1Ieova e, ia e manatu ia Tavita i ona puapuaga uma lava;
2o le na tauto ia Ieova, na tuuautapu i lē Malosi o Iakopo;
3sa faapea, E moni, ou te le alu i le fale ie o lo‘u fale, pe alu ae i lo‘u moega, o le mea e moe ai;
4ou te le mafai ona mou o‘u mata, pe matămoe o‘u laumata,
5seia ou maua se mea e afio ai Ieova, o le afioaga mo lē Malosi o Iakopo.
6Faauta, na tatou faalogo i ai i Efarata; na tatou maua i fanua o i le vao.
7Tatou te o lava i ona afioaga; tatou te ifo atu i luma o le mea e tu ai ona aao.
8Ieova e, ia e tulai atu i lou malologa, o oe ma le atolaau o lou malosi.
9Ia oofu au ositaulaga i le amiotonu, ma ia alaga fiafia ou tagata amio Atua.
10Aua le ‘alo ou fofoga i le ua e faauuina, ona o lau auauna o Tavita.
11Na tauto Ieova ia Tavita i le faamaoni, e le ‘alo ese ai o ia, Ou te faanofoina i lou nofoālii so le fanau a lou tino.
12Afai e tausi au fanau i la‘u feagaiga ma a‘u tulafono ou te a‘oa‘oina ai i latou, ona nonofo lea o la latou fanau i lou nofoālii e faavavau lava.
13Auā ua filifilia Siona e Ieova; ua finagalo lava i ai e fai mona afioaga.
14O lo‘u malologa lenei e faavavau; o le mea nei ou te nofo ai, auā ua ou manao ai.
15Ou te matuā faamanuia ana mea e ‘ai; ou te faamaoona ona tagata matitiva i le areto.
16Ou te faaofuina ana ositaulaga i le olataga; e alalaga foi ma le olioli ona tagata amio Atua.
17Ou te faatupuina ai le nifo mo Tavita; ua ou saunia le lamepa mo le ua ou faauuina.
18Ou te faaofuina o e ita ia te ia i le ma; a e pupula mai lona palealii i luga ia te ia.
Who We AreWhat We EelieveWhat We Do
2025 by iamachristian.org,Inc All rights reserved.
