1O le alofa mai o Ieova ou te pese ai lava e faavavau; ou te faailoa atu i lo‘u gutu lou faamaoni i lea tupulaga ma lea tupulaga.
2Auā na ou faapea ane, E atiina ae le alofa e faavavau lava; o le lagi lava e te faatumauina i ai lou faamaoni.
3Ua ma osia le feagaiga ma le na ou fiilfilia, na ou tauto lava ia Tavita la‘u auauna.
4Ou te faatumauina lau fanau e faavavau lava; ou te atiina ae foi lou nofoālii i lea tupulaga ma lea tupulaga. Selā.
5Ieova e, e vivii le lagi i ou vavega; e viia foi lou faamaoni i le faapotopotoga o le au paia.
6Auā o ai ea i le lagi e faatusaina Ieova? O ai so le fanau a e malolosi e tusa ma Ieova?
7O le Atua e tatau ona matautia tele i le faapotopotoga o le au paia; e tatau foi ona matautia o ia e i latou uma o e vagavagai ia te ia.
8Ieova e, le Atua o ‘au, o ai sē malosi e tusa ma oe Ioa e? O lou faamaoni foi e siosio ai ia te oe.
9O oe lava, e te pule i le faamaualuga o le sami; a sousou ona peau, o oe lava e laolao ai.
10O oe lava, na e tu‘imomomoina Raava e pei o se ua fasiotia; o lou aao malosi ua e faataapeape ai i e na ita ia te oe.
11E ou le lagi, e ou foi ma le lalolagi; o oe, na e faavaeina le atu laulau atoa ma mea ua tumu ai.
12O oe, na e faia le itu i matu ma le itu i toga; o Tapora ma Heremoni la te alaga fiafia lava i lou suafa.
13O ia te oe le aao malosi; e malosi lava lou aao, o loo maualuga lou aao taumatau.
14O le amiotonu ma le faamasinoga o loo tumau ai lou nofoālii; o le alofa ma le faamaoni la te muamua atu i ou luma.
15Amuia le nuu ua latou lagona le leo fiafia; Ieova e, latou te savavali i le malamalama o ou fofoga.
16Latou te fiafia lava i lou suafa i aso uma lava; o lau amiotonu foi e maualuluga ai i latou.
17Auā o oe lo latou matagofie e i ai le malosi; o lou finagalo alofa foi ua faamaualugaina ai lo matou nifo.
18Auā o lo matou talita o Ieova lava lea; o le Paia foi o Isaraelu, o lo matou tupu lava ia.
19Ona e fetalai ane ai lea i le faaaliga i lou tagata amio Atua, ma e faapea ane, Ua a‘u tuuina atu le fesoasoani i le ua malosi; ua ou faaeaina le ua filifilia mai le nuu.
20Ua ou maua Tavita la‘u auauna; ua ou faauuina o ia i la‘u uu paia;
21o le e tumau ia te ia lo‘u lima; e faamalosia foi o ia e lo‘u lima.
22E le faasaua ia te ia le ua ita ia te ia; e le faatigaina foi o ia e le tagata amio leaga.
23Ou te tu‘ipalaina i ona luma e ua ita ia te ia; ou te taia foi e ua ‘ino‘ino ia te ia.
24A e ia te ia lava lo‘u faamaoni ma lo‘u alofa; o lo‘u igoa foi e faamaualugaina ai lona nifo.
25Ou te faaoo atu foi lona lima i le sami ma lona lima taumatau i vaitafe.
26E valaau mai o ia ia te au, O lo‘u Tamā lava oe, o lo‘u Atua, ma le papa o lo‘u olataga.
27O a‘u foi, ou te faia o ia ma ulumatua, e silisili o ia i tupu o le lalolagi.
28E tumau pea lo‘u alofa ia te ia e faavavau, e faamaonia foi la‘u feagaiga ia te ia.
29Ou te tofia lana fanau ia faavavau, o lona nofoālii foi e pei o aso o le lagi.
30Afai e lafoaiina la‘u tulafono e ana fanau, ma latou le savavali i a‘u faamasinoga;
31afai latou te solia a‘u tulafono, ma latou le tausia a‘u poloaiga.
32Ona ou asiasia ai lea o latou solitulafono i le sasa, ou te asiasia foi a latou amio leaga i ta.
33A o lo‘u alofa e le mavae atu lea ia te ia, ou te le pepelo foi i lo‘u faamaoni.
34Ou te le tuumavaega la‘u feagaiga, ou te le liliu lava le upu ua paū atu i o‘u laugutu.
35Na ou tauto faatasi i lo‘u paia, ou te le pepelo lava ia Tavita.
36E faavavau lava lana fanau, o lona nofoālii foi e pei o le la lea i o‘u luma.
37Pei o le masina e faatumauina ia e faavavau, ma le molimau i le lagi e faamaoni lava. Selā.
38A o oe, ua e teteeina mai ma e inosia mai, ua e matuā toasa mai i le na e faauuina.
39Ua e lafoai le feagaiga a lau auauna; ua e solia lona palealii i le eleele.
40Ua e faasoloina ona pa uma lava; ua e faia foi ona ‘olo ma faupuegamaa.
41Ua vete foi ana mea e i latou uma ua ui ane i le ala; ua faalumaina o ia e i latou ua tuaoi ma ia.
42Ua e faamaualugaina le lima taumatau o e ita ia te ia; ua e faa‘oli‘olia i latou uma o e fai o ia mo latou fili.
43Ua e liliuesea foi le mata o lana pelu, ma ua e le faatumauina o ia i le taua.
44Ua e faaiuina lona mamalu, ua e lafo i lalo i le eleele lona nofoālii.
45Ua e faapuupuuina aso o lona taulealea; ua e faaofu ia te ia i le mā. Selā.
46Ieova e, e te lafi oe seia afea? E faavavau ea? E mu lou toasa e pei o le afi seia afea?
47Ia e manatua le puupuu o lo‘u olaga; se a le mea ua e faia ai fua le fanau uma a tagata.
48O ai se tagata ola na te le iloa le oti? Na te laveaiina ea lona agaga ai le pule a le tuugamau? Selā.
49Le Alii e, o i fea lou alofa anamua, na e tauto ai i lou faamaoni ia Tavita?
50Le Alii e, ia e manatua le faalumaina o au auauna; ua ou tauave i lo‘u fatafata upu uma a nuu e tele;
51ua faaluma mai ai o e ua ita ia te oe Ieova e; ua latou faalumaina ai tulagāvae o le na e faauuina.
52Ia faafetaia Ieova e faavavau lava. Amene ma Amene.
Who We AreWhat We EelieveWhat We Do
2025 by iamachristian.org,Inc All rights reserved.
