1O ia ona aso na faapotopoto ai e Filisitia a latou ‘au e sii atu le taua ia Isaraelu; ona fai mai lea o Akisa ia Tavita, Ia e matuā iloa, o le a ta o atu ma a‘u i le taua, o oe atoa foi ma ou tagata.
2Ona fai atu lea o Tavita ia Akisa, O lea foi e te silafia ai le mea e faia e lau auauna; ona fai mai lea o Akisa ia Tavita, O lea foi ou te tofia ai oe e leoleo i lo‘u ulu i aso uma.
3(Ua oti Samuelu, sa taufaitagitu‘i Isaraelu uma ona o ia, ma latou tanu ia te ia i Rama lona nuu; ua faapea foi e Saulo taulāitu fafine, ma e ua i ai aitu vavalo nai le nuu.)
4Ua faapotopoto Filisitia, ua o atu, ma to lauapi i Sunema; ua faapotopoto foi e Saulo ia Isaraelu uma, ma to lauapi i latou i Kilepoa.
5Ua vaai atu Saulo i le itu taua a Filisitia, ona fefe ai lea o ia, ma gatete tele ai lona loto.
6Ua fesili atu foi Saulo ia Ieova, a ua le tali mai Ieova ia te ia i se miti, po o le Urima, po o se perofeta.
7Ona fai mai lea o Saulo i ana auauna, Ina saili ia se fafine ua i ai se aitu vavalo, ou te alu atu ia te ia, ma ou fesili atu ia te ia. Ua fai atu ana auauna ia te ia, Faauta, o le fafine ua i ai le aitu vavalo o loo i Enetoro.
8Ona faatagā tagata ese lea o Saulo, ua ofu o ia i ofu ese, ua alu atu o ia ma tagata e toalua ma ia; ua oo po atu i le fafine, ua fai atu ai, O lou aitu vavalo e te faaali mai ai ia te au, ma faatulai mai ai ia te au lē ou te fai atu ai ia te oe.
9Ona tali mai lea o le fafine ia te ia, Faauta, ua e iloa le mea ua faia e Saulo, ua ia fasia taulāitu fafine, ma e ua i ai aitu vavalo i le nuu; o le a le mea ua e faamailei mai ai ia te au, ou te oti ai?
10Ona tauto lea o Saulo ia Ieova ia te ia, ua faapea, O loo soifua Ieova, e le oo se leaga ia te oe i lenei mea.
11Ona fai mai le o le fafine, O ai ea ou te faatu mai ia te oe? Ua fai atu o ia, O Samuelu, e te faatu mai ai ia te au.
12Ua vaai le fafine ia Samuelu, ona alaga lea o ia ua leo tele; ua fai mai foi le fafine ia Saulo, O le a le mea ua e pelogia ai a‘u? O oe lava o Saulo.
13Ona fai atu lea o le tupu ia te ia, Aua le fefe; o ai ea ua e iloa? Ua fai mai le fafine ia Saulo, Ua ou iloa atu o loo o ae nai le eleele.
14Ona fai atu lea o ia ia te ia, O le a lona tino mai? Ua fai mai o ia, O le toeaina ua alu ae, o loo ofu i le ofu talaloa. Ona iloa ai lea e Saulo, o Samuelu lea; ua punou ona mata i le eleele,
15ma ifo atu ia te ia. Ua fai mai Samuelu ia Saulo, O le a le mea ua e faasoesa mai ai ia te au, i le faatulai ae ia te au? Ona tali atu ai lea o Saulo, Ua ou atuatuvale tele lava; o Filisitia, ua latou sii mai le taua ia te au, ua afio ese foi le Atua ia te au, ua le toe tali mai o ia ia te au i perofeta, po o se miti; o lea ua ou valaau atu ai ia te oe, ia e faailoa mai se mea ou te faia.
16Ona fai mai lea o Samuelu, O le a foi e te fesili mai ai ia te au, pe afai ua afio ese Ieova ia te oe, ma ua foi oe mona fili?
17Ua faia lava e Ieova le mea na ia fetalai mai ia te au; ua saeeseina e Ieova le malo nai ia te oe, ua tuu atu ai i le tasi tagata, o Tavita lea.
18Auā ua e le faalogo i le siufofoga o Ieova, ma ua e le faoo lona toasa tele ia Amaleka, o le mea lea ua fai ai e Ieova lenei mea ia te oe i nei ona aso.
19Ua tuuina atu foi e Ieova o Isaraelu faatasi ma oe i lima o Filisitia; a taeao foi, ona tatou faatasi lea ma a‘u, o oe atoa ma ou atalii; e tuuina atu foi e Ieova ‘au a Isaraelu i lima o Filisitia.
20Ona paū loa lea o Saulo, ua taatia faaloloa i le eleele, ua matuā mata‘u lava i upu a Samuelu, ua leai foi se malosi ia te ia; auā ua ia le ‘ai, ua atoa le ao ua atoa foi le po.
21Ona sau lea o le fafine ia Saulo, ua vaai, o loo atuatuvale lava o ia; ona fai mai lea o ia ia te ia, Faauta, ua faalogo lau auauna fafine i lou siufofoga, ma a‘u tuu lo‘u ola i lo‘u lima, ua ou faalogo foi i au afioga na tŭlei mai ia te au;
22o lenei, ia e faafofoga mai lava oe i le leo o lau auauna fafine, ou te laulauina atu i ou luma sina mea e taumafa e te taumafa ai, ina ia e malosi ai e maliu atu i lau malaga.
23A ua ia le mafai; ua fai ane, Ou te le ‘ai; a ua tauanau ia te ia ana auauna atoa ma le fafine, ona faalogo lea o ia i a latou upu; ua tulai nai le eleele, ua nofo i le moega.
24Sa i le fafine le tamai povi na fagaina i le fale, ua ia faataalise ona fasi; ua avane foi falaoa ma palu, ua tunu foi le areto lē faafefeteina.
25Ona au mai ai lea i luma o Saulo ma ana auauna; ua latou aai, ona tulai lea o i latou, ua o i lea lava po.
Who We AreWhat We EelieveWhat We Do
2025 by iamachristian.org,Inc All rights reserved.
