1Sa soona alu ane i ai le tagata ulavale, o Sepa lona igoa, o le atalii o Pikeri, o le sa Peniaminā, ua ili e ia le pu, ma fai atu, E le aiā Tavita ia i matou; e le so matou tofi foi le atalii o Iese; Isaraelu e, ia taitasi ma alu i lona fale ie.
2Ona o ae lea o tagata uma o Isaraelu nai ia Tavita, ua mulimuli atu ia Sepa le atalii o Pikeri; a o tagata o Iuta ua pipii pea i latou i lo latou tupu, e fua mai i Ioritana e oo atu i Ierusalema.
3Ona ulu atu lea o Tavita i lona fale i Ierusalema; na ave e le tupu i palake e toasefulu, ua ia tuua e leleo i le fale, ua tuu atu i latou i le fale e tausi ai, ma na fafaga ia i latou, a e lei alu atu o ia ia te i latou; sa i ai ua puipuia i latou, ua oo i le aso na oti ai, ua nofo fua.
4Ona fai atu lea o le tupu ia Amase, Ia e faapotopotoina mai ia te au tagata o Iuta i e tolū, i le e sau ai foi iinei.
5Ona alu atu lea o Amase e faapotopoto ia Iuta, a ua silia aso na atofa ia te ia.
6Ona fai atu lea o Tavita ia Apisai, Anei e sili le leaga e faia le Sepa le atalii o Pikeri ia i tatou, i le leaga na faia e Apisaloma; tou te o, o oe, ma auauna a lou alii, ma outou tuliloa ia te ia, ina ne‘i maua e ia aai e nofo ‘olo, ma sola ese ia te i tatou.
7Ona mulimuli atu lea ia te ia o tagata o Ioapo, ma le au Kereti, ma le au Peleti, ma e fitafita uma lava; ua latou o atu nai Ierusalema e tuliloa ia Sepa le atalii o Pikeri.
8Sa i ai i latou i le maa tele ua i Kipeona, ona sau lea o Amase i o latou luma. Sa fusia le ofu talaloa a Ioapo, sa fusi foi ia te ia lana pelu, ua nonoa i lona sulugatiti i lona faamoega; ua alu ane o ia, ona paū ai lea o le pelu.
9Ua fai atu Ioapo ia Amase, Lo‘u uso e, o ē malolo ea? Ona tago atu lea o le lima taumatau o Ioapo i le ‘ava a Amase e feasogi ma ia.
10A o Amase, ua le manatu o ia i le pelu sa i le lima o Ioapo; ona tutu‘i ai lea e ia ia te ia i le manava, ona masaa ai lea lona gaau i le eleele, ua le tutu‘i faalua ia te ia, ona oti ai lea o ia. Ona tuliloa lea e Ioapo ma Apisai lona uso ia Sepa le atalii o Pikeri.
11Ona tu ai lea i ona luga o le tasi tagata o le au taulelea a Ioapo, ua faapea ane, O ai se ‘au ma Ioapo? O ai foi le ‘au ma Tavita? Ia mulimuli atu o ia ia Ioapo.
12Ua liloia Amase i le toto i le moa o le ala tele; ua vaai atu le tagata ua laulaututū ai o le nuu uma, ona ave ese ai lea e ia ia Amase nai le ala tele i le vao, ma lafo se ofu i ona luga, ina ua iloa e ia ua laulaututū i latou uma ina ua oo i ai.
13Ua uma ona aveesea o ia ai le ala tele ona o atu lea o le nuu uma, ua mulimuli ia Ioapo e tuliloa ia Sepa le atalii o Pikeri.
14Ua ia ui ane i itu aiga uma o Isaraelu ua oo i Apela o Petemaaka foi ma tagata o Pairi uma lava; ua latou faapotopoto foi ma mulimuli atu ia te ia.
15Ona latou o atu lea, ma vagaia o ia i Apela Petemaaka; ua tanu ai le mea mautietie e lata ane i le aai ua tu ai i le utu; o le nuu uma foi sa ia Ioapo ua taulepeti, ina ia lafotuina le pa.
16Ona valaau lea o le tasi fafine poto nai totonu o le aai, Faalogo mai, faalogo mai ia outou; se‘i outou fai atu ia Ioapo, ia faalatalata mai o ia iinei, ma te tautala ma ia.
17Ona faalatalata atu lea o ia ia te ia, ua fai mai le fafine, O oe ea o Ioapo? Ona tali atu lea o ia, O a‘u lenei. Ua fai mai o ia ia te ia Faafofoga mai ia i upu a lau auauna fafine. Ua fai mai o ia, Ou te faalogo atu ai lava.
18Ona fai mai lea o ia, ua faapea, Sa faapea a latou upu anamua, Latou te fesili lava i Apela; ona latou tuu ai lea faapea.
19O a‘u nei o so latou e filemu ma faamaoni i Isaraelu; o loo e saili e fasioti le tasi nuu ma le tasi tinā i Isaraelu; se a le mea e te faaumatia ai le tofi o Ieova?
20Ua tali atu Ioapo, ua faapea atu, Ia mamao, mamao lava lea ia te au ona ou faaumatia, pe faatafunaina.
21E le faapea se mea, a o le tamaloa mai le mauga o Efaraima, o Sepa le atalii o Pikeri lona igoa, ua ia fouvale i le tupu o Tavita; tuu mai ia na o ia lava ona ou alu ese ai lea i le aai. Ua fai mai le fafine ia Ioapo, Faauta, o le a lafo atu lona ulu ia te oe i tuapā.
22Ona alu atu lea o le fafine ma lona poto i le nuu uma; ona latou vavae lea o le ulu o Sepa le atalii o Pikeri, ma lafo atu ia Ioapo; ona ili ai lea e ia o le pu, ona latou taapeape ai lea nai le aai, ua taitasi ma alu i lona fale ie, a o Ioapo, ua foi ia i Ierusalema i le tupu.
23Sa pule Ioapo i ‘au uma lava a Isaraelu; a o Penaia le atalii o Ioiata sa pule o ia i le au Kereti ma le au Peleti;
24o Aturamo sa pule o ia i le taulaga, ma Iosefatu le atalii o Ailuta, o le fātua‘iupu o ia;
25o Seva o le tusiupu o ia; o Satoka ma Aviata, o faitaulaga i laua;
26o Ira foi le Iairo, sa fai ma faipule o ia a Tavita.
Who We AreWhat We EelieveWhat We Do
2025 by iamachristian.org,Inc All rights reserved.
