TEUTERONOME, 24 - Samoan Old Version Bible

O LE MATAUPU XXIV.O le avā e faatea; atoa ma nisi mea e fai.

1Afai e fai avā se tasi i se fafine, ua la nonofo, a oo foi ina le toe fiafia o ia i ai, auā ua na iloa ia te ia se mea leaga; ona tusi ai lea e ia se tusi alei ma ia, ma avatu ai ia te ia, ma auina atu o ia ai lona fale.

2Pe a alu ese foi o ia i lona fale, ona alu ai lea o ia ma nofo i se tasi tane;

3afai foi e ‘ino‘ino ia te ia lana tane mulimuli, ma tusi se tusi alei ma ia, ma avatu ai ia te ia, ma auina atu o ia ai lona fale; pe afai foi ua oti le tane mulimuli, na fai avā ia te ia;

4e le mafai i lana muai tane, sa na auina o ia, ona toe fai o ia mana avā, ina ua uma ona faaleagaina o ia; auā o le mea inosia lea i luma o Ieova; aua foi ne‘i e faatupuina le agasala i le nuu ua foaiina mai e Ieova lou Atua ia te oe e fai mou tofi.

5Afai foi e faatoa fai avā se tasi, aua ne‘i alu o ia i le taua, aua foi ne‘i togia o ia i se feau a le nuu; ia saoloto o ia i lona aiga i le tausaga e tasi, ma faafiafia atu ai i lana avā ua fai.

6Aua ne‘i ave faafaatau e se tagata se maaolo i lalo, po o se maaolo i luga; auā e ave ai faafaatau le ola o le tagata.

7Afai ua maua se tagata ua gaoi i se tasi o ona uso o le fanauga a Isaraelu, ma fai o ia ma pologa, pe faatauina atu o ia; ia oti lea tagata gaoi; ona e tuueseina ai lea o le leaga ia te oe.

8Ia oe i le ma‘i lepela, ia e matuā anaana, ma e faia mea uma lava e pei ona a‘oa‘oina ai outou e le au faitaulaga, o sa Levī; e faapei ona ou fai atu ai ia te i latou, ia outou anaana i ai ia faia.

9Ia e manatua le mea na faia e Ieova lou Atua ia Miriama i le ala, ina ua outou o mai ai nai Aikupito.

10Afai e avatu o oe se mea ua aitalafu mai e lē lua te tuaoi, aua ne‘i e alu i lona fale e au mai ai lana mea ua tuu faafaatau a ia e tu i fafo,

11ona au mai ai lea i fafo ia te oe o le me ua tuu faafaatau e le tagata na e avatu i ai mea ua aitalafu mai.

12Afai foi o le tagata mativa o ia, aua e te moegaiina lana mea ua tuu faafaatau;

13a ia e toe avatua lava ia te ia le mea ua tuu faafaatau a o lei goto le la, ina ia moe o ia i lona lava ofu, ma faamanu ia te oe; e avea foi lea ma amiotonu ia te oe i luma o Ieova lou Atua.

14Aua e te faasaua i se auauna tauia ua puapuapatia ma le mativa, o sou uso, po o se āumau ia te oe o i lou nuu i au aai;

15ia e avatu ia te ia lona totogi i lona lava aso, a o lei goto le la; auā ua mativa o ia, ua naunau foi i ai lona loto; ne‘i valaau o ia ia Ieova ona o oe, ona fai lea ma agasala ia te oe.

16Aua ne‘i fasiotia le tamā e sui a‘i le atalii, aua foi ne‘i fasiotia le atalii, e sui a‘i le tamā; a ia taitasi le tagata ma fasiotia o ia i lana lava agasala.

17Aua ne‘i e faapiopioina le faamasinoga i le tagata ese, po o le ua āumatuā; aua foi ne‘i e fai faafaatau le ofu o le fafine ua oti lana tane;

18a ia e manatua na fai oe ma auauna i Aikupito, a ua laveaiina oe e Ieova lou Atua ai lea mea; o le mea lea ou te fai atu ai ia te oe e faia lenei mea.

19A ē selesele i lau saito i lou fanua, a ua galo ia te oe se tasi fusi saito i le fanua, aua ne‘i e foi atu e au mai ai; a ia tuu ai mo le tagata ese, ma le ua aumatuā, ma le fafine ua oti lana tane; ina ia faamanuia oe e Ieova lou Atua i mea uma lava e faia e ou lima.

20A ē tautā i lāu olive, aua e te toe suesue ona la; a ia tuu ai mo le tagata ese, ma le ua āumatuā, ma le fafine ua oti lana tane.

21A ē tau i fua o lau tovine, aua e te foi faalua e tau mai ai; a ia tuu ai mo le tagata ese, ma le ua āumatuā, ma le fafine ua oti lana tane.

22E te manatua na fai oe ma auauna i le nuu o Aikupito; o le mea lea ou te fai atu ai ia te oe ia e faia lenei mea.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help