1O loo fetalai mai Ieova, O ona po ia e fai a‘u ma Atua i aiga uma o Isaraelu, e fai foi i latou mo‘u nuu.
2O loo faapea ona fetalai mai o Ieova, Na maua le alofa i le vao e le nuu na totoe i le pelu, o Isaraelu lava, ina ua ou alu atu e faanofo filemu ia te ia.
3Na faaali mai Ieova ia te au anamua, ua faapea mai, O le alofa e faavavau, ua ou alofa atu ai ia te oe; o le mea lea ua ou faafualoaina ai lo‘u alofa ia te oe.
4Le taupou o Isaraelu e, ou te toe ati ae ia te oe, ona atiina ae ai lea o oe; e te toe teuteu ia te oe i au topa, e te alu atu foi e siva faatasi ma i latou o e sisiva.
5E te toe totō tovine i mauga o Samaria; e totō ai mea e tagata gālue fanua, ma latou faatatagaina ai.
6Auā e oo i le aso e valaau ai tagata leoleo i le mauga o Efaraima, Ina tulai ia outou, se‘i tatou o ae i Siona ia Ieova lo tatou Atua.
7Auā o loo faapea ona fetalai mai o Ieova, Ia outou alalaga ma le olioli ia Iakopo, ma ia outou alalaga, i le nuu e sili; ina faailoa atu ia, ia outou vivii atu, ma ia outou fai atu, Ieova e, ia e faaola i lou nuu, o e ua totoe ia Isaraelu.
8Faauta, ou te aumaia i latou ai le nuu i le itu i matu, ma ou faapotopoto ia te i latou ai tuluiga o le lalolagi; e faatasi foi ma i latou le tauaso ma le pipili, o le fafine ua to e faatasi ma le fafine o le a fanau; e toe foi mai iinei le faapotopotoga e toatele lava.
9Latou te o mai ma le tagi, ou te ta‘ita‘iina foi i latou o latou aioi mai; ou te aumaia i latou i vaitafe i le ala sa‘o, latou te le tausuai ai; auā o a‘u, o le tamā a‘u o Isaraelu, o Efaraima foi o la‘u ulumatua ia.
10Ina faalogologo mai ia i le afioga a Ieova, outou nuu e, ma ia outou ta‘u atu ai i nuu tu matafaga e mamao, ia faapea atu, O le na faataapeapeina Isaraelu, na te faapotopotoina i latou, ma leoleo ia te i latou e pei o le leoleo mamoe i lona lafu.
11Auā ua laveaiina Iakopo e Ieova, ua na faatauina foi o ia ai le lima o le ua sili lona malosi ia te ia.
12E o mai foi i latou ma latou alalaga fiafia i le mea maualuga o Siona, latou te gasolo ane i mea lelei a Ieova, ia maua ai le saito, ma le uaina, ma le suāuu, o tamai mamoe foi, ma tamai povi; o latou loto foi e pei o se faatoaga ua faasūsūina; e le toe vaivai lava i latou.
13Ona olioli ai lea o le taupou i le siva, o taulelea foi faatasi ma toeaina; ou te liua foi lo latou faanoanoa i le fiafia, ma ou faamatalaloto ia te i latou, ou te faafiafia ia te i latou sa tiga i latou.
14Ou te faamalilie manao o le au faitaulaga i mea lololo, e mălie foi lo‘u nuu i a‘u mea lelei, o loo fetalai mai ai Ieova.
15O loo faapea ona fetalai mai o Ieova, Ua lagona le leo i Rama, o le auega, o le tagi lotulotu lava; ua tagi Rasela ona o lana fanau, e le mafai foi ona faanaina o ia ona o lana fanau, auā ua leai i latou.
16O loo faapea ona fetalai mai o Ieova, Soia e te tagi, aua foi le tafe ifo o loimata i ou mata; auā o loo fetalai mai Ieova, e fai le taui a lau galuega, e toe foi mai lava i latou ai le nuu o e ita mai.
17E fai foi le faamoemoe i lou iuga, ua fetalai mai ai Ieova, e toe foi mai lava lau fanau i lo latou laueleele.
18Ua ou faalogo lava ia Efaraima ua faanoanoa o ia, ua faapea, Ua e aoai mai ia te au, ua aoaiina foi a‘u, e pei o le povi ua le a‘oa‘oina; ia e faaliliuina a‘u, ona liliu ai lea o a‘u; auā o oe, Ieova e, o lo‘u Atua oe.
19Auā na faaliliuina a‘u, mulimuli ane, ona ou salamo ai lea; na a‘oa‘oina a‘u, mulimuli ane, ona ou pōpō ai lea i lo‘u vae; na a‘u mā, ma a‘u masiasi, auā na a‘u tauave le luma na fai ina o taulealea o a‘u.
