1Ua tali atu Iopu, ua fapea atu, E!
2Ana matuā fuatia lo‘u tiga; ana avae foi faatasi lo‘u malaia i le fua faatautau.
3Po o pe na ua iloa ua sili lona mamafa i le oneone o le sami; o le mea lea ua soona fai ai a‘u upu.
4Aua o loo i totonu ia te au o u fanafana a Le e ona le malosi uma lava; o le mea oona o i ai e inumia ai lo‘u agaga; o loo pae tau mai ia te au o mea matautia mai le Atua.
5Pe tagi ea le asini o le vao ina o iai i le vao mu‘a? Pe tagi foi le povi ua i ona luma ana mea e ‘ai?
6Pe ‘aina ea le mea ua le namumea pe a le ināia i le masima? Pe ai ea se manogi i le niu o le fuāmoa?
7O mea sa ou le mafai ona tago i ai, ua avea ia ma a‘u mea e ‘ai e peiseai ua leaga.
8E! Ana maua le mea na ou faatoga i ai; ana foaiina mai foi e le Atua le mea na ou naunau i ai;
9ia finagalo le Atua e tu‘imomomo ia te au, ia tuu mai e ia lona aao, ma vavaeeseina a‘u.
10Ona i ai pea lea sina o‘u faamatalaloto; ou te olioli foi i le tiga; aua na te faasaoina; auā sa ou le natia afioga a le Paia.
11Po o le a ea lo‘u malosi, ou te faamoemoe ai i se mea? Po o le a foi lo‘u iuga, ou te faatoatoa ai pea?
12O le malosi o maa o lo‘u malosi ea lea? O lo‘u tino o le ‘apa memea ea lea?
13Aue! E leai so‘u fesoasoani ia te au lava; ua sola ese foi ia te au le faaolataga.
14O le ua tigaina e tatau ona alofagia o ia e lana uo; a ua tuua e ia le mata‘u i Le e ona le malosi uma lava.
15Ua faa‘ole‘ole o‘u uso e pei o le alia, ua mavae atu i latou e pei o tafe o alia.
16Ua suaeleele ia ona o le vaito‘a; ua lilo ai le kiona.
17O ona po e maui ai, e mamate ai lava; pe a velasia, ona pe ai lea i mea sa i ai.
18Ua tuua e malaga lo latou ala ua afe, ua o ae i le vao, ona fano ai lea o i latou.
19Na vaavaai atu malaga a sa Temā, na faamoemoe i ai malaga a Seepa.
20Na masiasi i latou, auā na latou faatuatua i ai; na oo atu i ai, ona latou fememeai ai lea.
21Auā ua avea nei outou e pei o ia mea; ua vaavaai mai outou i lo‘u malaia, ma outou fefefe ai.
22Pe na ou fai atu ea, Ia outou aumaia se mea ia te au? Pe aumai ia se mea alofa ia te au ai a outou oloa? Pe,
23Laveai mai ia ia te au ai le lima o le ua ita mai? Pe, Faaola mai ia outou ia te au ai lima o e ua faasaua?
24Ina a‘oa‘o mai ia outou ia te au, ona ou faalologo ai lea; ia outou faasino mai foi ia te au se mea ua ou sese ai.
25E matuā maamaai upu tonu. A e peitai se a se mea ua faatonuina i la outou aoaiga?
26Po ua outou manatu ea e aoaiina o upu? O upu a le ua totoai e tusa ia ma le matagi.
27Ua outou feosofi mai i le ua mātuaoti, ua outou elia foi le lua mo la outou uo.
28A o lenei, ia outou finagalo e silasila mai ia te au; ona outou silafia lea pe afai ou te tala pepelo.
29Ina foi mai ia o outou, aua ne‘i i ai se amio leaga; ina toe foi mai ia o outou, ua i ai i lenei mea la‘u amiotonu.
30Po ua i ai ea se agasala i lo‘u laulaufaiva? Pe le iloga ea i lo‘u gutu le mea leaga?
Who We AreWhat We EelieveWhat We Do
2025 by iamachristian.org,Inc All rights reserved.
