1Ua alu atu Reopoamo i Sekema; auā na o mai Isaraelu uma lava i Sekema, ia fai o ia ma tupu.
2Ua faalogo ai Ierepoamo le atalii o Nepata a o i Aikupito o ia, na sola ai o ia ai luma o le tupu o Solomona, ona toe foi mai ai lea o Ierepoamo nai Aikupito.
3Ona latou aauina atu lea nisi e aami atu ia te ia. Ona o mai ai lea o Ierepoamo ma Isaraelu uma, ua latou tautala atu ia Reopoamo, ua faapea atu,
4Na faamamafaina e lou tamā la matou amo; o lenei, ia e faamāmā le galuega tiga a lou tamā, ma lana amo mamafa na ia faaeetia ia te i matou, ona matou auauna ai lea ia te oe.
5Ona fai atu lea o ia ia te i latou, O e luā tou te le toe o mai ai ia te au.
6Ona o ai lea o le nuu. Ona filifili lea o le tupu o Reopoamo ma toeaina e na tutū i luma o lona tamā o Solomona ina o soifua o ia, ua faapea atu, Se a sa outou e fai mai e tali atu ai i lenei nuu?
7Ona latou fai mai lea ia te ia, ua faapea mai, Afai e te agalelei atu i lenei nuu, ma faalotomalie ia te i latou, ma tautala atu ia te i latou i upu lelei, ona fai ai lea o i latou mau auauna i aso uma.
8A ua tuua e ia le upu a toeaina na latou faatonu mai ai ia te ia, ona filifili lea o ia ma taulelea o e na tutupu faatasi ma ia, o e ua tutū i ona luma.
9Ua fai atu ia ia te i latou, Se a sa outou na e fai mai ina ia tatou tali atu ai i lenei nuu na tautala mai ia te au, ua faapea mai, Ia e faamāmā le amo na faaeetia e lou tamā ia te i matou?
10Ona fai mai lea ia te ia o taulelea e na tutupu faatasi ma ia, ua faapea mai, Ia e faapea ona tali atu i le nuu ua tautala mai ia te oe, ua faapea mai, na faamamafaina e lou tamā o la matou amo, a ia e faamāmāina ia te i matou; ia e faapea atu ia te i latou, O lo‘u lima tama e tele lava lea i le sulugatiti o lo‘u tamā.
11Na faaeetia e lo‘u tamā le amo mamafa ia te outou, a o lenei, ou te faaopoopoina atu i la outou amo; na aoai atu lo‘u tamā ia te outou i sasa, a o a‘u, ou te aoai atu ia te outou i akarava.
12Ua o mai Ierepoamo ma le nuu uma ia Reopoamo i le aso tolu, e pei ona fai mai ai o le tupu, ua faapea mai, Tou te toe foi mai ia te au i e luā.
13Ona tali atu lea o le tupu ia te i latou ma le saua; ua tuua e le tupu o Reopoamo le upu a toeaina;
14a ua tautala atu ia te i latou e tusa ma le upu a taulelea, ua faapea atu, Na faamamafaina e lo‘u tamā o la outou amo, a ou te faaopoopo i ai na aoai atu lo‘u tama ia te outou i sasa, a ou te aoai atu ia te outou i akarava.
15Ua le faalogo le tupu i le nuu; auā mai le Atua lea mea, ina ia faataunuu ai e Ieova lana afioga, na fetalai mai ai na aumaia e Akia le Sailo ia Ierepoamo le atalii o Nepata.
16Ua iloa e Isaraelu uma lava e lei faalogo mai le tupu ia te i latou, ona tali atu lea o le nuu i le tupu, ua faapea atu, So matou tofi ea Tavita? E le so matou tofi le atalii o Iese; Isaraelu e, taitasi ma alu i lona fale ie. O lenei, Tavita e, faitalia oe i lou lava aiga. Ona o ai lea o Isaraelu uma i o latou fale ie.
17A o le fanauga a Isaraelu sa nonofo i aai o Iuta, ua fai Reopoamo ma tupu ia te i latou.
18Ona auina atu lea e le tupu o Reopoamo o Aturamo o le na pule i taulaga; a ua fetogi le fanauga a Isaraelu ia te ia i maa, ua oti ai o ia. Ona faataalise lea o le tupu o Reopoamo e alu ae i lona kariota, e sola atu i Ierusalema.
19Na foua e Isaraelu le aiga o Tavita, ua oo mai lava i nei ona po.
Who We AreWhat We EelieveWhat We Do
2025 by iamachristian.org,Inc All rights reserved.
