1Ua uma ona tautala atu o Ieremia i le nuu uma i upu uma a Ieova lo latou Atua, na auina mai ai o ia e Ieova lo latou Atua ia te i latou, o ia upu uma lava,
2ona fai mai ai lea o Asaraia le atalii o Hosaia, ma Ioanana le atalii o Karea, ma tagata faamaualuluga uma, ua faapea mai ia Ieremia, O le pepelo ua e fai mai ai; e lei auina mai oe e Ieova lo tatou Atua, ia faapea mai, Aua tou te o atu i Aikupito e āumau ai;
3a o Paruka le atalii o Neria, ua ia faaosoina oe ia te i matou, ina ia tuuina atu i matou i lima o Kaletaia, e fasioti i matou, ma tāfea i matou i Papelonia.
4O lenei, ua le faalogo Ioanana le atalii o Karea, ma alii uma na ave ‘au, ma le nuu uma, i le siufofoga o Ieova, ia latou nonofo i le nuu o Iuta;
5a o Ioanana le atalii o Karea, ma alii uma na ave ‘au, ua latou ave i e na totoe uma o Iuta, o e na foi mai ai nuu uma na tulia ai i latou, e nonofo i le nuu o Iuta;
6o tane, ma fafine, ma tama iti, ma afafine o le tupu, ma tagata uma na tuua e Nepusatana le pule i le ‘au e faafeao ia Ketalia le atalii o Aikamo, le atalii o Safana, atoa ma Ieremia le perofeta, ma Paruka le atalii o Neria.
7Ona latou o atu ai lea i le nuu o Aikupito; auā na latou le faalogo i le siufofoga o Ieova; ua oo atu lava i latou i Tapenesa.
8Ona oo mai ai lea o le afioga a Ieova ia Ieremia i Tapenesa, ua faapea mai,
9Ina ave ia i ou lima ni maa tetele, ma tanu ai i le paluga panisina i le mea e tunu ai maaomea, o loo i ai i le mea e ui ai i le fale o Farao i Tapenesa, i luma o tagata o Iuta;
10ia e fai atu foi ia te i latou, O loo faapea ona fetalai mai o Ieova o ‘au, le Atua o Isaraelu, Faauta, ou te auina atu e aami la‘u auauna o Nepukanesa le tupu o Papelonia, ma ou tuuina lona nofoālii i luga o ia maa ua ou tanua; na te fofola foi lona ie matagofie i o latou luga.
11E sau foi o ia, na te fasia le nuu o Aikupito; na te tuuina atu foi o e ua tofia ia oti, i le oti, ma e ua tofia i le tafeaga, ia tāfea, ma e ua tofia i le pelu, ia oti i le pelu.
12Ou te tŭtŭ foi le afi i fale o atua o Aikupito; na te susunuina foi i latou, ma avea i latou o tagata o taua; na te taaia foi le nuu o Aikupito, e pei ona taaia e le leoleo mamoe lona ofu; e alu ese foi o ia i lea mea ma le filemu.
13Na te tu‘ininiia foi tupua o le fale o le la, o loo i ai i le nuu o Aikupito; o fale foi o atua o Aikupito, na te susunuina i le afi.
Who We AreWhat We EelieveWhat We Do
2025 by iamachristian.org,Inc All rights reserved.
