1Ua fai atu Mose ma toeaina o Isaraelu i le nuu, ua faapea atu, Ia outou tausi i poloaiga uma lava ou te fai atu ai ia te outou i le aso nei.
2O le aso foi tou te sopoia atu ai Ioritana, i le nuu ua foaiina mai e Ieova lou Atua ia te oe, ia e faatuina ai mo oe ni maa tetele, ma ē valia i panisina;
3ia e tusia foi i ai o upu uma lava o lenei tulafono, pe a e sopoia atu, ina ia e alu atu ai i le nuu ua foaiina mai e Ieova lou Atua ia te oe, o le nuu o tafe ai le suāsusu ma le meli; e pei ona fetalaia mai ai e Ieova o le Atua o ou tamā ia te oe.
4Pe a outou sopoia atu Ioritana, ona outou faatuina lea o na maa, ou te fai atu ai ia te outou i le aso nei, i le mauga o Evalu, ia e valia foi i panisina.
5Ia e ati ae foi i lea mea le fata faitaulaga mo Ieova lou Atua, o le fata maa; aua ne‘i e talai ai i se uamea.
6O maa atoatoa e te ati a‘i le fata faitaulaga o Ieova lou Atua; ma e fai ai taulaga mu ia Ieova lou Atua i ona luga;
7ia e fai ai foi taulaga faafetai, ma e ‘ai ai i lea mea, ma olioli i luma o Ieova lou Atua.
8Ia e tusi foi i maa o upu uma lava o lenei tulafono, ia togitogi lelei lava.
9Ona tautala atu lea o Mose ma le au faitaulaga, o sa Levī ia Isaraelu uma lava, ua faapea atu, Isaraelu e, ia e faasaga mai, ma e faalogologo mai; o le aso nei ua aveaai oe ma nuu mo Ieova lou Atua.
10Ia e faalogo foi i le siufofoga o ieova lou Atua, ma ia e faia ana poloaiga ma ana tulafono, ou te fai atu ai ia te oe i le aso nei.
11Ua fai atu foi Mose i le nuu i lea lava aso, ua faapea atu,
12E tutū i latou nei i le mauga o Keresema e faamanuia atu i le nuu, pe a outou sopoia atu Ioritana; o Simeona, ma Levi, ma Iuta ma Isakara, ma Iosefa, ma Peniamina.
13E tutū foi i latou nei i le mauga o Evalu e faafano; o Reupena, o Kato, ma Asera ma Sepulona, o Tanu, ma Nafatali.
14E fai atu foi sa Levī ma le leo tele, e faapea atu i tagata uma lava o Isaraelu,
15Ia malaia lava le tagata na te faia se tupua ua ta, po o se tupua uamea, o le mea e inosia e Ieova, ua faia i lima o le tufuga, ma tuu ai i se mea lilo. Ona tali mai ai lea o le nuu uma lava, e faapea mai, Amene.
16Ia malaia le na te faaleaogaina lona tamā po o lona tinā. Ona tali mai ai lea o le nuu uma lava, Amene.
17Ia malaia le na te sii le tuaoi o lē la te tuaoi. Ona tali mai ai lea o le nuu uma lava, Amene.
18Ia malaia le na te faaseseina le tauaso i le ala. Ona tali mai ai lea o le nuu uma, Amene.
19Ia malaia le na te faapiopioina le faamasinoga i le tagata ese, ma le ua āumatuā, ma le fafine ua oti lana tane. Ona tali mai ai lea o le nuu uma, Amene.
20Ia malaia le la te momoe ma le avā a lona tamā; auā e susue e ia le ie o lona tamā. Ona tali mai ai lea o le nuu uma, Amene.
21Ia malaia lē la te momoe ma se manu. Ona tali mai ai lea o le nuu uma lava, Amene.
22Ia malaia lē la te momoe ma lona tuafafine, o le afafine o lona tamā, po o le tama teine a lona tinā. Ona tali mai ai lea o le nuu umā lava, Amene.
23Ia malaia lē la te momoe ma le tinā o lana avā. Ona tali mai ai lea o le nuu uma, Amene.
24Ia malaia le na te fasi faaliolilo lē la te tuaoi. Ona tali mai ai lea o le nuu uma, Amene.
25Ia malaia le na te talia se taui e fasioti ai se tagata ua le sala. Ona tali mai ai lea o le nuu uma, Amene.
26Ia malaia le na te le faamauina upu o lenei tulafono e faia. Ona tali mai ai lea o le nuu uma, Amene.
Who We AreWhat We EelieveWhat We Do
2025 by iamachristian.org,Inc All rights reserved.
