IOANE, 12 - Samoan Old Version Bible

O LE MATAUPU XII.Ua maliu atu Iesu i Ierusalema.

1Ua maliu atu Iesu i Petania, a o toe ono aso i le fai ai le paseka, sa i ai Lasalo na oti, na ia toe faatu ia te ia nai e ua oti.

2Ona sauni ai lea e i latou o le faigaai mā ia i lea mea; na auauna ai foi Mareta; a o Lasalo, o ia o le tasi o e na taooto e aai faatasi ma ia.

3Ona tago ai lea o Maria i le litara o le uu nato tau tele; ua ia uu ai vae o Iesu, ma sōloi ona vae i lona lauulu; ua tumu foi le fale i le manogi o le uu.

4Ona fai ane lea o le tasi o ona soo, o Iuta le atalii o Simona le Sekara, o lē faalata ia te ia,

5Pe se a le mea na le faatau ai lena uu manogi i tenari e tolu selau, ma avatu ai i e matitiva?

6Ua le faapea ane ia, ina ua alofa o ia i e matitiva, a ona o ia o le gaoi, ua ia te ia foi le ete, ma na tauave mea na fafao ai.

7Ona faapea mai ai lea o Iesu, Tuu pea ia ia te ia; ua teu e ia lenei mea mo le aso o le faataimuaga o lo‘u tanuga.

8Auā tou te nonofo pea ma e matitiva, a e tatou te le nonofo pea ma a‘u.

9Ua iloa e le motu o tagata Iutaia e toatele, ua i ai o ia i lea mea; ona o atu ai lea o i latou; e le ona o Iesu lava, a ia latou iloa foi Lasalo, na ia toe faatuina nai e ua oti.

10A ua taupulepule le au ositaulaga sili, e fasioti foi ia Lasalo.

11Auā e toatele Iutaia na o ese ona o ia, ma latou faatuatua ia Iesu.

12O le taeao ua faalogo ai e le motu o tagata ua o mai i le tausamiga, ua maliu mai Iesu i Ierusalema,

13ona ave lea e i latou o lau o pama, ma o mai e faafetaiai ia te ia; ona latou alalaga lea, Osana! Ia manuia lē afio mai i le suafa o le Alii, o le Tupu o Isaraelu.

14Ua maua e Iesu le tamai asini, ona tietie ai lea, faapei ona tusia,

15Aua e te fefe, o oe le tama fafine a Siona; faauta, e afio mai lou Tupu, o loo tietie i le tama i asini.

16Ua le iloa e ona soo ia mea i le fuataiga; a ua oo Iesu i lona mamalu, ona latou manatua lea ua tusia ia mea ia te ia; ua latou faia foi ia mea ia te ia.

17Ona molimau ai lea o le motu o tagata sa latou i ai ma ia, ina ua valaauina e ia o Lasalo nai le tuugamau, ma toe faatu mai ia te ia nai e ua oti.

18O le mea lea ua faafetaiai ai ia te ia le motu o tagata, auā ua latou faalogo atu na ia faia lena faailoga.

19Ona fetautalatala‘i ai lea o le au faresaio, Tou te le iloa ea, ua le aoga sa outou mea e fai? Faauta, ua mulimuli atu le lalolagi ia te ia.

20Sa i ai isi Eleni faatasi ma e na o ae i le tausamiga e tapuai.

21O i latou ia ua o ane ia Filipo, o le Petesaita i Kalilaia ia, ua latou ole atu ia te ia, ua faapea atu, Le alii e, matou te fia feiloai ma Iesu.

22Ona alu ane lea o Filipo, ua ta‘u atu ia Aneterea; ona ta‘u atu ai lea e Aneterea ma Filipo ia Iesu.

23Ua tali atu Iesu ia te i laua, ua faapea atu, Ua oo mai ona po e oo ai le Atalii o le tagata i lona mamalu.

24E moni, e moni, ou te fai atu ia te outou, Afai a e le paū le fua o le saito i le eleele ma pala ai, e tumau pea o le mea e tasi; a e afai e pala, ona fua mai ai lea o fua e tele.

25O lē faapelepele i lona ola, e faamāumau e ia i ai; a o lē ‘ino‘ino i lona ola i lenei lalolagi, e leoleo ai e ia e oo i le ola faavavau.

26A fia auauna mai se tasi ia te au, ia mulimuli mai o ia ia te au; o le mea ou te i ai a‘u, e i ai foi la‘u auauna; pe a auauna mai foi se tasi ia te au, ona viia lea o ia e le Tamā.

