1Na ou matuā faatalitali lava ia Ieova; ona faasaga mai ai lea o ia ia te au, ua faafofoga mai foi o ia i la‘u alaga.
2Na ia aveina ae a‘u ai le lua e malaia ai, ma le mea matuā palapalā; na faatuina foi o‘u vae i luga o le papa, ua faamautuina ai o‘u savali.
3Ua tuuina mai e ia le pese fou i lo‘u gutu, o le viiga i lo tatou Atua; e iloa ai e le toatele, e matatau foi i latou, ma latou faatuatua ia Ieova.
4Amuia le tagata o lē faatuatua ia Ieova, a e le faasaga i e faamaualuluga, ma e ua liliu ane i mea pepelo.
5Ieova e, lo‘u Atua, e tele lava mea ua e faia, o ou vavega ma ou manatu ia te i matou, e le mafai ona laulauina atu ai ia te oe; ou te fia faailoa ma tautala i ai, a e le mafaitaulia lava.
6E te le finagalo i le taulaga ma le taulaga i mea e ‘ai; ua elia e oe o‘u taliga; o le taulaga mu ma le taulaga mo le agasala e te lei fetalai mai ai.
7Ona ou fai ane ai lea, Faauta, ou te alu atu;
8ua tusia a‘u i le tusi taai, Lo‘u Atua e, ou te fiafia e fai lou finagalo; o loo i totonu lava ia te au lau tulafono.
9Ua ou tala‘i le amiotonu i le faapotopotoga tele; faauta, ou te lei taofia lava o‘u laugutu, Ieova e, ua e silafia lava.
10Ou te lei natia lava i lo‘u loto lau amiotonu; ua ou ta‘uina atu lou faamaoni ma lau faaolataga; ou te lei faalilolilo lou alofa ma le mea moni mai ia te oe i le faapotopotoga tele.
11Ieova e, aua e te taofi e oe lou alofa mutimuti vale ia te au; ia leoleoina pea lava a‘u e lou alofa ma lou faamaoni.
12Auā ua siosiomia a‘u i mea leaga e le mafaitaulia; ua maua mai a‘u e a‘u agasala, o lea ou te le mafaia ai ona vaai; ua sili ia ona tele i o‘u lauulu; ua matuā faavaivai ai lo‘u loto.
13Ieova e, ia e finagalo e laveai mai ia te au; Ieova e, ia vave ona e fesoasoani mai ia te au.
14Ia taufaimamā ma ia masiasi faatasi e ua fia fasioti ia te au; ia liutuaina ma faamaina e ua mananao i se mea ia leaga ai a‘u.
15Ia fememeai ona o lo latou mā o e fai mai ia te au, Ue! Ue!
16Ia olioli ma fiafia ia te oe o i latou uma o e sailiili ia te oe; ia fai ane pea i latou o e fiafia i lau faaolataga, Ia viia Ieova.
17A o a‘u nei, ua ou puapuagatia ma ou mativa; e manatua mai a‘u e le Alii; o oe lava lo‘u fesoasoani ma lo‘u faaola; lo‘u Atua e, aua lava e te tuai mai.
Who We AreWhat We EelieveWhat We Do
2025 by iamachristian.org,Inc All rights reserved.
