1O le tasi tagata Peniamina, o lona igoa o Kiso le atalii o Avielu, o le atalii o Seroro, o le atalii ia o Pekuro, o le atalii ia o Afia, o le atalii o le tasi tagata o Iemina; o le tagata mauoa tele.
2Sa ia te ia le atalii e igoa ia Saulo, o le taulealea aulelei, e leai se tagata o le fanauga a Isaraelu e sili ona aulelei ia te ia; e gata ifo i ona tau‘au le maualuga o le nuu uma.
3Ua le iloa asini a Kiso le tamā o Saulo; ona fai mai lea o Kiso i lona atalii o Saulo, Ina o ia oulua ma se tasi taulealea, tulai ia, ma alu e saili asini.
4Ona ui atu lea o i laua i le mauga o Efaraima, ua ui atu foi i le nuu o Salisa, a e lei maua; ona la ui atu lea i le nuu o Saali, ua leai lava; ua ui atu i le nuu o Iemina, ua la le maua lava.
5Ua oo i laua i le nuu o Sufi, ona fai atu lea o Saulo i lana auauna na la o ma ia, Sau ia, ina ta foi atu, ina ne‘i tuu e lo‘u tamā lona manatu i asini, a e atuatuvale ona o i taua.
6A ua fai mai o ia ia te ia, Faauta mai ea, o loo i le aai nei le tagata o le Atua, o le tagata e ta‘uleleia, e matuā taunuu lava ana upu uma; ina ta o ia i ai, atonu na te ta‘u mai ia te i taua so ta ala ta te ui atu ai.
7Ua fai atu Saulo i lana auauna, Faauta, a ta o i ai, se a sa ta mea e avatu i le alii? Auā ua uma areto nai la ta ato; e leai se mea alofa e avatu ai i le tagata o le Atua; se a ea se mea ua ia te i taua?
8Ua toe tali mai le auauna ia Saulo, ua faapea mai, Faauta, ua i lo‘u lima lona vaefa o le sekeli ario ou te avatu ai i le tagata o le Atua, ina ia ta‘u mai ai ia te i taua lo ta ala.
9Sa faapea i Isaraelu anamua le upu a le tagata e alu e fesili i le Atua, O mai ia, ina tatou o i le tagata vaai, auā o le perofeta i nei ona po, sa ta‘ua o ia anamua o le tagata vaai.
10Ua fai atu Saulo i lana auauna, Ua lelei lau upu; sau ia, ina ta o. Ona la o lea i le aai o i ai le tagata o le Atua.
11Ua o ae i laua i le aega o le aai, ona latou fetaiai lea ma teine, o loo o i latou e utu vai; ua la fai atu ia te i latou, O i ai ea le tagata vaai i le mea nei?
12Ona latou tali mai lea ia te i laua, ua faapea mai, O loo i ai lava, faauta, o loo i ou luma; o lenei, ia vave ia, auā na sau o ia i le aso nei i le aai, auā o le taulaga a le nuu e fai i le asō i le mea maualuga.
13A oulua oo i le aai, ona oulua maua loa lea o ia, a o lei alu ae i le mea maualuga e ‘ai ai; auā e le aai le nuu seia alu atu o ia, auā o ia na te fai le faafetai i le taulaga, a uma lea, ona aai lea o e ua togia; o ae ia, auā lua te maua atu ia te ia i le asō.
14Ona o ae lea o i laua i le aai; o loo o atu i totonu o le aai, faauta foi, o loo sau Samuelu ua fetaiai o ia ma i laua i lona alu ae i le mea maualuga.
15Na ta‘u atu e Ieova i taliga o Samuelu i le aso na tuaoi ma le na alu atu ai Saulo, ua faapea,
16E faapenei le itu aso taeao ou te auina atu ai ia te oe le tagata mai le nuu o Peniamina, e te faauu ia te ia e fai mai alii o lo‘u nuu o Isaraelu; na te faaola foi i lo‘u nuu nai lima o Filisitia; auā ua ou vaai atu i lo‘u nuu, ina ua oo mai ia te au lo latou alalaga.
17Ua iloa mai Saulo e Samuelu, ona ta‘u atu lea e Ieova ia te ia, Faauta, o le tagata lena na ou fai atu ai ia te oe, e pule o ia i lo‘u nuu.
18Ua soso atu Saulo ia Samuelu i totonu o le faitotoa, ua fai atu ai, Se‘i e faasino mai ia te au, po o fea le fale o le tagata vaai.
19Ua tali mai Samuelu ia Saulo, ua faapea mai, O a‘u nei le tagata vaai; muamua ae ia i o‘u luma i le mea maualaga, tatou te aai ma oulua i le aso nei; a taeao, ou te tuuina atu ai ia te oe e te alu, ma ou ta‘u atu ia te oe mea uma ua i lou loto;
20a o au asini na le iloa, o le po tolu lenei, aua e te manatu i ai, auā ua maua; o loo ua ia te ai ea le manao uma o Isaraelu? E le ua ia te oe ea ma le aiga uma o lou tama?
21Ona tali atu ai lea o Saulo, ua faapea, E le o a‘u ea le sa Peniaminā, o le itu aiga aupito itiiti i Isaraelu, o lo‘u aiga foi ua topito ona faatauvaa i aiga uma o le itu aiga o Peniamina? O le a le mea e te fetalai mai ai upu faapena ia te au?
22Ua ave o Samuelu ia Saulo ma lana auauna, ua latou o ma ia i le mea e aai ai, ua ia tuu atu ia te i laua le mea e sili e nonofo ai e na togia, o i latou ia pe atoa le toatolugafulu o tagata.
23Ona fai atu lea o Samuelu i le fai umu, Au mai ia le tufaaga na ou tuu atu ia te oe, na ou fai atu ai foi, ia teu ai lava e oe.
24Ona avae lea e le fai umu le alagālima ma mea ua i ai, ua laulau atu ai i luma o Saulo. Ua fai mai Samuelu, Faauta i le mea ua toe, ina tuu ia i ou luma, ma e taumafa ai; auā ua teua ma oe talu ina ou fai atu, ua ou togia le nuu. Ua la aai faatasi o Saulo ma Samuelu i lea aso.
25Ua latou o ifo i le aai ai le mea maualuga; ona la tautala lea o ia ma Saulo i luga o le fale
26Ua latou ala i le vave ao, ona oo lea i le malama ae o le taeao, ua valaau Samuelu ia Saulo e alu i luga o le fale, ua faapea mai, Tulai ia, ou te tuu atu ia te oe e alu. Ua tulai Saulo, ona la o lea i fafo, o ia ma Samuelu.
27Ua la o ifo i le pito aai, ona fai mai lea o Samuelu ia Saulo, Fai atu i le auauna ia muamua atu ia i o ta luma, (ona alu ai lea o ia). A o oe, se‘i e tu mai nei, seia ou logologo atu ia te oe le afioga a le Atua.
Who We AreWhat We EelieveWhat We Do
2025 by iamachristian.org,Inc All rights reserved.
