1O poloaiga ia, o tulafono, ma faamasinoga na fetalai mai ai Ieova lo outou Atua ia a‘oa‘o atu ai ia te outou, ina ia outou faia i le nuu tou te o atu i ai e fai mo outou;
2ina ia e mata‘u ia Ieova lou Atua, e te tausiusi ai i ana tulafono ma ana poloaiga uma ou te fai atu ai ia te oe, o oe, ma lou atalii, ma le atalii o lou atalii i aso uma o lou olaga, ina ia faalevalevaina ai ou aso.
3O lenei, Isaraelu e, ia e faalogologo mai, ma ia e tausi i ai ia faia, ina ia manuia ai oe, ma ia matuā faatoateleina ai outou, faapei ona fetalai mai ai ia te oe o Ieova le Atua o ou tamā, i le nuu o loo tafe ai le suāsusu ma le meli.
4Isaraelu e, faalogologo mai ia, o Ieova lo tatou Atua, o Ieova e toatasi lava ia.
5Ia e alofa atu ia Ieova lou Atua ma lou loto atoa, ma lou agaga atoa, ma lou malosi atoa.
6Ia i ai foi i lou loto o upu nei ou te fai atu ai ia te oe i le aso nei.
7Ia e matuā a‘oa‘o soo ai i lau fanau, ma ia e tautalatala a‘i, pe a ē nofo i lou fale, pe a ē savali foi i le ala, pe a ē taoto, pe a ē tulai foi.
8Ia e fusi ai e fai ma faailoga i lou lima, e avea foi ma pale i le va o ou mata.
9Ia e tusi ai foi i pou o lou fale, atoa ma ou puipui.
10A faaooina oe e Ieova lou Atua i le nuu na ia tauto ai i ou tamā, o Aperaamo, o Isaako, ma Iakopo, e avatu ia te oe, o aai tetele ma le lelei, e te lei faia,
11o fale foi e tutumu i mea lelei uma na e le faatutumuina; o vaieli foi e te lei elia, o tovine ma olive e te lei totoina; a e ‘ai ai, ma e ma‘ona ai,
12ia oe, ne‘i galo ia te oe o Ieova na na aumaia oe nai le nuu o Aikupito, o le mea sa nofo pologa ai.
13Ia e mata‘u ia Ieova lou Atua, ma ia e auauna ia te ia; o lona suafa foi e te tauto i ai.
14Aua tou te mulimuli atu i atua ese, o atua o nuu e vagavagaia outou,
15(auā o Ieova lou Atua o ia te oe, o le Atua fuā ia,) ne‘i tupu le toasa o Ieova lou Atua ia te oe, ona faaumatia ai lea o oe ai le fogāeleele.
16Aua tou te tofotofo ia Ieova lo outou Atua, faapei ona outou tofotofo ia te ia i Mase.
17Ia outou matuā tausiusi i poloaiga a Ieova lo outou Atua, ma ana mau, ma ana tulafono, na ia poloai mai ai ia te oe.
18Ia e fai foi le amiotonu ma le lelei i luma o Ieova, ina ia manuia ai oe, ma ia e oo atu, ma ia fai mo oe le nuu lelei na tauto ai Ieova i ou tamā,
19na te tulia ou fili uma lava ai ou luma, faapei ona fetalai mai ai o Ieova.
20A fesili mai lou atalii ia te oe i se aso, o loo faapea mai, Pe ni a ea mau, ma tulafono, ma faamasinoga, na poloai mai ai Ieova lo tatou Atua ia te outou?
21Ona e fai atu ai lea i lou atalii, Sa matou nofo pologa ia Farao i Aikupito, a ua aumaia i matou e Ieova ai Aikupito i le aao malosi;
22na tuuina atu foi e Ieova o faailoga ma vavega tetele na leaga ai Aikupito, ma Farao, atoa ma lona aiga uma, i o matou luma;
23na ia au mai ai foi i matou, ina ia faaooina mai i matou, ia foaiina mai ia te i tatou le nuu na ia tauto ai i o tatou tamā.
24Na poloai mai foi Ieova ia te i tatou ia faia noi tulafono uma lava, ia matatau ia Ieova lo tatou Atua, ina ia manuia ai tatou i aso uma, ina ia na faaolaina i tatou, pei ona fai i le aso nei.
25E avea foi ma amiotonu ia te i tatou, pe afai tatou te anaana ia faia ia poloaiga uma i luma o Ieova lo tatou Atua, faapei ona ia poloai mai ai ia i tatou.
Who We AreWhat We EelieveWhat We Do
2025 by iamachristian.org,Inc All rights reserved.
