1Ua faitauina e Tavita le nuu ua ia te ia, ma na tofia foi o alii o taitoaafe ma alii o taitoaselau e pule ia i latou.
2Ua tuu atu e Tavita le nuu ua vaetoluina, o le tasi vaega i le pule a Ioapo, ma le tasi ona vaega i le pule a Apisai le tama a Seruia, le uso o Ioapo, ma le isi ona vaega i le pule a Itai le sa Katā; ua fai ane foi le tupu i le nuu, O a‘u foi, tatou te o lava faatasi ma outou.
3A ua fai mai le nuu, E te le maliu atu lava, auā afai e sosola i matou, latou te le manatu mai lava ia i matou; afai foi e vaeluaina i matou i le oti, latou te le manatu mai lava ia te i matou; a o lenei ua tusa oe ma le sefulu afe o i matou; o lenei, e lelei ona e fesoasoani ia te i matou ai le aai.
4Ona fai atu lea o le tupu ia i lato, O le mea e lelei ia te outou ou te faia lea; ona tu lea o le tupu i le itu o le faitotoa, a ua o atu e nuu uma i ‘au taitoaselau ma taitoaafe.
5U fai atu le tupu ia Ioapo, ma Apisai, ma Itai, ua faapea, Ia outou agamalu i le taulealea o Apisaloma ona o a‘u. Ua faalogo ai le nuu uma, ina ua fai atu le tupu i alii uma le upu ia Apisaloma.
6Ua o atu le nuu i le vao e faafetaiai ia Isaraelu; ona tau ai lea o le taua i le vao matua o Efaraima.
7Ona fasia lea i lea mea o le nuu o Isaraelu e auauna a Tavita; sa fai le fasi tele i lea aso, e lua sefulu o afe.
8Ua salalau solo ona tau o le taua i le fogāeleele uma; ua sili ona toatele o le nuu ua oti i le vao i e na oti i le pelu i lea aso.
9Ua fetaiai Apisaloma ma auuana a Tavita; sa tietie Apisaloma i le falata, ona alu lea o le falata i lalo o le tapeneto felefele tele, ua lavemauina lona ulu i le tapeneto, ua tuua o ia i le va o le lagi ma le lalolagi, a ua alu ese le falata sa tietie ai o ia.
10Ua iloa ai e le tasi tagata, ona ia ta‘u atu lea ia Ioapo, ua faapea atu, Faauta, na ou iloa Apisaloma, ua tautau i le tapeneto.
11Ua fai mai Ioapo i le tagata ua ta‘u atu ia te ia, Faauta, na e iloa o ia, o le a le mea na e le fasioti ai ia te ia ia paū i le eleele? A na e faapea, po ua ou avatu ia te oe o tupe e sefulu, ma le fusi e tasi.
12Ona fai atu lea o le tagata ia Ioapo, E ui lava ina e fua mai o tupe e afe i lo‘u lava lima, ou te le faaoo atu lo‘u lima i le atalii o le tupu; auā na poloai le tupu ia te oe ma Apisai ma Itai, o matou faalogo ane ua faapea, Ia outou, ne‘i ai se tasi e mao i le taulealea o Apisaloma.
13Ana a‘u faapea po ua pelogia a‘u e a‘u; auā e le natia se mea e tasi i le tupu; o oe foi po ua e molia a‘u.
14Ua fai mai Ioapo, Ou te le mafai ona ta tutū pea faapenei ma oe. Ona ia ave ia lea o tao e tolu i lona lima, ma tutu‘i ai i le fatu o Apisaloma, a o ola lava o ia i totonu o le tapeneto.
15Ona siosio ai lea o taulelea e toasefulu, o soātau o Ioapo, ma latou fasi ia Apisaloma, ua faaoti ia te ia.
16Ona ili lea e Ioapo o le pu, i le ua foi ai le nuu ai le tuliloaga o Isaraelu; auā na taofia le nuu e Ioapo.
17Ona latou ave lea ia Apisaloma, ma lafo ia te ia i le lua tele i le vao; ona faaputu ai lea i ona luga o le faupuegāmaa matuā tele; a o Isaraelu uma ua taitasi ma sola i lona fale ie.
