1O Vasega o le au leoleo faitotoa. O sa Korū, o Meselemia, le atalii o Kori, mai le fanauga a Asafo.
2O atalii o Meselemia; o Sakaria le ulumatua, o Ietiaelu le toalua, o Sepatia le toatolu, o Iatanielu le toafa,
3o Elama le toalima, o Iokana le toaono, o Elioenai le toafitu.
4O atalii o Opete-etoma; o Semaia o le ulumatua, o Iosapa le toalua, o Ioaa le toatolu, o Sakaru le toafa,
5ma Natanielu le toalima, o Amueli le toaono, o Isakara le toafitu, o Pulati le toavalu; auā sa faamanuia o ia e le Atua.
6Ua fanaua foi atalii o lona atalii o Semaia, o e na pule i le aiga o lo latou tamā; auā o toa malolosi i latou.
7O atalii o Semaia; o Oteni, ma Refaelu, ma Opeta, o Elesapata, o ona uso o tagata malolosi, o Eliu, ma Semakia.
8O i latou uma ia mai le fanau a Opete-etoma; o i latou, ma o latou atalii, ma o latou uso, o tagata malolosi mo le galuega, e toaono sefulu ma le toalua o sa Opete-etomā.
9Ua ia Meselemia foi o atalii ma uso, o tagata malolosi e toasefulu ma le toavalu.
10O Hosa foi o lo sa Merarī na i ai atalii; o Semeri o le sili, a e le o le ulumatua ia, a ua tofia e lona tamā ia sili o ia.
11O Hilikia le toalua, o Tepelia le toatolu, o Sakaria le toafa; o atalii uma ma uso o Hosa e toasefulu ma le toatolu.
12Ua ia te i latou vasega o le au leoleo faitotoa, ua i alii sili, o tausiga pei o latou uso, e auauna i le fale o Ieova.
13Ua latou fai ai le vili, o e iti a tusa ma e matutua, i aiga o latou tamā, mo lea faitotoa ma lea faitotoa.
14O le vili mo le itu i sasae ua faasaga lea ia Selemia. Ua latou fai foi le vili mo Sakaria lona atalii, o le faipule poto ia; ua faasaga lona tofi i le itu i matu.
15Ua ia Opete-etoma le itu i toga, ma ona atalii i le fale e tuu ai mea.
16Ua ia Supima ma Hosa le itu i sisifo, ma le faitotoa o Saleketa, i le ala tele e alu ae, o le leoleoga e feagai ma le leoleoga.
17Ua toaono o sa Levī i le itu i sasae, e toafa i lea aso ma lea aso i le itu i matu, e toafa i lea aso ma lea aso i le itu i toga; ma taitoalua i le fale e faaputu ai mea.
18O i Parevara i sisifo, e toafa i le ala tele, e toalua i Parapara.
19O vasega ia o le au leoleo faitotoa ua i le fanauga a sa Korū, ma le fanauga a Merari.
20O sa Levī; o Akia ua leoleo i oloa o le fale o le Atua, ma oloa ua faasaina.
21O atalii o Latana, o atalii o le sa Keresonā o Latana, o matai sili, o Latana foi o lo sa Keresonā, o Ikieli.
22O atalii o Ikieli; o Setama ma lona uso o Ioelu e leoleo i oloa o le fale o Ieova.
23O sa Amaramō, ma sa Isarā, ma sa Heperonā, ma sa Usialū;
24o Sepuelu foi o le atalii o Keresona, le atalii ia o Mose, o le alii sili ia e leoleo i oloa.
25O ona uso foi o le fanau a Eliesera; o Reapea lona atalii, ma Isaia lona atalii, ma Iorama lona atalii, ma Sekari lona atalii, ma Salome lona atalii.
26O Salome lenei ma ona uso na leoleo i oloa uma na faasaina, na faasaina e le tupu o Tavita, ma matai sili, o alii o taitoaafe, ma taitoaselau, ma e avea ‘au.
27Na faasaina e i latou o mea mai taua ma vete e fai ai le fale o Ieova.
28O mea uma na faasaina e Samuelu le tagata vaai, ma Saulo le atalii o Kiso, ma Apineru le atalii o Neru, ma Ioapo le tama a Seruia; o mea uma na faasaina ua leoleo ai Salome ma ona uso.
29O sa Isarā; o Kinania ma ona atalii sa tofia i sauniga faalenuu ia Isaraelu e fai ma faipule ma faamasino.
30O sa Heperonā; o Hasapea ma ona uso, o tagata malolosi, e toaafe ma le toafitu selau na pule i sauniga ia Isaraelu i le itu mai o Ioritana i sisifo i sauniga uma a Ieova, ma galuega foi a le tupu.
31O sa Heperonā; o Ieria o le alii sili i sa Heperonā i aiga o ona tamā. O le tausaga e fa sefulu o le nofoaiga a Tavita na suesueina ai i latou, na maua foi ia te i latou o toa malolosi i Iasaru i Kiliata.
32O ona uso foi, o tagata malolosi, e lua afe ma le fitu selau, o matai sili, na tofia i latou e le tupu o Tavita e pule i sa Reupenā, ma sa Katō, ma le tasi vaega o le itu aiga o Manase, i mea uma a le Atua ma mea a le tupu.
Who We AreWhat We EelieveWhat We Do
2025 by iamachristian.org,Inc All rights reserved.
