1Ia e faalatalata mai foi ia te oe o lou uso o Arona atoa ma ona atalii faatasi ma ia, ai le fanauga a Isaraelu, ina ia fai ma ositaulaga ia te au, o Arona, o Natapu, ma Aviu, o Eleasaro, ma Itamaro, o atalii o Arona.
2E te faia foi ofu sa mo lou uso o Arona e mamalu a‘i ma matagofie a‘i.
3E te tautala atu i tagata popoto uma lava, o e ua ou faatumuina i le loto e poto, ia latou faia ofu mo Arona e faapaiaina ai o ia, ina ia fai o ia ma ositaulaga ia te au.
4O ofu nei latou te faia, o le ufifatafata, ma le efota, ma le ofu talaloa, ma le ofu tino faalalelei, ma le pulou ie, ma le fusi; ia latou faia foi ofu sa mo lou uso o Arona, atoa ma ona atalii, ina ia fai ma ositaulaga ia te au.
5Ia latou ave le auro, ma le ie uli, ma le pāuli, ma le mūmū, ma le ie vavae;
6ia latou faia le efota i le auro, ma le ie uli, ma le pāuli, ma le mūmū, ma le ie vavae ua milo ona manoa i le galuega a le tufuga poto.
7Ia faasooina ona tau‘au e lua i ona tafatafa, ia faatasia.
8O le fusi faalanu eseese foi o le efota o i ona luga, e pei o le galuega e i ai, e faia i ia lava mea, o le auro, ma le ie uli, ma le pāuli, ma le mūmū, ma le ie vavae ua milo ona manoa.
9Ia e ave foi maa soama e lua, ma togitogi ai igoa o atalii o Isaraelu;
10e ono o latou igoa i le tasi maa, ma igoa o le isi toaono i le tasi maa, e faatatau i o latou fanau mai.
11O le galuega a le tufuga togitogi maa, e pei o le togitogiga o le maa o faamaufaailoga, e te togitogiina igoa o atalii o Isaraelu i ia maa e lua; ia e faia, ia faamau i taai auro.
12E te tuu foi maa e lua i tau‘au o le efota, o maa e manatuaina ai le fanauga a Isaraelu; e ave foi e Arona o latou igoa i luma o Ieova, i ona lava tau‘au e lua e manatuaina ai i latou.
13E te faia foi taai auro.
14E lua foi filifili auro lelei e te faia ia tutusa i le galuega faafilifili uamea, ia faamauina foi o filifili auro i taai.
15E te faia foi le ufifatafata o le faamasinoga i le galuega a le tufuga poto, e pei o le galuega i le efota e te fai ai; e te faia i le auro, ma le ie uli, ma le pāuli, ma le mūmū, ma le ie vavae ua milo ona manoa.
16E faia faatāfafa ma faasāutualua; o le āga lona umi, o le āga foi lona lau.
17E te tuuina foi i tuugāmaa o atu maa e fa; o le uluai atu maa, o le salikea, ma le topasi, ma le pereketa, o le atu maa muamua lea.
18O lona atu lua, o le nofeka, ma le safaira, ma le ialoma.
19O lona atu tolu foi, o le lesema, ma le sevo, ma le aselama.
20O loua atu fa foi, o le tasesa, ma le soama, ma le iasepi; ia faamauina lava ia i totonu o le taai auro i o latou tuugamaa.
21Ia i ai i na maa o igoa o atalii o Isaraelu e sefulu ma le lua, e faatatau i o latou igoa, pei o le togitogiga o le faamaufaailoga, e taitasi ma lona igoa, e tusa ma itu aiga e sefulu ma le lua.
22E te faia foi i luga o le ufifatafata, o filifili auro lelei ia tutusa, o le galuega faafilifili uamea.
23E te faia foi i luga o le ufifatafata o mama auro e lua, ma ia e tuu ia mama e lua i pito e lua o le ufifatafata.
24E te tuu foi filifili auro e lua i mama e lua i pito o le ufifatafata.