18Sa ave ma faatu e Apisaloma, ina o ola o ia, le faailoga, o loo i le vanu o le tupu, auā sa faapea o ia, E leai so‘u atalii e faamanatuina a‘i lo‘u igoa; na ia faaigoa le faailoga i lona lava igoa, ua igoa a‘i, O le faailoga o Apisaloma; ua oo lava i le aso nei.
19Ona fai ane lea o Aimaasu le atalii o Satoka, Se‘i ou momo‘e, ma ta‘u atu i le tupu, ua laveaiina o ia e Ieova ai lima o e na ita ia te ia.
20A ua fai atu Ioapo ia te ia, E te le avea se tala i lenei aso, a oo i le tasi aso e te avea ai se tala, a o le aso nei e te le avea se tala, auā ua oti le atalii o le tupu.
21Ua fai atu Ioapo ia Kusi, Alu ia oe, ta‘u atu i le tupu le mea ua e iloa. Ona ifo lea o Kusi ia Ioapo, ona momo‘e ai lea o ia.
22Ona toe fai mai lea o Aimaasu le atalii o Satoka ia Ioapo, Tuu mai ia, se‘i ou momo‘e atu foi a‘u, e mulimuli ia Kusi. Ona fai atu lea i Ioapo, Lo‘u atalii e, o le a le mea e te momo‘e atu ai, auā e te lei maua se tala?
23Ua fai mai o ia, Tuu mai pea, se‘i ou momo‘e. Ona fai atu lea o ia, Momo‘e ia. Ona momo‘e ai lea o Aimaasu i le ala o le fanua laugatasi, na ia tuuna o Kusi i tua.
24Sa nofo Tavita i le va o puipui e lua; a ua alu le tagata vaai i luga lava o le faitotoa i luga o le pa; ua vaai atu o ia, ona iloa atu lea, faauta, o le tagata ua momo‘e toatasi mai.
25Ua valaau le tagata vaai, ma ta‘u mai ai i le tupu. Ua fai atu le tupu, Afai e toatasi o ia, ua i ai se tala. Ua saga momo‘e mai pea o ia, ua taulata mai.
26Ona iloa lea e le tagata vaai o le tasi tagata ua momo‘e mai; ua valaau le tagata vaai i le leoleo o le faitotoa, ua faapea ane, Faauta, o le tasi tagata ua momo‘e toatasi mai. Ua fai atu le tupu, O i ai foi se tala.
27Ona fai mai lea o le tagata vaai, Ou te vaai i le momo‘e o lē muamua, e pei o le momo‘e o Aimaasu le atalii o Satoka. Ona fai atu lea o le tupu, O le tagata lelei o ia, na te aumaia le tala lelei.
28Ona valaau lea o Aimaasu, ua fai mai i le tupu, Ia manuia; ona ifo toele ai lea o ia i le tupu; ua fai mai, Ia faafetaia Ieova lou Atua, o le ua tuuina mai ia tagata e na sii le taua i lo‘u alii le tupu.
29Ua fai ane le tupu, O saogalemu ea le taulealea o Apisaloma? Ona fai mai ai lea o Aimaasu, Na a‘u iloa le nunu o tagata ina ua auina mai le auauna a le tupu e Ioapo ma lau auauna, a ou te lei iloa po o le a.
30Ua fai atu le tupu, Faatafa ia oe, ma e tu ese ane; ona faatafa ai lea o ia, ma tu ese.
31Faauta foi, ua sau Kusi; ua fai mai Kusi, Lo‘u alii e, le tupu, o le tala lelei! Auā ua laveaiina oe e Ieova i lenei aso ai lima o e na tutū mai uma lava e tau ma oe.
32Ua fetalai atu le tupu ia Kusi, O saogalemu ea le taulealea o Apisaloma? Ua fai mai Kusi, Ia pei o lea taulealea e ua ita i lo‘u alii le tupu, atoa ma i latou uma e tutū mai e agaleaga ia te oe.
33Ona mutimutivale ai lea o le finagalo o le tupu; ua alu ae ai i le afeafe i luga o le faitotoa, ua tagi, ua faapea fano, Lo‘u atalii Apisaloma e, lo‘u atalii e, lo‘u atalii Apisaloma e! Ta fia oti e sui ai oe Apisaloma lo‘u atalii e, lo‘u atalii e!
Who We AreWhat We EelieveWhat We Do
2025 by iamachristian.org,Inc All rights reserved.
