1Ona alu atu ai lea o Apimeleko le atalii o Ierupaala i Sekema i tuagane o lona tinā, ua tautalatala ma i latou atoa ma le aiga uma lava o le tamā o lona tinā, ua faapea atu,
2Se‘i outou matuā fai atu i tagata uma o Sekema, Po o i fea ona malie ia te outou, pe pule ia te outou o atalii uma o Ierupaala o tagata e toafitugafulu lava ia, pe pule ia te outou le tagata e toatasi? Ia outou manatua foi, o a‘u nei o outou ivi ma o outou aano.
3Ona tautala lea ia te ia o tuagane o lona tinā i tagata uma o Sekema ia upu uma; ona uai atu ai lea o latou loto ia Apimeleko, auā ua latou faapea ane, O lo tatou uso lava ia.
4Ona latou avatu ai lea ia te ia o tupe e fitugafulu mai le fale o Paala-perita, na totogi a‘i e Apimeleko o tagata faatauvaa ma e ulavavale, ina ia latou mulimuli atu ia te ia.
5Ua alu atu ia i le aiga o lona tamā i Ofira, ona fasiotia lea e ia i luga o le maa e tasi ona lava uso, o atalii o Ierupaala e toafitugafulu tagata; a ua sao Iotama le atalii o Ierupaala, o le uii ia; auā na lafi lava ia.
6Ona faapotopoto ai lea o tagata uma o Sekema, atoa ma le aiga uma o Milo; ona latou o lea, ma latou tofia Apimeleko e fai ma tupu i le mea ua tu ai le aluna i Sekema.
7Ona ta‘ua atu lea ia Iotama; ona alu ai lea o ia, ma tu i le tumutumu o le mauga o Keresema, ua ia leo tele, ma alaga, ua faapea atu ia te i latou, Outou tagata o Sekema e, ia outou faalogologo mai ia te au, ina ia faafofoga le Atua ia te outou,
8Na o atu laau e faauuina se tupu mo i latou; ona latou fai atu ai lea i le olive, Ina fai ia oe mo matou tupu.
9A ua fai mai le olive ia te i latou, Ou te tuuna ea lo‘u lololo, o le mea e faamamafiina atu ai le Atua atoa ma tagata, i lo‘u alu ai e pule i laau?
10Ona fai atu ai lea o laau i le mati, Ina sau ia oe, e fai oe mo matou tupu.
11A ua fai mai le mati ia te i latou, Ou te tuuna ea lo‘u suamalie, ma o‘u fua lelei, i lo‘u alu ai e pule i laau?
12Ua fai atu foi laau i le vine, Ina sau ia oe, e fai oe mo matou tupu.
13Ona fai mai ai lea o le vine ia te i latou, Ou te tuuna ea lo‘u uaina, o le mea e faafiafia i le Atua atoa ma tagata, i lo‘u alu ai e pule i laau?
14Ua fai atu foi laau uma i le laau tuitui, Ina sau ia oe, e fai oe mo matou tupu.
15Ona fai mai ai lea o le laau tuitui i laau, Afai tou te faamaoni ona faauuina o a‘u e fai mo outou tupu, ia outou o mai, ia outou faatuatua mai i lo‘u paolo; a e afai e leai, ia alu atu le afi ai le laau tuitui, ma faaumatia arasi o Lepanona.
16O lenei, afai ua faamaoni ma ua tonu la outou amio, ina ua outou tofia o Apimeleko e fai ma tupu; afai foi ua outou agalelei atu ia Ierupaala ma lona aiga, ma ua outou faia ia te ia e tusa ma mea na ia faia;
17auā o lo‘u tamā na taulia le taua mo outou, na ia tuulafoaiina lona ola ina ia laveaiina ai outou ai lima o Mitiana;
18a ua laga mai outou i le aso nei i le aiga o lo‘u tamā, ma ua outou fasiotia ona atalii, o tagata e toafitugafulu, i luga o le maa e tasi; o Apimeleko foi o le tama a lana auauna fafine ua outou faia o ia ma tupu o tagata o Sekema, auā o lo outou uso lava ia.
