1Ua iloa e Palaamo ua finagalo Ieova e faamanuia atu ia Isaraelu, ona le toe alu ai lea o ia, e pei ona fai soo e saili togafiti faataulāitu, a ua faasaga atu o ia i le vao.
2Ona tepa ae lea o Palaamo, ua iloa Isaraelu, o loo nofo a itu aiga, ona oo lea o le Agaga o le Atua i luga ia te ia.
3Ona saunia ai lea e ia o lana faataoto, ua faapea atu, Ua fai atu Palaamo le atalii o Peoro; ua fai atu le tagata ua pupula ona mata
4ua fai atu le ua faalogo i afioga a le Atua, o le ua vaaia mea na faaali mai Le e ona le malosi uma lava, ua paū, a ua pupula pea ona mata.
5Iakopo e, ua matuā matagofie ou fale ie, ma mea e te nofo ai, Isaraelu e.
6O loo folasia pei o alia; e pei o faatoaga i le auvai o le vaitafe; e pei o aloe foi ua totoina e Ieova; e pei o arasi foi i le auvai.
7Na te sasaaina vai nai ana pakete, e i ai foi ona fua i vai e tele; e sili lona tupu ia Akako, e sili foi lona malo.
8Ua aumaia o ia e le Atua nai Aikupito ua ia te ia e peiseai le tele vave o le rema; e ‘aina e ia o nuu ese o e ita ia te ia; e gauia e ia o latou ivi, o ana u fanafana e manunua ai i latou.
9E faapuga o ia, e taoto e pei o se leona, e pei o se leona fafine foi; o ai ea se na te faalili ia te ia? E manuia le na te faamanuia atu ia te oe, a e fetuuina le na te fetuu ia te oe.
10Ona tupu ai lea o le ita o Palako ia Palaamo, ua pati ona lima; ua faapea atu foi Palako ia Palaamo, Na ou amia oe e fetuu i o‘u fili, faauta foi, ua atu tolu ona e matua faamanuia atu ia te i latou.
11O lenei, ina vave ia oe i le mea ua e mau ai; na fai a a‘u matuā faamalualiia oe; a e peitai ua taofia oe e Ieova ne‘i faamalualiia oe.
12Ona fai atu ai lea o Palaamo ia Palako, Ou te lei fai atu ea i lau sāvali na e aauina atu ia te au, ua faapea atu,
13Afai e foaiina mai e Palako ia te au o ario ma auro e tumu ai lona fale, ou te le mafaia ona soli le afioga a Ieova, e fai se mea lelei po o se mea leaga i lo‘u lava loto; a o le upu e fetalai mai ai Ieova ou te fai atu ai lava.
14O lenei, faauta mai, a a‘u alu i lo‘u nuu ina maliu mai ia, so‘u faaali atu ia te oe mea e faia e lena nuu i lou nuu i ona po amuli.
15Ona saunia ai lea e ia o lana faataoto, ua faapea atu, Ua fai atu Palaamo le atalii o Peoro; ua fai atu le tagata ua pupula ona mata;
16ua fai atu le ua faalogo i afioga a le Atua, ma iloa le poto o le Silisili ese; ua na iloa foi le faaaliga mai Le e ona le malosi uma lava, ua paū, a ua pupula pea ona mata.
17Ou te iloa o ia, a e le o ona po nei; ou te vaai atu ia te ia, a e le latalata mai; e alu le fetu mai ia Iakopo; e tu mai foi le tootoo mai ia Isaraelu, na te matuā sasaina itu e lua o Moapi, ma faaumatia e le fanauga uma a Seetu.
18E avea foi Etoma ma tofi, e avea foi Seira ma tofi o e fai i latou ma fili; a e avea lava Isaraelu ma toa.
19E pule so sa Iakopō, na te faaumatia foi se toe i le aai.
20Ua vaavaai foi o ia i Amaleka, ona saunia ai lea e ia o lana faataoto, ua faapea atu, O Amaleka na muamua ia i nuu, a o lona iuga e faaumatia e faavavau.
21Ua vaavaai foi o ia i sa Kenī, ona saunia ai lea e ia o lana faataoto, ua faapea atu, E malosi le mea e te mau ai; ua e faia foi lou ofaga i le papa.
22A e peitai e tauāu ina faaumatia Keni seia oo ina faia oe ma tagata o taua ia Asuria.
23Ona saunia ai lea e ia o lana faataoto, ua faapea atu, Aue! O ai ea se ola pe a faia e le Atua lenei mea?
24E o mai vaa mai le nuu o Kitimo, ma latou faasaua ia Asuria, latou te faasaua foi ia Eperu, e faaumatia foi o ia e faavavau.
25Ona tulai ai lea o Palaamo, ua alu, ua toe foi atu i le mea sa nofo ai o ia ua alu foi Palako ia.
Who We AreWhat We EelieveWhat We Do
2025 by iamachristian.org,Inc All rights reserved.
