1O le tolugafulu ma le ono o tausaga o le nofoaiga a Asa, ua alu ae ai Paasa le tupu o Isaraelu i Iuta, ua ia faia foi o Rama, ina ia le mafai ai se tasi ona sau pe alu atu ia Asa le tupu o Iuta.
2Ona au mai lea e Asa o ario ma auro i oloa o le fale o Ieova ma le fale o le tupu, ua avatua foi ia Peniata le tupu o Suria, o le sa nofo i Tamaseko, ua faapea atu,
3O loo ia te i taua le feagaiga ma oe, o lo‘u tamā foi ma lou tamā; faauta, ou te avatua ia te oe o ario ma auro; ina e maliu mai ia, ma tatala la oulua feagaiga ma Paasa le tupu o Isaraelu, ina ia alu ese ia ia te au.
4Ona faalogo lea o Peniata i le tupu o Asa, ma ia aauina atu o e avea ana ‘au i aai o Isaraelu; ua latou fāsia Iono, ma Tanu, ma Apelamaima, ma aai uma o Nafatali e tuu ai oloa.
5Ua faalogo ai Paasa, ona tuua lea e ia ona faia o Rama, ma ua le toe faia lana galuega.
6Ona ave lea e le tupu o Asa o Iuta uma; ona latou ave ese ai lea o maa o Rama ma ona laau na fai ai le galuega e Paasa; ma ua fai a‘i e ia o Kipea ma Mesepa.
7O ona po ia na alu atu ai o Hanani le tagata vaai ia Asa le tupu o Iuta, ma ua faapea atu ia te ia, Ua e faalagolago i le tupu o Suria, a ua e le faalagolago ia Ieova lou Atua, o le mea lea ua sao ai le itu taua a le tupu o Suria ai lou lima.
8E le o le itu taua tele ea o Aitiope ma Lipua, sa i ai kariota, ma ‘au e tietie i solofanua e matuā tele lava? A ua tuuina mai i latou i lou lima, ina ua e faalagolago ia Ieova.
9Auā o fofoga o ieova e fetaufetuliai i le lalolagi uma, na te fesoasoani ia te i latou o e ua sao o latou loto ia te ia. Ua e fai faavalea lenei mea; o lenei, e afua i ona po nei ona i ai o taua ia te oe.
10Ona ita lea o Asa i le tagata vaai, ma ua tuu atu ia te ia i le fale puipui; auā na ita ia te ia ona o lea upu. Ua faasaua foi Asa i nisi o le nuu i ia ona po.
11Faauta foi, o mea na faia e Asa, o mea muamua ma mea mulimuli, faauta, ua tusia i le tusi i tupu o Iuta ma Isaraelu.
12Na ma‘i foi Asa i ona vae i le tolugafulu ma le iva o tausaga o lana nofoaiga, ua oo ina tele o lona ma‘i; a ua le saili o ia ia Ieova i lona ma‘i, a ua saili i foma‘i.
13Ona taoto lea o Asa faatasi ma ona tamā, ua oti o ia i le fagafulu ma le tasi o tausaga o lana nofoaiga.
14Ua latou tanu foi o ia i ona tuugamau, na ia elia mo ia i le aai a Tavita, ma ua faataoto ia te ia i luga o le moega ua tumu i mea manogi, ma mea eseese ua saunia i le faiva o lē fai mea manogi; ma ua latou muina le afi e matuā tele lava mo ia.
Who We AreWhat We EelieveWhat We Do
2025 by iamachristian.org,Inc All rights reserved.