19A e afai ua faamaoni ma ua tonu la outou amio ia Ierupaala ma lona aiga i lenei lava aso, ia outou fiafia lava ia Apimeleko, o ia foi ia fiafia lava ia te outou.
20A e afai e leai, ia alu atu le afi ai ia Apimeleko e faaumatia ai tagata o Sekema ma le aiga o Milo; ia alu atu foi le afi ai tagata o Sekema ma le aiga o Milo e faaumatia ai Apimeleko.
21Ona tele vave ai lea o Iotama, ua sola lava ia, ua alu atu i Peeri, ua ia nofo ai ona o Apimeleko lona uso.
22Na pule Apimeleko ia Isaraelu i tausaga e tolu;
23ona tuuina atu ai lea e le Atua o le loto leaga ia Apimeleko ma tagata o Sekema; ona faa‘ole‘ole ai lea o tagata o Sekema ia Apimeleko;
24ina ia oo le saua na faia i atalii o Ierupaala e toafitugafulu, ma ia tauia lo latou toto ia Apimeleko lo latou uso, na na fasiotia i latou, atoa ma tagata o Sekema e na fesoasoani ia te ia i le fasiga o ona uso.
25Ua tofia e tagata o Sekema nisi e lamalama ia te ia i tumutumu o mauga; ua latou faoa mea a i latou uma o e ui ane ia i latou i lea ala; ona ta‘u atu ai lea ia Apimeleko.
26Ona o mai ai lea o Kaala le atalii o Epeto ma ona uso, ua latou o atu i Sekema; ona faalagolago ai lea ia te ia o tagata o Sekema.
27Ua latou o atu i le fanua, ua latou tau vine i o latou tovine, ua latou solia foi fua o le vine, ua pepese fiafia i latou; ua latou o atu foi i le malumalu o lo latou atua, na latou aai, ma inu, ma ua latou fetuu ia Apimeleko.
28Ona faapea atu ai lea o Kaala le atalii o Epeto, Po o ai ea Apimeleko, po o ai foi Sekema tatou te auauna i ai? E le o le atalii o Ierupaala ea? O Sepula foi o le ua tofia e ia e pule? Ia outou auauna i tagata o Hamoro le tamā o Sekema; se a le mea tatou te auauna ai ia te ia?
29E, ana ia te au le pule i le nuu nei, po ua ou ave ese ai ia Apimeleko! Ua faapea atu foi o ia ia Apimeleko, Ina faatoatele ia au ‘au, ma e sau.
30Ua faalogo foi Sepula le alii o le aai i upu a Kaala le atalii o Epeto, ona matuā tupu ai lea o lona ita.
31Ua ia aauina atu faalilolilo le sāvali ia Apimeleko, e faapea atu, Faauta, o Kaala le atalii o Epeto ma ona uso, ua latou o mai i Sekema; faauta foi, ua latou lagaina le aai e fou ia te oe.
32O lenei, ia e laga po mai oe, atoa ma le nuu ua ia te oe, ma e tanu ‘au i le vao;
33a oo foi i le taeao i le faatoa alu ae o le la, e te laga mai ai, ma e faasalalau mai i luma o le aai; faauta foi, o ia ma le nuu ua ia te ia, a latou o atu ia te oe, ona faitalia lea oe se mea e te faia ia te ia.
34Ona laga po ai lea o Apimeleko atoa ma le nuu uma ua ia te ia, ua latou tanu ‘au e latalata ane i Sekema o ‘au e fa.
35Ua alu atu foi Kaala le atalii o Epeto, ua tu foi o ia i le puipui o le faitotoa o le aai; ona laga mai ai lea o Apimeleko, ma le nuu ua ia te ia sa tanu ‘au.
36Ua iloa atu e Kaala le nuu, ona faapea atu ai lea o ia ia Sepula, Faauta i le nuu ua alu ifo i tumutumu o mauga. Ona fai mai ai lea o Sepula ia te ia, Ua e iloa tau o ata o mauga e peiseai ni tagata.
37Ona toe fai atu ai lea o Kaala, ua faapea atu, Faauta, ua o ifo le nuu mai lea mea maualuga i le nuu, ua alu ane foi le tasi ‘au i le aluna o i Meoneni.
