1O le amataga o le nofoaiga a Ioakima le atalii a Iosia, le tupu o Iuta, na oo mai ai lenei afioga mai ia Ieova, ua faapea mai,
2O loo faapea ona fetalai mai o Ieova, Ia e tu atu i le lotoā o le fale o Ieova, ma fai atu i aai uma o Iuta, o e o mai e tapuai i le fale o Ieova, upu uma ou te poloai atu ai ia te oe e fai atu ia te i latou, aua lava le tuua se upu;
3atonu pe latou te faalogo ai, ma latou taitasi ma liliu ese i lona ala leaga, ina ia ou salamo i le malaia ua ou manatu e faaoo ia te i latou, ona o le leaga o a latou amioga.
4E te fai atu foi ia te i latou, O loo faapea ona fetalai mai o Ieova, Afai tou te le faalogo mai ia te au, ma le savavali e tusa ma la‘u tulafono ua ou tuuina i o outou luma,
5e le faalogo i upu a a‘u auauna le au perofeta, na aauina e a‘u ia te outou; na ou ala aauina i latou, a ua outou le faalogo mai;
6ona ou faia lea o lenei fale ia pei o Sailo, ou te faia foi lenei aai ma faafanoga i atu nuu uma o le lalolagi.
7Ua faalogo le au faitaulaga, ma perofeta, ma le nuu uma, ia Ieremia, o loo fai atu ia upu i le fale o Ieova.
8Ua uma ona fai atu e Ieremia o mea uma na poloai mai ai Ieova na te fai atu i le nuu uma, ona pue atu ai lea ia te ia e le au faitaulaga, ma perofeta, ma le nuu uma, ua faapea atu, E oti lava oe.
9Se a ea le mea ua e vavalo mai ai i le suafa o Ieova, ua faapea mai, E avea lenei fale e pei o Sailo, o lenei aai foi e faatafunaina ia, e leai se nofo ai? Ua faapotopotoina le nuu uma ia Ieremia i le fale o Ieova.
10Ua faalogo alii o Iuta i ia mea, ona latou o ae ai lea mai le fale o le tupu, i le fale o Ieova, ma latou nonofo i le mea e ui ai i le faitotoa fou o le fale o Ieova;
11ona fai atu ai lea o faitaulaga ma perofeta i alii ma le nuu uma, ua faapea atu, E tatau ona oti o lenei tagata, auā ua na vavalo i mea leaga e oo i lenei aai, e pei ona faafofoga i ai o outou.
12Ona fai atu ai lea o Ieremia i alii uma ma le nuu uma, ua faapea atu, Ua auina mai a‘u e Ieova e vavalo i lenei fale ma lenei aai i upu uma ua outou faalogo i ai.
13O lenei, ia outou sauni lelei o outou ala ma a outou amioga, ma ia outou faalogo i le suifofoga o Ieova lo outou Atua; ona salamo ai lea o Ieova i le malaia na ia fetalaia mai e oo ia te outou.
14A o a‘u nei, faauta, ua i o outou lima a‘u; ia outou faia ia te au e pei ona lelei ma tonu ia te outou,
15tau ina ia outou matuā iloa, afai tou te fasioti ia te au, ona outou faaee ai lea o le toto o le tagata ua le sala i luga ia te outou, atoa ma lenei aai, ma e o nonofo ai; auā e moni lava, ua auina mai a‘u e Ieova ia te outou e fai atu ia upu uma i o outou luma.
16Ona fai atu ai lea o alii ma le nuu uma i faitaulaga ma perofeta, E le tatau ona oti o lenei tagata, auā ua tautala mai o ia ia te i tatou i le suafa o Ieova lo tatou Atua.
17Ona tulai mai ai lea o isi tagata, o toeaina o le nuu, ma latou fai atu i le faapotopotoga uma o le nuu, ua faapea atu,
18Na vavalo mai Mika le Morese, i ona po o Esekia le tupu o Iuta, ua na fai mai foi i le nuu uma o Iuta, ua faapea mai, O loo faapea ona fetalai mai o Ieova o ‘au, E fai Siona ma fanua e suatia, e fai foi Ierusalema ma faupuegāmaa, o le mauga foi o i ai le fale, e fai lea ma mea maualuluga i le vao matua.
19Pe na fasiotia lava ea o ia e Esekia le tupu o Iuta ma Iuta uma? Na le mata‘u ea o ia ia Ieova, ma aioi atu i luma o Ieova; ona salamo ai lea o Ieova i le malaia na ia fetalaia mai ia te i latou? A faapea, ona agasala tele ai lea o i tatou i o tatou agaga.
20Sa i ai foi le tasi tagata na vavalo mai i le suafa o Ieova, o Uria, le atalii o Semaia, mai Kiriata-iarima, na vavalo mai o ia i mea leaga e oo i lenei aai, ma lenei nuu e pei o upu uma a Ieremia;
21na faafofoga i ana upu o Ioakima le tupu, ma toa uma sa ia te ia, ma alii uma, ona saili ai lea le tupu e fasioti ia te ia; a ua faalogo i ai Uria, ona mata‘u ai lea o ia, ua sola, ma alu atu i Aikupito.
22Ona aauina atu lea e Ioakima le tupu nisi tagata i Aikupito, o Elenatana le atalii o Akepora, ma nisi tagata faatasi ma ia i Aikupito.
23Na latou aumaia Uria mai Aikupito, ma latou au mai ia te ia i le tupu o Ioakima; ona ia fasi lea ia te ia i le pelu, ma na tuuina atu lona tino ua oti i tuugamau o tagatānuu.
24A ua fesoasoani Aikamo le atalii o Safana ia Ieremia, ina ia le tuuina atu o ia i lima o le nuu e fasioti ia te ia.
Who We AreWhat We EelieveWhat We Do
2025 by iamachristian.org,Inc All rights reserved.
