1O lenei, le au pele e, ona ua ia te i tatou o ia upu ua folafolaina mai, ia tatou faamamā ia te i tatou i mea uma e leaga ai le tino atoa ma le agaga, ia faaatoatoina lo outou faapaiaina i le mata‘u i le Atua.
2Ia outou tali lelei mai ia te i matou; matou te lei agaleaga atu i se tasi, matou te lei faaleagaina se tasi, matou te lei olegia se tasi.
3Ou te le faapea atu e aoai ia te outou; auā ua uma ona ou muai fai atu, o loo i o matou loto outou, tatou te oti faatasi ma ola faatasi.
4E tele lo‘u faamalosi atu ia te outou, ua tele lo‘u mitamita ona o outou; ua faatumuina a‘u i le mafanafana, ou te matuā olioli tele lava i lo matou puapuaga uma.
5Auā na matou o mai i Maketonia sa leai se mapu i o matou tino, a e peitai sa puapuagatia i matou i mea uma, o taua i fafo, o i totonu o mata‘u.
6A o le Atua o le na te faamafanafanaina e ua faamaulaloina, na ia faamafanafana mai ia te i matou i le oo mai o Tito;
7e le na o lona oo mai, a e peitai o le faamafanafanaga foi na faamafanafanaina ai o ia e outou, i lona ta‘u mai ia te i matou lo outou naunau tele, lo outou tagi tele, lo outou maelega mai ia te au; o le mea lea sa atili ai lo‘u olioli.
8Auā afai na ou faatiga ia te outou i le tusi, ou te le salamo ai, e ui lava ina ou salamo ai; auā ua ou iloa sa faatigaina outou i lena tusi, na o sina itu aso.
9O lenei, ou te olioli, e le ona ua outou tiga, a ona ua iu lo outou tiga i le salamo; auā na faatigaina outou e tusa i le Atua, ina ne‘i leaga outou ia i matou i se mea e tasi.
10Auā o le tiga e tusa i le Atua e tupu ai le salamo e oo i le ola e le toe salamo ai; a o le tiga faalelalolagi e tupu ai le oti.
11Faauta foi i lenei lava mea, na tiga outou e tusa i le Atua, ua tele lava le filigā na tupu ai ia te outou, i le ma le faatonu, i le ma le loto tiga, i le ma le mata‘u, i le ma le naunau tele mai, i le ma le maelega, i le ma le taui atu. Ua uma ona faailoa outou e outou ua outou mamā i lena mea.
12O lenei, e ui lava ina ou tusi atu ia te outou, na ou le faia ona o ia na agaleaga, e le ona o ia foi na agaleagaina, a e peitai ina ia faaali atu ia te outou lo matou filigā ona o outou, i luma o le Atua.
13O le mea lea na faamafanafanaina ai i matou i le faamafanafanaina o outou; sa matuā tele lo matou olioli, ua atili ai ona o le olioli o Tito, auā sa to‘afilemu lona loto ia te outou uma.
14Auā afai na ou mitamita ia te ia i se mea ona o outou, ou te le mā ai; a e pei ona moni o upu uma na matou tautala atu ai ia te outou, e faapea foi lo matou mitamita ia Tito, ua iu ina faamaoni lea,
15ua atili ai ona mutimuti vale o lona alofa ia te outou, i lona manatua o le anaana o outou uma, ina ua talia o ia e outou ma le mata‘u ma le gatete.
16O lea ou te olioli ai ina ua ou faatuatua ia te outou i mea uma.
Who We AreWhat We EelieveWhat We Do
2025 by iamachristian.org,Inc All rights reserved.
