1Sa auauna le tama o Samuelu ia Ieova i luma o Eli; ua valavala foi le afioga a Ieova i ia ona aso, ua le faaali mai soo.
2O ia ona aso sa taoto ai Eli i lona moega; ua afuafua ona popogi o ona mata, ua le mavaai;
3a o lei tineia le lamepa a le Atua, ua taoto Samuelu i le malumalu o Ieova o i ai le atolaau a le Atua;
4ona valaau lea o Ieova ia Samuelu; ua tali atu o ia, O a‘u lenei.
5Ona momo‘e atu ai lea o ia ia Eli, ma na fai atu ai, O a‘u lenei, auā na e valaau atu ia te au. A ua fai mai o ia, Ou te lei valaau; foi ia, ina taoto. Ona alu atu lea o ia, ua taoto.
6Ua toe valaau faalua Ieova, Samuelu e! Ona tulai lea o Samuelu, ua alu atu ia Eli, ua fai atu ai, O a‘u lenei, auā na e valaau atu ia te au. Ua fai mai o ia, Ta e, ou te lei valaau atu; foi ia, ina taoto.
7A o Samuelu e lei oo ina iloa e ia Ieova, e lei faaalia foi ia te ia le afioga a Ieova.
8Ua toe valaau Ieova ia Samuelu, o le foi faato‘u lea; ona tulai lea o ia, ua alu atu ia Eli, ua fai atu, O a‘u lenei, auā na e valaau atu ia te au. Ona iloa ai lea e Eli ua valaau Ieova i le tama.
9Ona fai mai lea o Eli ia Samuelu, Alu ia, ina taoto; afai e valaau atu o ia ia te oe, e te fai atu ai, Fetalai mai ia, Ieova e, auā o loo faalogologo atu lau auauna. Ona alu ai lea o Samuelu, ua taoto i lona moega.
10Ua afio mai Ieova, ona tu lea ma valaau, pei ona luai fai, Samuelu e, Samuelu e! Ona tali atu lea o Samuelu, Fetalai mai ia, auā o loo faalogologo atu lau auauna.
11Ona fetalai mai lea o Ieova ia Samuelu, Faauta, o le a a‘u faia se mea i Isaraelu, e taitasi uma o e faalogologo ai ma taalili ai ona taliga uma e lua.
12O lea aso ou te faataunuu atu ai ia Eli o mea uma na ou fai atu ai i lona aiga; ou te amataina, ma ou faaiuina lava.
13Ua ou ta‘utino atu ia te ia ou te faasala lona aiga e faavavau, ona o le pagota ua ia iloa; auā o ona atalii ua fai mea e fetuuina ai i laua, a ua ia le taofi ia te i laua.
14O le mea lea ua ou tauto ai i le aiga o Eli, e lei faamagaloina le pagota a le aiga o Eli i se taulaga po o se mea foai mai e faavavau lava.
15Ua taoto Samuelu seia oo i le taeao, ona to ai lea o puipui o le fale o Ieova; a ua fefe Samuelu e faailoa atu ia Eli le mea na faaalia mai.
16Ua valaau Eli ia Samuelu, ua fai mai, Ta e, Samuelu; ua tali atu o ia, O a‘u lenei.
17Ona fai mai lea o ia, O le a le upu na fetalai mai ai ia te oe, aua lava ne‘i e nanā ia te au; ia faapea ona faia e le Atua ia te oe, ma ia faaopoopo i ai, pe afai e te nanā ia te au se upu o upu uma na fetalai mai ai ia te oe.
18Ona faailoa lea e Samuelu o upu uma, ua le natia se mea ia te ia. Ona fai ane lea o ia, O ia o Ieova, ia faia e ia le mea e finagalo i ai o ia.
19Ua tupu Samuelu, sa ia te ia Ieova, ma ua le mafai ia te ia ona iu vale sina ana upu.
20Ua iloa e Isaraelu uma, e pau mai i Tanu e pau mai i Peresepa, ua faamaoni Samuelu e fai ma perofeta a Ieova.
21Ua toe iloa Ieova i Sailo, auā ua faaali Ieova ia Samuelu i Sailo i le afioga a Ieova. Ua oo foi le upu a Samuelu ia Isaraelu uma.
Who We AreWhat We EelieveWhat We Do
2025 by iamachristian.org,Inc All rights reserved.