27O loo ātu ne‘i lo‘u loto, pe se a foi se mea ou te fai atu? Lo‘u Tamā e, faaola mai ia te au ai lenei itu aso; a o le mea lava lea na ou oo mai ai i lenei itu aso.

28Lo‘u Tamā e, ia e tuuina atu le mamalu i lou suafa. Ona oo mai ai lea o le siufofoga mai le lagi, Ua ou tuuina atu le mamalu, ou te toe tuuina atu foi i ai le mamalu.

29Ona faapea ai lea o le motu o tagata sa tutū ma faalogologo i ai, O loo ua faititili; a ua fai mai nisi, Ua fetalai se agelu ia te ia.

30Ona fetalai atu lea o Iesu, ua faapea atu, E lei oo mai lenei siufofoga ona o a‘u, a ona o outou.

31O loo faasalaina nei lenei lalolagi; e tulia nei le alii o lenei lalolagi.

32O a‘u foi, afai e siitia au ai le eleele, ou te tosina uma mai tagata ia te au.

33Ua fetalai ane ia lea upu e faailoa ai le uiga o lona maliu o le a maliu ai o ia.

34Ua tali mai le motu o tagata ia te ia, Ua matou faalogo i le tulafono, e tumau pea le Keriso e faavavau; pe faapefea foi ona e fai mai, E tatau ona siitia i luga o le Atalii o le tagata? O ai ea lenei Atalii o le tagata?

35Ona fetalai atu lea o Iesu ia te i latou, E toe itiiti nai aso e i ai ia te outou le malamalama; savavali ia manū o ia te outou le malamalama, ne‘i maua outou e le pogisa; o lē savali i le pogisa e le iloa e ia le mea e alu i ai.

36Ia outou talia le malamalama, manū o ia te outou le malamalama, ina ia avea o outou ma fanau a le malamalama. Ua fetalai atu ia mea e Iesu, ona maliu ane lea o ia ua lafi ia i latou.

37Ua ia faia faailoga e tele lava i o latou luma, a e lei talitonu i latou ia te ia,

38ina ia taunuu ai le upu a Isaia le perofeta, ua ia faapea mai, Le Alii e, o ai ea ua talitonu i la matou upu e taulogologo atu? ua faaalia foi ia te ai le aao o le Alii?

39O lenei, e le mafai e i latou ona talitonu, auā ua toe faapea mai Isaia,

40Ua ia faatauasoina o latou mata, ma na faamaaaina o latou loto, ne‘i vaai o latou mata, ma lagona o latou loto, ne‘i liliuina foi i latou, ma a‘u faamaloloina i latou.

41Na fai mai ia upu e Isaia ina ua vaai atu o ia i lona mamalu, ma tautala mai ia te ia.

42A e peitai e toatele alii ua talitonu ia te ia; a e le‘i ta‘u atu ai, ona o le au faresaio, ne‘i tulia i latou i le sunako.

43Auā ua sili lo latou manao i le viiga mai tagata, i le viiga mai le Atua.

44Ua alaga atu Iesu, ua fetalai atu, O lē faatuatua mai ia te au, e le faatuatua mai o ia ia te au, a e ia te ia ua auina mai a‘u.

45O lē vaai mai foi ia te au, e vaai atu o ia ia te ia ua auina mai a‘u.

46Ua ou sau o le malamalama i le lalolagi, ina ia le tumau pea i le pouliuli se tasi e faatuatua mai ia te au.

47Afai foi e faalogologo se tasi i a‘u upu, a e le talitonu i ai, ou te le faasala ia te ia; auā ou te lei sau e faasala i le lalolagi, a ia ou faaolaina le lalolagi.

48O lē faaleaoga ia te au, ma ua le talia a‘u upu, o ia te ia le tasi na te faasalaina ia; o le upu ua ou tautala atu ai, e faasala lea ia te ia i le aso gataaga.

49Auā ou te le tautala fua na o a‘u; a o le Tamā ua auina mai a‘u, na ia tuu mai le poloaiga ia te au i mea ou te fai atu ai, ma mea ou te tautala atu ai.

50Ua ou iloa foi o lana poloaiga o le ola faavavau lea. O lenei, o mea ou te tautala atu ai, faapei ona fetalai mai ai le Tamā ia te au, e faapea ona ou tautala atu ai.