1O le avega na vaaia e le perofeta o Sapakuka.
2Ieova e, ou te valaau seia afea, ae te le faafofoga mai; ou te alaga atu ia te oe ona o le sauaga, ae te le faaola mai?
3Se a ea le mea ua e faaali mai ai ia te au le amio leaga, ma e silasila i le puapuaga? e i o‘u luma le faatafunaina ma le saua, e i ai foi le fefinauaiga ma le faatupuina o le misa.
4O le mea lea ua faaleaogaina ai le tulafono, ua le faia foi le faamasinoga faamaoni; auā ua siosioina le ua amiotonu e le ua amio leaga, o le mea lea ua fai ai le faamasinoga faapiopio.
5Ia outou vaai atu i nuu ese, ma ia outou iloa, ma ia matuā taufaiofo lava; auā ou te faia se galuega i ona aso o outou, e ui lava ina talaina atu, tou te le talitonu ai lava.
6Auā faauta, ou te lagaina Kaletaia, o le nuu saua ma le tele vavave, o loo latou o atu i le lautele o le lalolagi, e fai mo latou o mea e nonofo ai, ae le ni o latou nuu.
7O i latou e matautia ma le fefefe i ai o tagata; e tupu mai ia te i latou lava lo latou faamasinoga ma lo latou mamalu.
8E sili ona tele vavave foi a latou solofanua i nameri, e sili ona feai foi i luko i le afiafi; e faalialia foi a latou ‘au e tietie i solofanua, o a latou ‘au foi e tietie i solofanua e o mai i le mea mamao; latou te felelei pei o aeto e tele vavave e aai ai.
9Latou te o uma mai ina ia saua; o le faasaga mai o latou mata e pei o le matagi mai sasae; latou te faapotopotoina tagata o taua e pei o le oneone.
10Latou te tauemu i tupu, latou te tapisa foi i tamaalii; latou te tapisa i ‘olo uma, auā latou te tanu ai le eleele, ma latou aea.
11Ona atili naunau ai lea o i latou, ona latou o atu lea, ma latou nofo sala ai, o loo faapea ane, O lo latou malosi lea i lo latou atua.
12Ieova e, lo‘u Atua, le Paia e, e te le mai le faavavau ea? matou te le oti; Ieova e, ua e tuu ia te i latou e faaoo ai sala, le Papa e, ua e tofia i latou e fai ai aoaiga.
13E sili ona manino ou fofoga, e te le fia silasila i le amio leaga, e le mafai foi ona e silasila i le agasala; se a ea le mea e te silasila ai i e o fai amio faa‘ole‘ole, ma ē le fetalai ina o fasioti e le tagata agasala le tagata e sili ona amiotonu ia te ia?
14ma ē faia tagata ia pei o i‘a o le sami, pei o mea fetolofi, e leai so latou faipule?
15Ua latou avae ia te i latou uma i le mātau, ua aofia i latou i lo latou upega, ua taena‘i foi ia te i latou i lo latou tu‘i; o le mea lea ua latou fiafia ai, ma ua mitamita lava.
16O le mea lea latou te fai ai taulaga i lo latou upega, latou te faamu ai foi mea manogi i lo latou tu‘i; auā o ia mea e lelei ai a latou mea ua maua, e lololo ai foi a latou mea e ‘ai.
17O le mea ea lea latou te sasaa atu ai lo latou upega, ma le le mapu ona fasioti pea lava i atunuu?
Who We AreWhat We EelieveWhat We Do
2025 by iamachristian.org,Inc All rights reserved.
