1Sa levaleva ona tau o le taua a le aiga o Saulo ma le aiga o Tavita; ua tupu pea le malosi o Tavita, a o le aiga o Saulo ua tauāu ina vaivai.
2Na fanau atalii o Tavita i Heperona; o lana ulumatua o Amanono, le tama a Ainoama le Isereelu;
3o lona toalua o Kiliava, le tama a Apikaila le avā a Napalu le Karamelu; o lona toatolu o Apisaloma, le tama a Maaka le afafine o Talemai le tupu o Kasuri;
4o lona toafa o Atonia, le tama a Akita; o lona toalima o Sefatia, le tama a Apitala;
5o lona toaono o Itereamu, le tama a Ekeli le avā a Tavita; o i latou nei na fanau ia Tavita i Heperona.
6O ona po na va tau ai le aiga o Saulo ma le aiga o Tavita, na faamalosi ai Apineru i le aiga o Saulo.
7Sa ia Saulo le palake, o Risepa lona igoa, le afafine o Aia; ua fai mai Isoposeta ia Apineru, O le a le mea na e alu ane ai i le palake a lo‘u tamā?
8Ona ita tele lea o Apineru i upu a Isoposeta; ua fai atu ai, Ou te se ulu o se ulī ea, ou te tetee atu i nei ona po ia Iuta, a ua ou alofa i le aiga o Saulo lou tamā, ma ona uso, ma ana uo, ua ou le tuuina atu ai oe i le lima o Tavita, ina ua e fai mai ia te au i le aso nei ua ou pagota i lena fafine?
9Ia faapea ona fai e le Atua ia Apineru, ma ia faaopoopo i ai, pe afai ou te le faia ia Tavita e tusa ma le mea na tauto ai Ieova;
10e ave ese le malo i le aiga o Saulo, a e faatuina le nofoālii o Tavita e pule i Isaraelu ma Iuta, e pau mai i Tanu e pau mai i Peresepa.
11Ua ia le mafai ona toe tali atu se upu ia Apineru, ona o lona fefe ia te ia.
12Ona tuu mai lea e Apineru le lalo ia Tavita ona o ia, ua faapea, O ai ea e ona le nuu? Ua faapea foi o ia, Ina ta osia ia se feagaiga ma a‘u; faauta foi, ta te ‘au ma oe e fuli ai Isaraelu uma ia te oe.
13Ona tali atu ai lea o ia, E lelei; ta te osia se feagaiga ma a‘u; a o le mea e tasi ou te fai atu ai ia te oe, o lenei, A e sau ta te feiloai, afai e te le muai aumaia Mekala le afafine o Saulo, ta te le feiloai lava ma a‘u.
14Ua auina atu foi e Tavita le savali ia Isoposeta le atalii o Saulo, ua faapea atu, Tuu mai ia o la‘u avā o Mekala, na ou fai avā ai i muāpa‘u o Filisitia e selau.
15Ona auina atu lea nisi e Isoposeta, na ia fao mai ia te ia ai lana tane o Paletieli le atalii o Laisa.
16Ua ō lana tane ma ia, o mulimuli ia te ia ma tagi fano, ua oo i Pauri; ona fai atu lea o Apineru ia te ia, Alu ia, ina foi; ona foi ai lea o ia.
17Ua oo le upu a Apineru i toeaina o Isaraelu, ua faapea, Sa outou naunau ia Tavita anamua e fai ma tupu ia te outou;
18o lenei, ia outou faia lava; auā na fetalai Ieova ia Tavita, ua faapea mai, O le lima o Tavita la‘u auauna ou te faaolaina ai lo‘u nuu o Isaraelu ai lima o Filisitia, ma lima o e ita ia te i latou uma lava.
19Ua tautala foi Apineru i taliga o sa Peniaminā; ua alu atu foi Apineru e tautala atu i taliga o Tavita i Heperona i mea uma e loto i ai Isaraelu, atoa ma le aiga uma o Peniamina.
20Ua oo atu Apineru ia Tavita i Heperona, atoa ma tagata e toaluafulu faatasi ma ia; ona fai ai lea e Tavita o le taumafataga mā Apineru ma lana au malaga.
21Ua fai mai Apineru ia Tavita, O le a a‘u tulai, ou te alu, ona ou faapotopotoina mai lea o Isaraelu uma, i lo‘u alii le tupu latou te osia se feagaiga ma oe, e te pule aoao foi, e tusa ma lou finagalo. Ona tuu atu lea o Tavita ia Apineru e alu; i le, ua alu o ia ma le filemu.
