1-2Ia outou faapea atu i o outou uso, Ama e; ia faapea atu foi i o outou tuafafine, Ruama e. Ia outou finau atu i lo outou tinā, ina finafinau atu ia; auā e le o la‘u avā ia, e le o lana tane foi a‘u; ina lafoai ia e ia ana faitaaga ai ia te ia, ma ana mulilua foi ai le va o ona susu;
3ne‘i ou talaeseina ona ofu, ma tuu atu ia te ia pei ona i ai i le aso na fanau mai ai o ia, e avea foi o ia pei o se vao, ma avea foi pei o se nuu naumati, ma ou faaumatia o ia i le fia inu.
4Ou te le alofa atu i lana fanau, auā o le fanau a le faitaaga i latou.
5Auā ua faitaaga lo latou tinā, ua agavale lava le na fanaua i latou; auā na ia faapea mai, Ou te mulimuli atu i e o mananao ia te au, o e o au mai a‘u mea e a‘i, ma o‘u vai, ma a‘u fulufulu mamoe, ma a‘u lino, ma a‘u suāuu, ma a‘u mea e inu.
6O le mea lea, faauta, ou te pupuni ai lou ala i laau tuitui, ou te siosioina foi o ia i le pa, ia le iloa e ia ona ala.
7E mulimuli atu lava o ia i e o mananao ia te ia, a e le maua atu i latou e ia; e sailiili o ia ia te i latou, a e le iloa; ona faapea mai ai lea o ia, Ou te alu, ou te toe foi i la‘u tane muamua, auā sa sili lo‘u manuia anamua, i lo‘u manuia i nei ona po.
8Auā na le iloa e ia, o a‘u lava sa foaiina atu ia te ia o saito, ma uaina, ma suāuu; na a‘u faateleina foi ana ario, ma ana auro na latou saunia mo Paala.
9O le mea lea ou te toe foi ai, ma ave ese la‘u saito i ona lava aso, ma la‘u uaina i ona lava po; ou te aveesea foi a‘u fulufulu mamoe, ma a‘u lino, sa tuuina atu e ufiufi a‘i lona le lavalavā.
10O lenei, ou te faaali lana amio ulavale i luma o e o mananao ia te ia, e leai foi se tasi na te laveaiina o ia ai lo‘u lima.
11Ou te faaumatia foi lona fiafia uma lava, o ana tausamiga, ma ona masina faatoa vaaia, ma ona sapati, atoa ma ona nuu uma.
12Ou te faaumatia ona vine, ma ona mati, na ia faapea mai ai, O o‘u taui lava ia na au mai ia te au e i latou ua mananao ia te au; e avea foi i latou ia te au ma vao matua, e ‘aina i latou e manu feai.
13Ua fetalai mai Ieova, Ou te taui atu ia te ia ona o ona po o Paala, na ia faamu ai mea manogi ia te i latou; na ia tifitifi foi ia te ia i ona mama, ma ona teuga, na ia mulimuli atu foi i e na mananao ia te ia, a ua faagalogalo lava ia te au.
14A e peitai a‘u faauta, ou te faaoleole ia te ia, ma ta‘ita‘i ia te ia i le vao, ou te faamafanafana ia te ia.
15Ou te tuuina atu foi ia te ia ana tovine i lea mea, ma le vanu o Akori e fai ma faitotoa e faamoemoe ai; e pese foi o ia i ai, faapei ona fai i ona po ina o teine muli o ia, pei o aso foi na sau ai o ia i le nuu o Aikupito.
16O loo faapea mai Ieova, O le aso lava lea e oo ai ona e faaaigoa ia te au, O Ise; e te le toe faaigoa ia te au, O Paale.
17Auā ou te aveesea i lona gutu o igoa o Paala, e le toe ta‘ua lava i latou i o latou igoa.
18O le aso foi lea matou te osi ai ma i latou le feagaiga ma manu feai, ma manu felelei, ma mea fetolofi i le eleele; ou te gausia foi le aufana ma le pelu, ma le taua ai le nuu, o a‘u e taooto ai i latou ma le filemu.
19Ta te osi sa ta feagaiga ma a‘u e faavavau; ta te osi sa ta feagaiga ma a‘u i le amiotonu, ma le faamasinoga, ma le agalelei, ma le alofa.
20Ta te osi sa ta feagaiga ma a‘u ma le faamaoni; e te iloa foi Ieova.
21O loo faapea mai Ieova, O lea aso, ou te tali atu ai, ou te tali atu i le lagi, o ia foi na te tali atu i le lalolagi.
22E tali atu foi le lalolagi i le saito, ma le uaina, ma le suāuu; o i latou foi latou te tali atu ia Isereelu.
23Ou te totōina o ia i le eleele e fai mo‘u; ou te alofa foi i le sa le alofagia; ou te faapea atu foi i le ua le so‘u nuu, O lo‘u nuu oe; ona latou faapea mai ai lea, O lo matou Atua.
Who We AreWhat We EelieveWhat We Do
2025 by iamachristian.org,Inc All rights reserved.
