lea e Tavita, ua au mai o ia i lona fale, ua fai mana avā, ua fanau ai lona atalii. A ua leaga ia Ieova le mea ua faia e Tavita.
Who We AreWhat We EelieveWhat We Do
2025 by iamachristian.org,Inc All rights reserved.
