1 O a‘u o Paulo o le aposetolo, (e le mai tagata, e lei tofia foi e se tagata, a o Iesu Keriso, ma le Atua le Tamā, o le na toe faatuina mai o ia i e ua oti,)
2atoa ma le au uso uma lava o e ua ia te a‘u o la matou tusi lenei i ekalesia i Kalatia.
3Ia ia te outou le alofa tunoa ma le manuia mai le Atua le Tamā, ma lo tatou Alii o Iesu Keriso,
4o le na foaiina mai o ia e ia ona o a tatou agasala, ina ia laveai mai o ia ia i tatou ai le olaga leaga ua i ai nei, e tusa ma le finagalo o le Atua, o lo tatou lava Tamā.
5Ia ia te ia le viiga e faavavau faavavau lava. Amene.
6Ua ou ofo ina ua faapea ona vave liliueseina o outou i le na valaauina outou i le alofa tunoa o Keriso a e faasaga i le tala lelei e ese;
7e le se tasi tala lelei foi lea, a o isi tagata ua faaatuatuvale ia te outou, ma fia faaliliueseina le tala lelei a Keriso.
8A e peitai e ui lava ina tala‘iina e i matou, po o se agelu mai le lagi, ia te outou se tala lelei e ese i lea na tala‘iina atu ai e i matou ia te outou, ia anatema ia.
9Pei ona matou muai fai atu, ou te toe fai atu ai nei foi, Afai e tala‘iina atu e se isi ia te outou se tala lelei e ese i lea na outou talia, ia anatema ia.
10Auā, ou te faaaviavi ea i ona po nei i tagata, po o le Atua; Ou te saili ea ina ia ou faafiafia i tagata? Auā afai ana ou faafiafia pea i tagata, po ua le fai a‘u ma auauna a Keriso.
11Le au uso e, ou te faailoa atu ia te outou, e le faatatauina i tagata le tala lelei sa tala‘iina atu e a‘u;
12auā e lei maua lea e a‘u mai se tagata, e lei a‘oa‘oina ai foi a‘u, ua na o le faaaliga a Iesu Keriso na ou maua ai.
13Auā ua outou faalogo i la‘u amioga anamua ina ou i le lotu a Iutaia, sa ou matuā saua lava i le ekalesia a le Atua, ma faatauga i ai.
14E sili foi lo‘u alualu i le lotu a Iutaia i nisi e toatele o lo‘u nuu na matou tupulaga faatasi, ma a‘u matuā naunau i uputuu a o‘u tamā.
15A o le Atua o le na filifilia a‘u talu ina fanau mai o a‘u, ma na valaauina a‘u i lona alofa tunoa, na finagalo o ia,
16ina ia faaali mai lona Alo i totonu ia te au, ina ia ou folafolaina atu i nuu ese le tala lelei ia te ia, ona ou le filifili lea ma tagata,
17ou te lei alu ae loa foi i Ierusalema i e na muai aposetolo ia te au, a e peitai na ou alu i Arapi, ona ou toe foi lea i Tamaseko.
18Na mavae tausaga e tolu, ona ou alu ae lea i Ierusalema ina ia ma feiloai ma Peteru, ua po sefulu ma le lima o ma nonofo ai;
19a e ma te lei feiloai ma se tasi o le au aposetolo, ua na o Iakopo le uso o le Alii.
20O mea foi ou te tusi atu ai nei ia te outou, faauta mai ia, ou te fai atu i luma o le Atua, ou te le pepelo lava.
21Mulimuli ane ona ou alu atu lea i nuu o Suria ma Kilikia;
22sa le iloa o‘u mata e ekalesia i Iutaia o e ua ia Keriso;
23ua na ona latou faalogo, O le na faasaua anamua ia te i tatou, o loo folafola atu e ia i nei ona po le tala lelei o le faatuatua sa na faataugaina anamua;
24ona latou vivii ai lea i le Atua ona o a‘u.
Who We AreWhat We EelieveWhat We Do
2025 by iamachristian.org,Inc All rights reserved.
