1Ua o mai tagata Kiriata-iarima ua lotou avae le atolaau a Ieova, ma ua avatu ai i le fale o Apinatapa i le mauga; ua latou faapaiaina Eleasaro lona atalii e leoleo i le atolaau a Ieova.
2O aso sa tuu ai le atolaau i Kiriata-iarima ua tele aso, ua lua sefulu o tausaga; ua faanoanoa foi le aiga uma o Isaraelu ia Ieova.
3Ua fai atu Samuelu i le aiga uma o Isaraelu, ua faapea atu, Afai tou te foi atu ia Ieova ma o outou loto atoa, ina tuu ese ia o atua ese ia te outou atoa ma Asaira, ma sauniuni atu o outou loto ia Ieova, na o ia tou te auauna i ai; ona laveai lea o ia ia te outou ai lima o Filisitia.
4Ona tuu ese ai lea e le fanauga a Isaraelu o Paala ma Asaira, ua na o Ieova ua latou auauna i ai.
5Ua fai atu foi Samuelu, Ia faapotopoto mai Isaraelu uma i Mesepa, ou te fautua ia Ieova mo outou.
6Ona latou faapotopoto atu ai lea i Mesepa; ua latou utu vai, ma sasaa ai i luma o Ieova, ma ua latou anapogi i lea aso, ona latou fai ane ai lea, Ua matou agasala ia Ieova. Ua faamasino Samuelu i le fanauga a Isaraelu i Mesepa.
7Ua faalogo Filisitia, ua faapotopoto le fanauga a Isaraelu i Mesepa, ona o ae lea o alii o Filisitia e tau ma Isaraelu; ua faalogo ai le fanauga a Isaraelu, ona latou matatau ai lea ia Filisitia.
8Ua fai mai le fanauga a Isaraelu ia Samuelu, Aua le mapu i le valaau atu ia Ieova lo tatou Atua mo i matou, ia na faaola mai ia te i matou ai lima o Filisitia.
9Ua avatu e Samuelu se tamai mamoe o susu, ua na fai a‘i le taulaga mu atoa ia Ieova; ua valaau foi Samuelu ia Ieova mo Isaraelu, ona faafofoga mai lea o Ieova ia te ia.
10O loo fai e Samuelu le taulaga mu, a ua faalatalata mai Filisitia e tau ma Isaraelu; ona faapa mai lea e Ieova le faititili ma le taalili tele i lea aso i luga o Filisitia, ua ia faataapeapeina i latou, ua fasia foi i latou, i luma o Isaraelu.
11Ua o atu tagata o Isaraelu nai Mesepa, ua tuliloa ia Filisitia, ma fasi ia te i latou, ua oo i lalo ifo o Peteka.
12Ona ave lea e Samuelu le tasi maa, ua na tuu ai i le va o Mesepa ma Sena, ua ia faaigoa ai o Epenesa, ua faapea ane ia, Ua fesoasoani mai Ieova ia i tatou, ua oo mai i le aso nei.
13Ona toilalo lea o Filisitia, e lei toe o ae i le laueleele o Isaraelu; sa i luga o Filisitia le aao o Ieova i aso uma o Samuelu.
14Ua toe tuu mai ia Isaraelu aai na faoa e Filisitia sa ia Isaraelu, e pau mai Ekerona, e pau mai i Kata; a o latou laueleele ua faoa ia e Isaraelu ai lima o Filisitia. Sa nofo lelei Isaraelu ma sa Amorī.
15Ua faamasino Samuelu ia Isaraelu i aso uma na ola ai o ia.
16Ua alu atu ia i lea tausaga ma lea tausaga, ua faataamilo i Peteli, ma Kilikala, ma Mesepa; ua ia faamasino ia Isaraelu i ia nuu uma.
17Ona foi ai lea o ia i Rama, auā sa i ai lona fale; ua faamasino ai foi ia Isaraelu i lea mea, ma ua fai ai se fata faitaulaga ia Ieova.
Who We AreWhat We EelieveWhat We Do
2025 by iamachristian.org,Inc All rights reserved.