25E te tuu foi isi pito e lua o filifili auro e lua i taai e lua, ma tuu i tau‘au o le efota i ona luma.
26E te faia foi mama auro e lua, ma e tuuina ai i pito e lua o le ufifatafata i ona tafatafa lava, o loo faasaga i le efota i totonu.
27E lua foi mama auro e te faia, ma tuu ai i itu e lua i lalo o le efota, e lata ane i lona itu i luma, e felatai ma le mea e faasooina i luga o le fusi faalanu eseese o le efota.
28Ia latou nonoa foi le ufifatafata i ona mama i mama o le efota i le manoa uli, ina ia i luga ae o le fusi faalanu eseese o le efota, ina ne‘i te‘a ese le ufifatafata i le efota.
29E ave foi e Arona o igoa o atalii o Isaraelu i le ufifatafata o le faamasinoga i lona fatafata, pe a ulu atu ia i le mea paia, e fai ma faamanatuga e le aunoa i luma o Ieova.
30E te tuu foi le Urima ma le Tumena i le ufifatafata o le faamasinoga, ina ia i luga lava o le fatafata o Arona, pe a ulu atu o ia i luma o Ieova; e ave foi e Arona le faamasinoga mo le fanauga a Isaraelu i luga o lona fatafata i luma o Ieova e le aunoa.
31E te faia le ofu talaloa o le efota ia atoatoa o le ie uli.
32E faia foi se ua i lona pito i luga i totonu, e fai ai se mea lalagaina e afei faataaliolio ai i le ua, e pei o le ua o le ofutau ina ia le masae.
33E te faia foi i ona tafatafa o rimoni i le ie uli, ma le pāuli, ma le mūmū, e faataaliolioina ai ona tafatafa; ma tagitagi auro e vava a‘i e faataaliolioina ai;
34o le tagitagi auro ma le rimoni, o le tagitagi auro ma le rimoni, i tafatafa o le ofu talaloa e faataaliolioina ai.
35E ofu ai Arona pe a auauna o ia, ina ia lagona lona tagitagi pe a ulu atu ia i le mea paia i luma o Ieova, pe a toe alu foi i fafo, ne‘i oti o ia.
36E te faia foi le mea pupula i le auro lelei, ma e togitogi ai, pei o le togitogi i le faamaufaailoga, o lenei upu, e paia ia ieova.
37E te tuuina foi i le manoa uli, ia i ai lava i le pulou ie, i luma lava o le pulou ie.
38Ia i ai foi i le muaulu o Arona, ia ave e Arona le agasala i mea sa, e faasaina e le fanauga a Isaraelu i a latou taulaga sa uma lava, ia i ai pea lava i lona muaulu, ina ia alofagia i latou i luma o Ieova.
39E te lalaga manu foi le ofu tino i le ie vavae, e te faia le pulou i le ie vavae, e te fai foi le fusi i le galuega a le tufuga fai ie lanu eseese.
40Ia e faia foi ofu tino mo atalii o Arona; e te faia foi mo i latou o fusi, atoa ma pulou e te faia mo i latou, ina ia mamalu ai ma matagofie ai.
41E te faaofu ai foi lou uso, o Arona, ma ona atalii faatasi ma ia; e te faauu foi ia i latou, ma e tofia i latou, ma faapaiaina i latou e fai le faiva o ositaulaga ia te au.
42E te faia foi mo i latou o ofu vae i ie vavae, e ufiufi ai o latou tino, e gata mai i o latou sulugatiti ia oo i o latou ogāvae;
43e oofu ai Arona ma ona atalii, pe a latou ulufale i le fale fetafai o le faapotopotoga, pe faalatalata atu i le fata faitaulaga e auauna i le mea paia, ina ne‘i nofo sala i latou, ma oti ai; e fai lea ma tulafono e faavavau ia te ia, atoa ma ana fanau pe a mavae atu o ia.
Who We AreWhat We EelieveWhat We Do
2025 by iamachristian.org,Inc All rights reserved.