38Ona fai atu ai lea o Sepula ia te ia, O fea o i ai nei lou gutu, sa e faapea ai, O ai ea Apimeleko matou te auauna ia te ia? E le o le nuu ea lenei sa e ta‘ufaatauvaaina? O lenei, alu atu ia, tou te tau ma i latou.
39Ona alu atu lea o Kaala i luma o tagata o Sekema, ua tau ma Apimeleko.
40Ona tulia lea o ia e Apimeleko, ua sola lava ia i ona luma; e toatele o i latou ua pauu ua manunua, ua oo atu i le puipui o le faitotoa.
41Ua nofo Apimeleko i Aruma, a ua tuli e Sepula ia Kaala ma lona au uso, ina ia le nonofo i latou i Sekema.
42Ona oo lea i le taeao, ua o atu ai le nuu i le vao; ua latou ta‘u atu ai ia Apimeleko.
43Ona ave ai lea e ia o le nuu, ua ia vaea i latou i ‘au e tolu, ua tanu ‘au ai i le vao; ona vaai lea o ia, faauta, ua o mai le nuu nai le aai, ona laga atu lea o ia ia te i latou, ma fasi ia te i latou.
44Ua salalau Apimeleko ma le ‘au sa ia te ia, ua latou tutū atu i le puipui o le faitotoa o le aai; a o ‘au e lua ua faasalalau i latou i e na i ai uma lava i le vao, ma latou fafasi ia i latou.
45Ua tau lava Apimeleko ma le aai, ua po lava lea aso; ua ia maua le aai, ma le nuu sa i ai ua na fasia, ma na sofaia le aai, ma na luluina ai i le masima.
46Ua faalogo ai tagata uma i le ‘olo o Sekema, ona latou ulufale ai lea i le ‘olo maualuga i le malumalu o le atua o Perita.
47Ua ta‘u atu ia Apimeleko, ua faapotopotoina tagata uma i le ‘olo o Sekema;
48ona alu ae lea o Apimeleko i le mauga o Salemoni, o ia atoa ma le nuu uma sa ia te ia; ua ave e Apimeleko to‘i i lona lima, ua na vaea le la laau, ua sii, ma faaee i lona ua, ma na fai atu i le nuu sa ia te ia, O le mea ua outou iloa ua ou faia, ia vave ona fai faapea e outou.
49Ona ta lava lea e le nuu uma, e taitasi ma lana la laau, ma latou mulimuli atu ia Apimeleko; ona latou tuu atu ai lea i le ‘olo maualuga, ma latou susunu i le afi le ‘olo maualuga i o latou luga; ua oti ai tagata uma o le ‘olo o Sekema, pe atoa le afe o tane ma fafine.
50Ona alu atu lea o Apimeleko i Tipesa, ua to ai lauapi i Tipesa, ona aea ai lea.
51Sa i ai le ‘olo malosi i totonu o le aai, na sosola i ai o tane ma fafine uma, o tagata uma lava o le aai; ua latou pupuni ai ia te i latou, ma latou o ae i le fogā‘olo.
52Ua oo atu Apimeleko i le ‘olo, ma tau ai le taua; ua ia faalatalata foi i le puipui o le ‘olo e faamu ai i le afi.
53Ona lafo lea e le tasi fafine o le fasi maaolo i luga o le ulu o Apimeleko, ua ia momomo ai lona ulu.
54Ona valaau loa lea o ia i le taulealea o lona soātau, ua fai atu ia te ia, Se‘i mai ia lau pelu, ma e faaoti ia te au, ne‘i latou faapea ia te au, O le fafine le na fasiotia ai o ia. Ona tutu‘i ai lea ia te ia e lona taulealea, ua oti ai.
55Ua iloa e tagata o Isaraelu ua oti Apimeleko, ona latou taitasi lea ma alu i lona nuu.
56Ua faapea ona taui atu e le Atua le leaga o Apimeleko na ia faia i lona tamā, ina ua fasioti i ona uso e toafitugafulu;
57o le leaga uma foi o tagata o Sekema ua faafoi atu e le Atua i o latou ulu; ua oo foi ia te i latou le fetuu o Iotama le atalii o Ierupaala.
Who We AreWhat We EelieveWhat We Do
2025 by iamachristian.org,Inc All rights reserved.
