1Ieova e, lo‘u malosi, ou te alofa lava ia te oe.
2O Ieova o lo‘u papa ia, ma lo‘u ‘olo, ma lo‘u faaola; o lo‘u Atua, o lo‘u papa, ou te faatuatua ia te ia; o lo‘u talita, ma le nifo o lo‘u olataga, o lo‘u ‘olo maualuga.
3Ou te valaau ia Ieova, e tatau ona viia o ia; o lea e faaolaina ai a‘u i e ua ita mai ia te au.
4Na siosiomia a‘u i mailei e oti ai, na faamatautia foi a‘u i tafega a e ulavavale.
5Na siomia a‘u i mailei a seoli; na ou lumanai o matāsele a le oti.
6Ona ou valaau atu ai lea ia Ieova i lo‘u puapuaga, ma ou alaga atu i lo‘u Atua; na faafofoga mai o ia i lona malumalu i lo‘u leo, na oo atu ia te ia la‘u alaga i ona lava fofoga.
7Ona luluina ai lea ma mafuie le lalolagi; ua gatete foi faavae o mauga, ua luluina i latou, auā na toasa lava o ia.
8Ua alu ae le asu i on pogaiisu; o le afi mai lona fofoga ua maamaai lea; ua mu ai malala ola.
9Na lolou ifo e ia lagi ma afio ifo; o le pogisa foi sa i lalo o ona aao.
10Na tietie ia i le kerupi, ma ua lele; na lele ia i apaau o le matagi.
11Na faia e ia o le pouliuli ma mea e lilo ai o ia; o lona apitaga ua siomia ai o ia, o le vai pouliuli, o ao uliuli o le lagi.
12Na mavae ese atu o ana ao ona o le pupula na i ona luma; o uato‘a ma malala ola o le afi.
13Na faititili foi Ieova mai le lagi, na tŭlei ifo e le Silisili ese o lona siufofoga; o uato‘a ma malala ola o le afi.
14Na fana atu e ia ana u fanafana, ma faataapeape ia te i latou; ma ana uila e tele, ua tuli ai ia te i latou.
15Ona iloa atu ai lea o iliti vai, ua aliali mai o faavae o le lalolagi i lau aoaiga, Ieova e, o le mapugatamai o ou fofoga.
16Ua ia aapa mai lona aao mai luga, ma tago ia te ua, ua ia faaea ia te au ai vai e tele.
17Ua ia laveai mai ia te au ai le tagata malosi na ita mai, ma e na ‘ino‘ino ia te au; auā na sili lo latou malosi i lo‘u.
18Na latou lumanai a‘u i le aso o lo‘u malaia; a o Ieova, o ia na ou faalagolago i ai.
19Ua ia aumaia a‘u i le mea lautele; ua ia laveai ia te au, auā ua finagalo alofa mai o ia ia te au.
20Ua tauia mai a‘u e Ieova e tusa ma la‘u amiotonu; ua taui mai e ia ia te au e tusa ma o‘u lima mamā.
21Auā ua ou tausia ala o Ieova, ma a‘u le lafoai faalematau i lo‘u Atua.
22Auā ua ou lumanai pea ana faamasinoga uma; na ou le tuueseina foi ana tulafono ia te au.
23Na ou amiotonu i ona luma, na ou taofia a‘u ina ne‘i o‘u agasala.
24O lenei, ua tauia a‘u e Ieova e tusa ma la‘u amiotonu, e tusa ma o‘u lima mamā i ona luma.
25E te amio alofa oe i le ua alofa; e te amiotonu oe i le tagata amiotonu.
26E te amio mamā oe i le ua amio mamā; e te faapiopio foi oe i le ua faapiopio.
27Auā o oe lava, e te faaolaina le nuu ua tigaina; a o e ua mata faasiasia, e te faamaualaloina i latou.
28Auā foi e te tutu mai la‘u lamepa; e faamalamalamaina lo‘u pouliuli e Ieova lo‘u Atua.
29Auā o oe na ou sofai ai le ‘au; o lo‘u Atua na ou osopuna ai i le pa.
30O le Atua, e sao lava lona ala; ua se ario ua te‘a ma le otaota afioga a Ieova; o ia lava o le talta o i latou uma o e faatuatua ia te ia.
31Auā o ai ea le Atua, ua na o Ieova? O ai ea le papa, ua na o lo tatou Atua?
32O le Atua lea o loo fusia a‘u i le malosi, ua ia faalaulelei foi i lo‘u ala.
33Ua na faia o‘u vae ia pei o vae o aila; ua ia faatuina lava a‘u i a‘u mea maualuga.
34Ua ia a‘oa‘o i o‘u lima e tau ai le taua; ua lolou ai e o‘u lima le aufana ‘apa memea.
35Ua e foaiina foi ia te au le talita o le olataga mai ia te oe; ua faatumauina a‘u e lou aao taumatau; o lou agamalu ua faasilisiliina ai a‘u.
36Ua faalauteleina e oe le mea ou te savali ai, ne‘i mapeva o‘u vae.
37Na ou tuliloa i e na fai a‘u mo latou fili, ma ou maua; na ou faaumatia i latou, ona ou faatoa foi mai lea.
38Na ou fāsia i latou, ua latou le mafaia ona tutū i luga; na pauu i latou i lalo o o‘u vae.
39Ua e fusia a‘u i le malosi mo le taua; ua e faatoilalo i e na laga mai ia te au.
40O oe ua liutuaina mai ai ia te au o e ua fai a‘u mo latou fili; ua fano foi ia te au o e na ‘ino‘ino mai ia te au.
41Na alalaga i latou, a ua leai se faaola; na alalaga i latou ia Ieova, a ua na le tali atu ia te i latou.
42Ona ou nutininii lea ia te i latou, e pei o le efuefu ona lelea i le matagi; na ou sasaaina atu i latou e pei o le palapala i le ala.
43Na e laveai ia te au ai fefinauaiga ma le nuu; ua e tofia a‘u ia ou pule i nuu ese; e anauna mai ia te au le nuu na ou le iloa.
44A latou lagona, ona latou faalogo ai lea ia te au; e faatagā vivii mai ia te au tagata ese.
45E mavae atu tagata ese; e tetemu i latou i mea ua latou puipuia mo i latou.
46O loo soifua Ieova, ia faafetaia foi lo‘u papa; ma ia viia le Atua o lo‘u faaolataga.
47O le Atua lea o loo faia le taui ma sui mo a‘u; o le ua faatoilaloina foi le nuu ia te au.
48O le ua laveaiina a‘u i e ua ita mai ia te au; ua e faasilisiliina foi a‘u i e na laga mai ia te au; ua e laveaiina a‘u i le tagata faasaua.
49O le mea lava lea, Ieova e, ou te vivii atu ai ia te oe i luma o nuu ese; ou te pese atu foi i lou suafa.
50O le ua faia o le olataga tele i lana tupu; e agalelei foi o ia i le na ia faauuina, o Tavita lava lea, atoa ma lana fanau e oo i le faavavau.
Who We AreWhat We EelieveWhat We Do
2025 by iamachristian.org,Inc All rights reserved.
