1O le toe upu lenei, le au uso e, ia outou tatalo mo i matou, ia tele vave ma ia mamalu le afioga a le Alii, e faapei ona fai ia te outou;
2ia laveaiina foi i matou ai tagata amio leaga ma e agasala; auā e le o i tagata uma le faatuatua.
3A o loo faamaoni le Alii, na te faatumauina outou ma leoleoina ina ne‘i leaga.
4Matou te faatuatua foi i le Alii ia te outou, o loo faia e outou o mea na matou fai atu ai ia te outou, i le tou te faia pea lava;
5ia ta‘ita‘i tonu foi e le Alii o outou loto i le alofa o le Atua ma le onosai o Keriso.
6Matou te fai atu ia te outou, le au uso e, i le suafa o lo tatou Alii o Iesu Keriso, tou te vavae ese i uso uma o e amio faapiopio, ma le le tusa ma le uputuu na latou maua ia te i matou.
7Auā ua outou iloa lava, e tatau ona outou faa‘oa‘o mai ia te i matou; auā sa matou le amio faapiopio ina o ia te outou.
8Matou te lei aai fua foi se mea e ‘ai a se tasi, a ua matou galulue i le galuega mamafa ma le tiga i le po ma le ao, ina ne‘i mafatia so outou.
9E le ina ua leai sa matou pule, a e peitai ia avea i matou ma faaa‘oa‘o ia te outou, ina ia outou faaa‘oa‘o mai ia te i matou.
10Auā sa tatou i ai ma outou, ua matou fai atu lenei mea ia te outou, pe afai e le fia galue se tasi, aua ne‘i ‘ai foi o ia.
11Auā ua matou faalogo o ia te outou nisi ua amio faapiopio, e le o galulue lava, a e matamata fua i galuega a nisi.
12Matou te fai atu i e o faapea, ma aioi atu i ai, ona o lo tatou Alii o Iesu Keriso, ia latou galulue ma le nofo fifilemu, ma ia latou aai i a latou lava mea e ‘ai.
13A o outou le au uso e, aua ne‘i outou faavaivai i le amio lelei.
14Pe afai e le gauai se tasi i la matou upu i lenei tusi, ia faailogaina lea tagata; aua foi tou te feoai ma ia, ina ia masiasi ai o ia.
15Aua foi tou te manatu o ia o le fili, a ia outou apoapoai atu ia te ia pei o le uso.
16O lenei, o le Alii lava e ona le manuia, ia foaiina atu e ia le manuia ia te outou e le aunoa i mea uma lava. Ia ia te outou uma lava le Alii.
17O le alofa o a‘u o Paulo ua tusia i lo‘u lava lima, o le faailoga lea i a‘u tusi uma lava; ou te tusi faapea lava.
18Ia ia te outou uma lava le alofa tunoa o lo tatou Alii o Iesu Keriso. Amene.
Who We AreWhat We EelieveWhat We Do
2025 by iamachristian.org,Inc All rights reserved.
