1Faalogo mai ia ia te au, outou o e tausisi atu i le amiotonu, e ua saili ia Ieova; ina vaavaai ia i le papa na tofitofia mai ai outou, ma le gutu o le lua na elia mai ai outou.
2Ia outou vaavaai ia Aperaamo lo outou tamā, ma Sara o le na fanaua outou; auā na a‘u valaauina o ia a o toatasi, ma ou faamanuia ia te ia, ma faatoateleina o ia.
3Auā e faamafanafanaina Siona e Ieova, e faamafanafanaina ana mea faatafunaina uma lava; na te faia lona fanua lafulafua e pei o Etena, ma lona toafa e pei o le faatoaga a Ieova; e maua ai le fiafia ma le olioli, o le faafetai ma le leo o le pese.
4Faalogo mai ia ia te au lo‘u nuu e; o‘u tagata e uai mai ia o outou taliga ia te au; auā e alu atu le tulafono ia te au, ou te faatumauina foi la‘u faamasinoga e fai ma malamalama o nuu.
5Ua lata mai le amiotonu mai ia te au, ua alu atu la‘u faaolataga; o‘u lima foi e faamasinoina ai nuu; e faatalitali mai ia te au o nuu tu matafaga, latou te faamoemoe foi i lo‘u lima.
6Ina tepa ae ia outou i le lagi, ma vaai i le lalolagi i lalo; auā e mavae atu le lagi e pei o le asu, e pala le lalolagi e pei o le ofu; e faapena lava ona oti o e nonofo ai; a o la‘u faaolataga e faavavau lava lea, ma le amiotonu mai ia te au o le gausia lava lea.
7Faalogo mai ia ia te au, outou o e ua iloa le amiotonu, o le nuu ua i o latou loto la‘u tulafono; aua le fefefe i le faalumaina mai e tagata; aua foi le faavaivai i lo latou faifai mai.
8Auā e ‘aina i latou e le mogamoga e pei o le ofu, e ‘aina foi i latou e le pepe e pei o fulufulu mamoe; a o le amiotonu mai ia te au e faavavau lava lea, ma la‘u faaolataga e āutupulaga lea.
9Ala mai ia, ina ala mai, ia ofu i le malosi, o oe na le aao o Ieova; ala mai ia e pei o aso anamua, o tupulaga o le vavau; e le o oe ea le na fasiotia Raava, o le na manua ai le tanimo?
10E le o oe ea na pa‘umatu ai le sami, o le suāsami o le moana sāusau? o le na faia mea loloto i le sami ma ala e ui ai e ua faatauina?
11E foi mai e ua togiolaina e Ieova, latou te o mai foi i Siona ma le alaga ma le olioli e faavavau i luga i o latou ulu; latou te maua le olioli ma le fiafia; a e sosola ese le faanoanoa ma le mapuitiga.
12O a‘u, o a‘u lava lē faamafanafana ia te outou; o ai ea oe e te fefe i le tagata e oti, ma le atalii o le tagata e avea o ia e pei o le mutia.
13Ua galo foi ia te oe o Ieova o le na faia oe, le na fofola le lagi, ma faavaeina le lalolagi; ua e fefe pea i aso uma ona o le ita o lē faasaua, ina ua sauni o ia e fasioti; a o ifea le ita o lē faasaua?
14O le ua faano‘uno‘u ina ua fusifusia e faavave o ia ina ia tatalaina, ia le oti foi o ia i le lua, ia le oge foi i ni mea e ‘ai.
15O a‘u foi o Ieova lou Atua, o le e laolao ai le sami pe a ū mai ona peau; o Ieova o ‘au o lona igoa lea.
16Ua ou tuuina atu a‘u upu i lou gutu, ua ou ufiufi foi ia te oe i le paolo o lo‘u lima, e faatumau ai le lagi, ma faavaeina le lalolagi, e fai atu foi ia Siona, O lo‘u nuu lava oe.
17Ala mai ia, ina ala mai; ina tulai mai oe Ierusalema, ua e inu nai le lima o Ieova le ipu o lona ita; ua e inu i le ipu o le ipu e tautevateva ai, ua e inu uma ai lava.
18Ua leai se tasi o ana tama uma na ia fanaua na te ta‘ita‘iina o ia; ua leai foi se tasi o ana tama uma na ia tausia, na te tago atu i lona lima.
19Ua oo mai ia te oe o nei mea e lua; o ai ea se na te faamafanafana ia te oe? o le faatafunaina ma le lepetia, o le oge ma le pelu; o ai ea? Ou te faamatalaloto ia te oe.
20Ua matapogia au tama, o loo taatitia i latou i mea e amata mai ai ala uma, e pei o le teō i le upega; ua tutumu i latou i le toasa o Ieova, o le aoaiga mai lou Atua.
21O le mea lea, se‘i e faalogo mai ai i lenei mea, o oe le ua tiga ma onā, a e le o le uaina.
22O loo faapea ona fetalai mai o lou Alii, o Ieova, o lou Atua foi, o le na te faia finauga a lona nuu; faauta, ou te ave ese i lou lima le ipu e tautevateva ai, o le ipu, o le ipu lava o lo‘u ita; e te le toe inu ai lava.
23A ou te tuu atu ai i lima o e faatiga ia te oe, o e na fai mai ia te oe, Ifo ia, ina ia matou ui atu ai; ona fai lea o lou tua e pei o le eleele, e pei o le ala foi i e sāvali i ai.
Who We AreWhat We EelieveWhat We Do
2025 by iamachristian.org,Inc All rights reserved.
