1Ona fai ane lea o Aitofele ia Apisaloma, So‘u filifilia tagata e sefulu afe ma afe e lua, ma a‘u tulai atu, ma tuliloa ia Tavita i le po nanei;
2ona ou oo atu lea ia te ia manū o vaivai ma lē lavā o ia, ma ou faamata‘u ia te ia; ona sosola ai lea o le nuu uma ua ia te ia, ona ou fasia lea na o le tupu lava.
3Ona au faafoisia mai lea o le nuu uma ia te oe; o le tagata o loo ē sailia e peiseai ua foi uma mai ai; o le nuu uma e filemu i latou.
4Ua tonu lava le upu i le manatu o Apisaloma, ma manatu o toeaina uma o Isaraelu.
5Ua fai ane Apisaloma, Se‘i valaau foi ia Usai le Araki, tatou te faalogologo pe se a sana fetalaiga.
6Ona alu ane lea o Usai ia Apisaloma, ua fai mai Apisaloma ia te ia, ua faapea, Ua faapea mai le fetalaiga a Aitofele; pe tatou te faia ea lana mea? A leai, fetalai mai ia oe.
7Ua fai atu Usai ia Apisaloma, E le lelei le pule na pule ai Aitofele i lenei mea.
8Ua fai atu foi Usai, Ua e silafia lava lou tamā ma ona tagata, o toa i latou; o loo tiga o latou loto, pei o le urosa i le vao ua avea lana toloai; o lou tamā foi o le tagata tau o ia, e le moe o ia faatasi ma le nuu;
9faauta, o loo lafi nei o ia i se tasi lua, po o se tasi mea; a oo ina fāsia ni o latou i le amataga, ona faapea ane ai lea o i latou o e faalogo i le tala, Ua to le fasi o le nuu ua mulimuli ia Apisaloma;
10o le tagata malosi foi, o lona loto ua pei o le loto o le leona, e liu suāvai o ia, auā ua iloa e Isaraelu uma, o le toa lava lou tamā, o tagata malolosi foi i latou o loo ia te ia.
11O lenei, o lo‘u nei manatu, ia matuā faapotopotoina ia te oe Isaraelu uma lava, e pau mai i Tanu e pau mai i Peresepa, e pei o le oneone o le sami ona toatele; ma ia e afio atu lava oe i le taua.
12Ona tatou oo atu lea ia te ia i se tasi mea e maua mai ai o ia, tatou te oo atu ia te ia, o pei ona totō ifo o le sau i le eleele; ona le faasaoina ai lea o se toatasi, o ia ma tagata uma o loo ia te ia.
13A e afai ua oo atu ia i se aai, ona avatua lea e Isaraelu uma i lea aai o maea, tatou te tosina i le alia, seia oo ina le maua ai lava sina maa.
14Ona fai ane lea o Apisaloma ma tagata uma o Isaraelu, E sili ona lelei o le pule a Usai le Araki i le pule a Aitofele; auā ua finagalo Ieova e faaleaogaina le pule lelei a Aitofele, ina ia faaoo e Ieova le malaia ia Apisaloma.
15Ona fai atu lea o Usai ia Satoka ma Aviata o faitaulaga, Ua faapea ona pule o Aitofele ia Apisaloma ma toeaina o Isaraelu, ma ua faapea la‘u pule.
16O lenei, ia aau faataalise atu nisi, ma ta‘u atu ai ia Tavita, ia faapea, Aua le aoina oe i le eleele laugatasi i le vao; a ia vave ona e alu atu, ne‘i faaumatia le tupu, ma le nuu uma o loo ia te ia.
17Sa nonofo Ionatana ma Aimaasu i Enerokelu, ua alu atu ai le auauna fafine e ta‘u atu ia te i laua; ona la o atu lea e ta‘u atu ai i le tupu o Tavita; auā e le mafai ona la faailoa atu o i laua i le aai.
18A ua iloa i laua e le tasi taulealea, ona ia ta‘u atu lea ia Apisaloma; a ua la vave atu, ma la o i le fale o le tagata Pauri, sa ia te ia le vaieli i lona lotoā, ua la o ifo ai.
19Ona avatu lea e le fafine, ma na fofola se mea e ufiufi a‘i le gutu o le vaieli, ona folafola lea i ona luga o saito ua oloina; ua le iloa e se tasi le togafiti.
20Ona oo atu lea o auauna a Apisaloma i le fafine i le fale, ua latou fai mai, O i fea Aimaasu ma Ionatana? Ua fai mai le fafine ia te i latou, Ua sopoia atu i laua i le vaitafe. Ua latou sailia, a ua le maua, ona latou foi lea i Ierusalema.
21Ua oo ina ua ō i latou, ona o ae lea o i laua ai le vaieli; ua la o ma ta‘u ane i le tupu o Tavita; ua la faapea mai foi ia Tavita, Tulai ia, ma outou vave atu i le itu vai, auā na faapea ona pule o Aitofele ia te outou.
22Ona tulai lea o Tavita ma le nuu uma sa ia te ia, ua latou sopoia atu Ioritana. Ua oo ina malama ae le taeao, ua le toe ai lava se tasi ua le sopoia atu Ioritana.
23Ua iloa e Aitofele ua le faia lana pule, ona ia faanofoaina lea o lana asini, ua tulai, ma alu atu i lona fale i lona lava nuu; na tofi e ia ana mea i lona aiga, ona noa ai lea o ia ia te ia, ua oti ai; ona tanu ai lea o ia i le tuugamau o lona tamā.
24Ua oo atu Tavita i Maanaima; ua sopoia atu foi Apisaloma i Ioritana, o ia atoa ma tagata Isaraelu uma faatasi ma ia.
25Ona tofia lea o Amase e Apisaloma ia pule i ‘au e sui a‘i Ioapo; o Amase foi o le atalii o le tasi tagata e igoa ia Ietero, o le sa Isaraelū, o le na alu atu ia Apikaila le afafine o Naasa, le uso o Seruia, le tinā o Ioapo.
26Ua to lauapi Isaraelu ma Apisaloma i le nuu o Kiliata.
27Ua oo atu Tavita i Maanaima, ona avatu lea e Sopi le atalii o Naasa (mai Rapa, o le aai a le fanauga a Amoni), ma Makira le atalii o Amueli mai Lotapara, ma Pasili le Kiliata mai Rokeli,
28o moega, ma ipu, ma ipu omea, ma saito, ma karite, ma falaoa, ma saito tunu, ma fua o fue, ma atasema, ma karite tunu, ma meli,
29ma suāsusu to‘a, ma mamoe, ma suāsusu maaa o povi, na aumaia mā Tavita ma le nuu ua ia te ia, latou te aai ai; auā na latou faapea ane, Ua fia aai le nuu, ma ua vaivai, ma fia inu i le vao.
Who We AreWhat We EelieveWhat We Do
2025 by iamachristian.org,Inc All rights reserved.