20O le atalii pele ea Efaraima ia te au? o le tama ea ia e fiafia i ai? auā talu ina ou tautala ia te ia; ua ou matuā manatunatu pea ia te ia; o le mea lea ua tagi ai lo‘u loto ia te ia; ou te matuā alofa lava ia te ia, o loo fetalai mai ai Ieova.
21Ina faatuina ia mo oe ni faailoga i le ala, ina faatu ia mo oe ni laau; ia faasaga lou loto i le ala tele, o le ala lava na e alu atu ai; ina foi mai ia, le taupou o Isaraelu e, ina foi mai ia i ou aai nei.
22E te fealualuai seia afea, oe na le tama fafine liliu ese? auā ua faia e Ieova le mea fou i le lalolagi, e siosioina le tane e le fafine.
23O loo faapea ona fetalai mai o Ieova o ‘au, le Atua o Isaraelu, E toe faia e i latou lenei upu i le nuu o Iuta ma ona aai, pe a ou faafoisia mai lo latou tafeaga, Ia faamanuia Ieova ia te oe le fale e i ai le amiotonu, o le mauga paia.
24E nonofo ai foi Iuta ma ona aai uma faatasi, o tagata gālue fanua, ma ē feoai ma lafu.
25Auā ua ou faamălie i le tagata ua lailoa, ua ou faamalilieina loto vaivai uma.
26Ona ou ala ai lea, ma ou vaai, ua mălie lava a‘u i a‘u moe.
27O loo fetalai mai Ieova, Faauta, e oo lava i ona aso ou te totōina ai le fua o tagata ma le fua o manu i le aiga o Isaraelu, ma le aiga o Iuta.
28E pei ona ou lamalama ia te i latou, ina ia ou liaiina, ma lepetia, ia ou sŏloia foi, ma faaumatia, ma faatigaina; e faapea foi ona ou leoleo ia te i latou, ia ou atiina ae, ma totōina, ua fetalai mai ai Ieova.
29E le toe fai mai i latou i ia ona po, Ua ‘aina e tamā o vine moto, a e magiagia ai nifo o le fanau.
30A e taitasi le tagata ma oti ona o ana agasala; o tagata uma ua aai vine moto, e taitasi ma magiagia ai ona lava nifo.
31O loo fetalai mai Ieova, Faauta, e oo i ona aso ou te osia ai le feagaiga fou ma le aiga o Isaraelu, ma le aiga o Iuta.
32E le pei o le feagaiga na ou osia ma o latou tamā i le aso na ou tago ai i o latou lima e aumaia ai i latou mai le nuu o Aikupito; o la‘u feagaiga lea na latou solia, o a‘u foi na ou ‘ino‘ino ai ia te i latou, ua fetalai mai ai Ieova;
33a o lenei le feagaiga ou te osia ma le aiga o Isaraelu, pe a mavae ia aso, o loo fetalai mai ai Ieova, ou te tuuina la‘u tulafono i totonu ia te i latou, ma ou tusi ai i o latou loto; e fai foi a‘u mo latou Atua, o i latou foi e fai mo‘u nuu.
34E le toe a‘oa‘o atu foi le tagata i lē la te tuaoi, ma le tagata i lona uso, e faapea atu, Ia outou iloa Ieova; auā e iloa a‘u e i latou uma lava, o tagata nuu atoa ma alii, o loo fetalai mai ai Ieova; auā ou te faamagalo i a latou amio leaga, ma ou le toe manatua a latou agasala.
35O loo faapea ona fetalai mai o Ieova, o le ua tuuina le la e fai ma malamalama i le ao, o tulafono foi i le masina ma fetu e fai ma malamalama i le po; o le e laolao ai le sami pe a ū mai ona peau; o Ieova, o ‘au, o lona suafa lava lea;
36afai e mavae ia tulafono ai o‘u luma, ua fetalai mai ai Ieova, ona mavae ai lea o le fanau a Isaraelu, ia le toe fai ma nuu i o‘u luma e faavavau.
37O loo faapea ona fetalai mai o Ieova, Afai e mafai ona fuatia le lagi i lugā, afai foi e mafai ona suesueina o faavae o le lalolagi i lalō, ona ou lafoaiina lea o le fanau uma a Isaraelu ona o mea uma ua latou faia, ua fetalai mai ai Ieova.
38Faauta, e oo i ona aso, o loo fetalai mai ai Ieova, e faatuina ai le aai mo Ieova, e afua mai i le ‘olo o Hananiali e oo atu i le faitotoa o le tulimanu.
39E toe alu atu le maea e fua a‘i, e ui tonu atu i luga o le mauga o Karepa, e faataamilo atu foi i Koata.
40E faapaiaina foi mo Ieova le vanu uma ua i ai tino o tagata oti, ma le lefulefu, ma fanua uma, e oo i le alia o Ketarono, e oo foi i le tulimanu o le faitotoa o solofanua i sasae; e le toe liaiina ia, e le toe sŏloia foi e oo i le faavavau.
Who We AreWhat We EelieveWhat We Do
2025 by iamachristian.org,Inc All rights reserved.
