1O le afioga na oo mai ia Ieremia mai ia Ieova ua faapea mai,
2O loo faapea ona fetalai mai o Ieova, le Atua o Isaraelu, ua faapea mai, Ina tusi ia i le tusi, o upu uma ua ou fai atu ai ia te oe.
3Auā o loo fetalai mai Ieova, Faauta, o le a oo mai ona po, ou te faafoisia mai ai le tafeaga o lo‘u nuu o Isaraelu ma Iuta, o loo faapea mai ai Ieova; ou te toe faafoisia mai i latou i le laueleele na ou foaiina atu ai i o latou tamā, e fai foi lea mo i latou.
4O upu foi nei ua fetalai mai ai Ieova ia Isaraelu ma Iuta.
5E moni, o loo faapea ona fetalai mai o Ieova, Ua tatou lagona le taalili o le gatete, o i ai le mata‘u, a e le o le filemu.
6O le mea lea ina fesili atu ai ia, ma ia outou vaavaai, pe fanau ea se tane? O le a ea le mea ou te iloa atu ai i tane uma, e taitasi ma ona lima i ona itu, e pei o se fafine a fanau; o mata uma foi ua liua, ua matamata vale lava?
7Aue! auā o le aso tele lea, e leai sona tusa; o ona po lava ia o le puapuaga o Iakopo; a e faaolaina ai o ia.
8O loo fetalai mai foi Ieova o ‘au, O le aso lava lea ou te gauia ai lana amo i lou ua, ou te motusiesea foi ou noanoaga, e le toe auauna foi o ia i tagata ese.
9A e latou te auauna ia Ieova lo latou Atua, ma Tavita lo latou tupu, ou te faatuina ai mo i latou.
10O oe foi, Iakopo e, la‘u auauna, aua e te fefe, o loo fetalai mai ai Ieova; aua foi e te mata‘u o oe Isaraelu e; auā faauta, ou te faaola ia te oe ai le nuu mamao, ma lau fanau ai le nuu ua tāfea ai i latou; e foi mai lava Iakopo, e toto‘a foi o ia, ma nofo filemu, e leai foi se tasi e faamatau ia te ia.
11Auā o loo fetalai mai Ieova, ou te ia te oe e faaola ia te oe; e ui lava ina ou matuā faaumatia nuu uma na ou faataapeapeina ai oe, a e ou te le matuā faaumatia oe, ou te aoai faatatau foi ia te oe, a e ou te le matuā faasaoina oe.
12Auā o loo faapea ona fetalai mai o Ieova, E le mafai ona fōia lou manua, e matuā leaga lou manua.
13E leai se tasi e faia lau finauga, ia fusia lou manua; e le ia te oe ni fusi e malolo ai.
14Ua faagalogaloina oe e i latou uma sa mananao ia te oe; ua latou le saili ia te oe; auā ua ou taia oe i le ta a le ua ita, ma le aoaiga a le ua saua, ona o le tele o lau amioletonu; ua faateleina au agasala.
15Pe se a le mea ua e alaga mai ai ona o lou manua? E matuā tele lou tiga ona o le tele o lau amioletonu; ua faateleina au agasala, o le mea lea na ou faia ai ia mea ia te oe.
16A e ui i lea e faaumatia ai i latou uma o e faaumatia oe; o i latou uma foi ua saua ia te oe, e ō lava i latou uma i le tafeaga; o e ua faoa au mea, e faoa lava a latou mea; o i latou uma ua vetea oe, ou te tuuina atu ia vetea i latou.
17Auā ou te faamaloloina oe, ou te fofōina ou manua, o loo fetalai mai ai Ieova; auā ua latou ta‘ua oe, O le ua tulia; O Siona lena, e leai se tasi ua saili atu i ai.
18O loo faapea ona fetalai mai o Ieova, Faauta, ou te toe faafoisia mai le tafeaga o fale ie o Iakopo, ma ou alofa atu i ana mea e nofo ai; e faatuina foi le aai i le mea maupuepue sa i ai, e āina foi le maota e pei o ona tuga tuai.
19E tupu mai ai foi le viiga, ma le leo o e sisiva; ou te faatoateleina i latou, a e le faatoaitiitina i latou; ou te faatupuina foi lo latou mamalu, a e le faaleaogaina i latou.
20O a latou fanau e pei o anamua i latou, ou te faatumauina foi i o‘u luma lo latou faapotopotoga, ma ou taui atu ia te i latou uma o e faasaua ia te i latou.
21O lo latou alii o lo latou lava ia, ma le na te pule ia te i latou e tupu mai o ia mai ia te i latou; ou te faalatalataina mai o ia, ona faalatalata mai ai lea o ia ia te au; auā o ai ea o ia ua faamalosi i lona loto e faalatalata mai ia te au? o loo fetalai mai ai Ieova.
22E fai foi outou mo‘u nuu, o a‘u foi e fai mo outou Atua.
23Faauta, ua alu atu le afā mai ia Ieova i le toasa, o le afā fulifaō; e pesi tetele mai i luga o ulu o e amio leaga.
24E le toe liliu le toasa tele o Ieova, seia faia e ia, seia faataunuuina foi e ia manatu o lona finagalo; tou te mafaufau i ai i aso amuli.
Who We AreWhat We EelieveWhat We Do
2025 by iamachristian.org,Inc All rights reserved.
