SALAMO, 55 - Samoan Old Version Bible

O LE SALAMO LVI.O le atuatuvale o Tavita, ma lana tatalo i le Atua.Ma le usu pese i nekina. O le salāmo a Tavita e a‘oa‘o ai.

1Le Atua e, ia e faafofoga mai i la‘u tatalo, aua foi e te liliu ese i la‘u aioi atu.

2Ia faafofoga mai ia te au, ma tali mai ia te au; ua ou faanoanoa i lo‘u mafaufau, ma ou uio;

3ona o le leo o le ua ita mai, ona o le saua o lē amio leaga; auā ua latou faaoo mai ia te au le amio leaga, o le ita lava ua latou faasaua mai ai ia te au.

4Ua sapotuvale lo‘u lava loto i totonu ia te au; ua oo mai foi ia te au le mata‘u i le oti.

5Ua oo mai lava ia te au le mata‘u ma le gatete; ua matuā faagateteina a‘u.

6Ona ou faapea lea, E! Ta fia maua apaau e pei o le lupe, ou te lele ese ai lava, i le ou nofo mau ai.

7Faauta, ou te sola mamao atu lava; i le ou nofo ai i le vao. Selā.

8Ou te faataalise ona sola o a‘u, ona o le matagi tetele ma le afā.

9Le Alii e, ia e faaumatia i latou, ia e vaeluaina a latou taupulepulega; auā ua ou iloa le saua ma le misa i le aai.

10Ua la siomia o ia i ona pa i le ao ma le po; ua i totonu lava ia te ia le amio leaga ma le malaia;

11ua i totonu lava ia te ia le amio paaā; e le alu ese lava i lona malae le saua ma le amio pepelo.

12Auā e le o se fai a‘u mona fili na upuleagaina a‘u; ana se ita mai, po ua ou oono ai; e le o lē ita mai ia te au ua faasausili mai ia te au; ana se ita mai, po ua ou lafi ia te ia;

13a o oe lava, o le tagata ta te tutusa ma a‘u; o la‘u uo lava, o le ua ta masani;

14sa fefaamalieai lava a tā tautalaga, sa tā o gatasi ma le vao tagata i le fale o le Atua.

15Ia faafuasei atu lava le oti ia te i latou; ia latou o ifo o ola i seoli; auā ua i ai mea leaga i mea o latou nonofo ai, o i totonu ia i latou lava.

16O a‘u nei, ou te valaau atu i le Atua; o Ieova lava na te faaolaina mai a‘u.

17O le afiafi, ma le taeao, ma le tutonu o le la, ou te tagi ai, ma ou uio; ona faafofoga mai ai lea o ia i lo‘u leo.

18Na ia laveai mai ia te au, ia ou filemu ai i le taua sa ia te au; auā e toatele i latou sa ia te au.

19E faafofoga mai le Atua, na te faatigaina foi i latou; o ia lava lea o loo tietie talu mai le vavau lava. Selā. Auā latou te le āu liliu lava, ma ua latou le matatau i le Atua.

20Ua ia faaoo atu ona lima i e ua nofo lelei ma ia; ua tuumavaega ai o ia.

21O lona gutu ua se suāsusu ua to‘a e molemole, a o i lona loto le taua; e sili le malulu o ana upu i le suāuu, a o pelu ua seia lava ia.

22Ia e tuuina atu ia Ieova o mea e te popole vale ai; o ia lava na te tausia oe; na te le tuuna e faavavau le amiotonu ia faagaeetia.

23A o oe, le Atua e, e te lafoina i lalo i latou i le to e fano ai; o tagata ua totolima ma e pepelo, latou te le oo i le tautuluaga o latou aso; a o a‘u, ou te faatuatua lava ia te oe.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help