1Ua fai atu Samuelu ia Isaraelu uma, Faauta, ua ou faalogo i a outou upu i mea uma na outou fai mai ai ia te au, ua ou tofia le tupu e pule ia te outou.
2O lenei, faauta, ua savali le tupu i o outou luma; a o a‘u nei, ua toeaina a‘u ma ulusinā; faauta foi, o loo ia te outou o‘u atalii; o a‘u foi, ua ou fealuai i o outou luma talu ina ou itiiti, ua oo mai i le aso nei.
3Faauta o a‘u, ia outou molia a‘u i luma o Ieova, ma luma o le ua faauuina e ia; se povi a ai ua ou avea? Po o se asini a ai ua ou avea? Po o ai ua ou faasaua i ai? Po o ai ua ou faatigaina? Ua ou talia se taui mai ia te ai ina ia ou ufiufi ai o‘u mata ia te ia? Ou te toe avatu ai ia te outou.
4Ona tali mai ai lea o i latou, Ua e le faasaua mai ia te i matou, ua e le faatiga mai ia te i matou, ua e le talia lava se mea a se tasi.
5Ona fai atu lea o ia ia te i lato, Ua silafia e Ieova i lenei aso a outou upu, ua silafia foi le ua faauuina e ia, ua outou le maua se mea ia te au; ua fai mai i latou, Ua silafia.
6Ona fai atu lea o Samuelu i le nuu, O Ieova o ia sa na faatuina Mose ma Arona, o ia foi na aveina ae o outou tamā ai le nuu o Aikupito.
7O lenei, ina tutū mai ia outou, ou te faamasino ia te outou i luma o Ieova i mea tonu uma a Ieova na ia faia ia te outou ma o outou tamā.
8Na alu atu Iakopo i Aikupito, ona alalaga ai lea o outou tamā ia Ieova; ona aauina atu ai lea e Ieova o Mose ma Arona, ua la au mai i o outou tamā nai Aikupito, ua faanonofo ia te i latou i le mea nei.
9Ua galo ia te i latou Ieova lo latou Atua, ona tuuina atu ai lea e ia ia te i latou i le lima o Sesera o le na pule i ‘au a Hasora, ma lima o Filisitia, ma le lima o le tupu o Moapi, ua latou tau ma i latou.
10Ona latou alalaga lea ia Ieova, ua faapea atu ai Ua matou agasala, auā ua matou lafoai ia Ieova, a e matou auauna ia Paala ma Asaira; a o lenei, ia e laveai mai ia te i matou ai lima o e ita mai, ona matou auauna lea ia te oe.
11Ona aauina mai lea e Ieova ia Ierupaala, ma Petana, ma Iefata, ma Samuelu, sa laveai mai ai ia te outou ai lima o e na ita mai ia te outou i itu uma; sa outou nonofo filemu ai.
12Ona outou vaai atu lea ua sau Naasa le tupu o le fanauga a Amoni e tau ma outou, ona outou fai mai lea ia te au, E leai, a ia tofia se tupu e pule ia te matou; a o Ieova lo outou Atua, o lo outou tupu lava lea.
13O lenei, faauta mai ia i le tupu ua outou filifilia, sa outou faatoga mai ai; faauta foi, ua foai mai e Ieova le tupu e pule ia te outou.
14Afai tou te matatau ia Ieova, ma auauna ia te ia, ma faalogo i lona siufofoga, a e le fouvale outou i le afioga a Ieova; ona mulimuli ai lea ia Ieova lo outou Atua, o outou, atoa ma lo outou tupu o loo pule ia te outou.
15A e afai tou te le faalogo i le siufofoga o Ieova, a e fouvale outou i le afioga a Ieova, e oo atu le aao o Ieova ia te outou, e pei ona oo i o outou tamā.
16O lenei, ina tūtū mai ia, ma ia outou vaai i lenei mea tele o le a faia nei e Ieova i o outou luma.
17E le o ona po nei ea e fai ai le seleselegāsaito? Ou te valaau ia Ieova, ona tuu mai ai lea e ia o faititili ma uaga, tou te iloa ai, ma outou lagona ai, ua tele le leaga ua outou faia i luma o Ieova, ina ua outou ole atu ai i se tupu mo outou.
18Ona valaau ai lea o Samuelu ia Ieova, ona tuuina mai ai lea e Ieova o faititili ma uaga i lea lava aso, ua fefefe tele ai le nuu uma ia Ieova ma Samuelu.
19Ua fai mai le nuu uma ia Samuelu, Ia e fautua ia Ieova lou Atua mo au auauna, ina ia le oti i matou; auā ua matou faaopoopoina i a matou agasala uma lenei mea leaga, ina ua matou faatoga atu ai i se tupu mo i matou.
20Ona fai atu lea o Samuelu i le nuu, Aua tou te fefefe, e ui lava ina ua outou faia nei mea leaga uma, tau lava ina le tuua e outou ona mulimuli atu ia Ieova; a ia outou auauna ia Ieova ma o outou loto atoa.
21Aua foi tou te o ese ia te ia; auā a outou o ese ona mulimuli ai lea outou i mea faatauvaa ua le aoga, e le malaveai foi ia te outou, auā e faatauvaa i latou.
22Auā e le lafoai e Ieova i lona nuu ona o lona suafa mamalu, auā ua finagalo Ieova e fai outou mona nuu.
23O a‘u foi, ia mamao ia te au ona ou agasala ia Ieova i lo‘u tuua o le fautua mo outou; ou te faasino foi ia te outou le ala lelei ma le tonu.
24Tau lava ina matatau outou ia Ieova, ma auauna ia te ia ma le faamaoni ma o outou loto atoa; auā ia outou manatunatu i mea tetele ua na faia mo outou.
25A e afai tou te fai amio leaga pea, e fano outou atoa ma lo outou tupu.
Who We AreWhat We EelieveWhat We Do
2025 by iamachristian.org,Inc All rights reserved.
