1Ua fai ane Saulo ia Ionatana lona atalii, atoa foi ma ana auauna uma, ia latou fasioti ia Tavita; a o Ionatana le atalii o Saulo, sa tele lava lona alofa ia Tavita.
2Ua ta‘u mai e Ionatana ia Tavita, ua faapea, O loo lamalama Saulo lo‘u tamā e fasioti ia te oe; o lenei, ia oe ia te oe seia taeao, ma e nofo i se mea lilo e te lafi ai;
3a o a‘u, ou te alu atu, ou te tu i tafatafa o lo‘u tamā i le fanua e te i ai; ou te tautala foi i lo‘u tamā ia te oe, ona ou iloa lea pe faapefea; i lo‘u ta‘u atu ai ia te oe.
4Ua tautala lelei Ionatana ia Saulo lona tamā ia Tavita; ua fai atu foi ia te ia, Aua ne‘i agaleaga le tupu i lana auauna o Tavita, auā e lei agaleaga o ia ia te oe; a ua agalelei lava o ia ia te oe;
5Na ia tuu foi lona ola i lona lima, ma na fasi le Filisitia, na fai ai foi e Ieova le faaolataga tele mo Isaraelu uma; na e iloa foi, ma fiafia i ai; se a le mea e te agaleaga ai i le tagata lē sala, ina a ē fasioti fua ia Tavita?
6Ua faalogo Saulo i le upu a Ionatana, ma ua tauto ai Saulo, O loo soifua Ieova, e le fasia lava o ia.
7Ona valaau lea o Ionatana ia Tavita, ua ta‘u atu foi e Ionatana ia te ia i nei upu uma; ona au mai lea o Tavita e Ionatana ia Saulo; ua i ai foi o ia i ona luma pei o anamua.
8Ua toe tau le taua; ona alu atu ai lea o Tavita, ua tau ma Filisitia, ma na fasi ia te i latou i le fasi tele, ua latou sosola i ona luma.
9Sa ia Saulo le agaga leaga mai ia Ieova; o loo nofo o ia i lona fale ma lona tao i lona lima, o loo ta foi e Tavita le kitara i lona lima.
10Na lamalama Saulo e fasioti ia Tavita i le tao, ia tuilua o ia ma le pa o le fale; a ua ‘alo ese ia i luma o Saulo, ua taulia le tao i le pa o le fale, a ua sola Tavita, ua sao i lea lava po.
11Ona aau atu lea e Saulo o auauna i le fale o Tavita e lamalama ia te ia ma fasioti ia te ia i le taeao; ua ta‘u atu ia Tavita e Mekala lana avā, ua faapea, Afai e te le faasao lou ola i le po nei, a taeao ona e oti ai lea o oe.
12Ua tuutuu ifo e Mekala ia Tavita i le faamalama, ua alu o ia, ua sola, ona sao ai lea.
13Ona tago lea o Mekala i le tupua, ua tuu ai i le moega, ma le ie fulufulu ‘oti ua ia faaaluga ai lona ulu, ma na ufiufi ai i le ie afu.
14Ua aauina atu e Saulo ni auauna e pu‘e ia Tavita; ona fai mai ai lea o le fafine, O loo ma‘i o ia.
15Ona aau atu lea o Saulo ni auauna e vaai atu ia Tavita, ua faapea, Ia au mai o ia ia te au i luga o le moega, ina ia fasioti ia te ia.
16Ua o atu auauna, faauta, o le tupua o loo i le moega, ma le ie fulufulu ‘oti ua aluga ai.
17Ona fai mai lea o Saulo ia Mekala, O le a le mea ua e faapea ai ona pelogia o a‘u? Ma e ‘auese atu i lo‘u fili, ua sao ai o ia? Ua fai atu Mekala ia Saulo, Na ia fai mai ia te au, Ia e tuu mai ia te au, ou te alu, se a le mea ou te fasioti ai ia te oe?
18Ua sola Tavita, ua sao, ua oo atu ia Samuelu i Rama; ona ta‘u atu ai lea ia te ia o mea uma na faia e Saulo ia te ia; ua la o ma Samuelu, ua la nonofo i Naiota.
19Ona ta‘uina atu lea ia Saulo, ua faapea, Faauta, o loo i ai Tavita i Naiota i Rama.
20Ona aauina atu ai lea e Saulo o auauna e pue ia Tavita. Ua latou iloa le faapotopotoga o perofeta, o loo perofeta ane, ma Samuelu o loo tu ia e pule ia te i latou; ona i ai lea i luga o auauna a Saulo le Agaga o le Atua, ua perofeta foi i latou.
21Ua ta‘uina atu ai ia Saulo, ona aauina atu lea e ia nisi auauna; ua perofeta foi i latou. Ona toe aauina atu lea e Saulo nisi auauna, o le atu tolu lea; ua perofeta foi i latou.
22Ona alu atu o ia lava i Rama; ua oo atu i le vaieli tele, o loo i Seku, ona fesili lea o ia, ua faapea, Po o fea o iai Samuelu ma Tavita? Ua tali mai, Faauta, o loo i Naiota i Rama.
23Ona alu atu ai lea o ia i Naiota i Rama; ona i ai lea i luga ia te ia foi le Agaga o le Atua, ua savalivali ma perofeta ane, ua oo atu lava o ia i Naiota i Rama.
24Ua tuu ese lava e ia ona ofu, ua perofeta ane foi i luma o Samuelu, ua faapaū ua lē ofu, ua atoa lea aso, ua atoa foi le po; o le mea lea ua latou fai ane ai, Ua i ai ea foi Saulo faatasi ma le au perofeta?
Who We AreWhat We EelieveWhat We Do
2025 by iamachristian.org,Inc All rights reserved.