22Faauta foi, o auauna a Tavita ma Ioapo, ua o mai i latou nai le tuliloaga o le ‘au, ua au mai foi e i latou le vete tele; a o Apineru ua le i ai o ia ma Tavita i Heperona, auā na ia tuu atu ia te ia e alu, i le ua alu o ia ua saogalemu.
23Ua oo mai Ioapo ma ‘au uma sa ia te ia, ona latou ta‘u atu lea ia Ioapo, ua faapea atu, Na sau Apineru le atalii o Neru i le tupu, ua ia toe tuuina atu ia te ia e alu, i le, ua alu lava o ia ua saogalemu.
24Ona alu atu lea o Ioapo i le tupu, ua faapea atu, O le a ea le mea ua e faia? Faauta, na sau Apineru ia te oe, o le a le mea ua e tuuina atu ai ia te ia e alu, i le ua alu lava ia?
25Ua e silafia lava ia Apineru le atalii o Neru, na sau o ia e ‘ole‘ole ia te oe, ina ia vaavaai foi o ia i lau amio, ma ia iloa ai mea uma e te faia.
26Ua alu atu Ioapo na ia Tavita, ona auina atu lea e ia nisi ia Apineru, ua faafoi mai ia te ia nai le vaieli o Sera, a e lei iloa e Tavita.
27Ua foi mai Apineru i Heperona, ona faaafe ane lea e Ioapo ia te ia i totonu o le faitotoa, e tautala lemu ma ia; ona tutu‘i ai lea ia te ia i lona manava, ua oti ai o ia, ona o le toto o Asaelu lona uso.
28Mulimuli ane ua faalogo ai Tavita, ona fai ane ai lea o ia, Ou te mamā a‘u ma lo‘u malo i luma o Ieova e faavavau i le toto o Apineru le atalii o Neru;
29ia tumau pea ia i luga o le ulu o Ioapo, atoa ma le aiga uma o lona tamā, aua le te‘a le aiga o Ioapo ma sē gau, ma sē lepela, ma sē toonai i le tootoo, ma sē oti i le pelu, ma sē otilaina.
30O Ioapo ma Apisai lona uso, ua la fasioti lava ia Apineru, ina ua na fasioti ia Asaelu lo la uso i Kipeona i le taua.
31Ua fai atu foi Tavita ia Ioapo ma le nuu uma sa ia te ia, Ia saei o outou ofu, ma ia lavalava outou i ie talatala, ma ia tagitu‘i i luma o Apineru; ua mulimuli atu foi Tavita le tupu i le fata.
32Ua latou tanu ia Apineru i Heperona; ua tagi le tupu ua leo tele i le tuugamau o Apineru, ua fetagisi foi le nuu uma.
33Ua lagi foi e le tupu le fatu ia Apineru, ua faapea, Ua oti ea Apineru pei ona oti o se vale?
34Na le fusifusia ou lima, e lei tuuina ou vae i fusi ‘apa memea; e pei ona oti le tagata i e faaletaupulea, ua oti ai oe. Ona toe fetagisi lea o le nuu uma ia te ia.
35Ona o atu lea o le nuu uma ia Tavita, ia ‘ai o ia i ni mea e ‘ai, a o malamalama lava; ona tauto lea o Tavita, ua faapea, Ia faapea ona fai e Ieova ia te au, ma ia faaopoopo i ai, pe afai ou te ‘ai sina areto, po o se tasi lava mea seia alu ifo le la.
36Ua iloa e le nuu uma, ona lelei ai lea ia te i latou, e pei o mea uma na faia e le tupu sa lelei i le nuu uma.
37Ua iloa e le nuu uma, atoa ma Isaraelu uma lava i lea aso, e le mai le tupu le fasiga o Apineru le atalii o Neru.
38Ua fai atu le tupu i ana auauna, Tou te le iloa ea, ua maliu le alii tele lava i lenei aso i Isaraelu?
39E ui lava ina faauuina o a‘u e fai ma tupu, ou te vaivai i le aso nei; o nei tagata foi, o tama a Seruia, e sili ona faigata ia te au; e taui atu e Ieova i lē fai lea mea leaga, e tusa ma lana amio leaga.
Who We AreWhat We EelieveWhat We Do
2025 by iamachristian.org,Inc All rights reserved.
