ESEKIELU, 8 - Samoan Old Version Bible

O LE MATAUPU VIII.O le tupua e tupu ai le fuā.

1O le ono o tausaga, o lona ono o masina, o lona lima o aso o le masina na ou nofo ai i lo‘u fale, sa nonofo foi toeaina o Iuta i o‘u luma, na oo mai ai le aao o le Alii o Ieova i luga ia te au.

2Ona ou vaai lea, faauta, o le faatusa e tino mai ua pei o le afi; ua tino mai lona sulugatiti e oo i lalo e pei o le afi; ua tino mai foi lona sulugatiti e oo ae i luga ua pei o le pupula o le lagi, e pei o le tino o le ‘apa pupula.

3Na ia tuu mai le faatusa o le lima, ma tago mai ia te au i le fuafuati lauulu o lo‘u ulu; ona siitia lea o a‘u e le Agaga i luga i le va o le lagi ma le lalolagi, ma ua ave ia te au i faaaliga mai le Atua i Ierusalema, i le puipui o le faitotoa aupito i totonu e faasaga i le itu i matu, o le mea e nofo ai le tupua o le fuā, o le na te faatupuina le fuā.

4Faauta foi, sa i ai le pupula o le Atua o Isaraelu, ua tino mai ia e pei ona ou iloa i le fanua laugatasi.

5Ona fetalai mai lea o ia ia te au, Le atalii e o le tagata, ina tepa ae ia i le ala i le itu i matu. Ona ou tepa ae lea i le ala i le itu i matu, faauta foi i le itu i matu, i le faitotoa o le fata faitaulaga, o lena tupua o le fuā i le mea e ui atu ai.

6Ua fetalai mai foi o ia ia te au, Le atalii e o le tagata, ua e iloa ea mea o loo faia e i latou; o mea tetele e inosia o loo faia e le aiga o Isaraelu iinei, ina ia ou faamamao ma lo‘u malumalu? a ia e toe liliu ane e te iloa ai mea e inosia e sili.

7Ua ia au mai foi ia te au i le faitotoa o le lotoā, ona ou vaai lea, faauta, o le pu i pa.

8Ona fai mai lea o ia ia te au, Le atalii e o le tagata, ina eli ia i le pa; ona ou elia lea o le pa, faauta foi, o le faitotoa.

9Ona fetalai mai lea o ia ia te au, Ina ulu atu ia, ina vaai i mea leaga e inosia ua latou faia iinei.

10Ona ou ulu atu ai lea, ona ou vaai lea; faauta foi, o faatusa o mea fetolofi, ma manu vaefa leaga uma, ma tupua uma a le aiga o Isaraelu, ua tusia i le pa ua matuā soo ai lava.

11O loo tutū foi i o latou luma o tagata e toafitugafulu o toeaina o le aiga o Isaraelu, o loo o tu foi Iaasenaia le atalii o Safana i totonu ia i latou; o le tagata ma lana ipu e mu ai mea manogi ua i lona lima, o loo alu ae foi le asuasu tele o mea manogi.

12Ona ia fetalai mai lea ia te au, Le atalii e o le tagata, ua e iloa ea le mea o loo faia e toeaina o le aiga o Isaraelu i le pouliuli, taitoatasi le tagata i potu o ana faatagata? auā ua latou faapea, E le iloa i tatou e Ieova; ua lafoaiina e Ieova le lalolagi.

13Ua ia fetalai mai foi ia te ia, Ia e toe liliu ane e te iloa ai mea e inosia e sili o loo latou o faia.

14Ona ia avea lea o a‘u i le puipui o le faitotoa o le fale o Ieova e fesagai ma le itu i matu; faauta, o loo nonofo ai fafine, o loo fetagisi ona o Tamusa.

15Ona ia fetalai mai lea ia te au, Le atalii e o le tagata, ua e iloa ea lena? ia e toe liliu ane, e te iloa ai mea e inosia e sili i na mea.

16Ona ia avea lea o a‘u i le lotoā tuloto i le fale o Ieova, faauta i le faitotoa o le malumalu o Ieova, i le va o le faapaologa ma le fata faitaulaga, o tagata pe toaluafulu ma le toalima, ua u atu o latou tua i le malumalu o Ieova, a ua uai o latou mata i sasae, o latou ifo atu i le la i sasae.

17Ona fetalai mai lea o ia ia te au, Le atalii e o le tagata, ua e iloa ea lena? se mea māmā ea i le aiga o Iuta ina ua faia o mea e inosia o loo latou o faia iina? auā ua latou faatumuina le nuu i le saua, ua latou toe liliu foi e faaonoono mai ia te au; faauta foi, ua latou avae le la laau i o latou isu.

18O le mea lea ou te taui atu ai ma le ita tele; ou te le faasaoina, ou te le faapelepeleina; e ui ina latou valaau mai ia te au ma le leo tele, ou te le faalogo atu lava ia te i latou.