ISAIA, 28 - Samoan Old Version Bible

O LE MATAUPU XXVIIIUa aoaiina tagata o Isaraelu; o valoaga i le Mesia, ma le malaia o e le talia o ia.

1Oi talofa i le palealii e faamaualuga, o e onā o Efaraima, atoa ma le fuga ua mamae o lo latou matagofie e faamananaia a‘i i latou, o le ua i le ulu o le vanu lafulemu, o i latou o e ua faiaina i le uaina.

2Faauta, o loo i le Alii le ua malosi ma le loto tele, e pei o le afā o le ua to‘a, o le afā fulifaō, e pei o le tafe o vai tetele ua oso, na te lafotuina ma le malosi i le eleele.

3E solia i vae le palealii e faamaualuga o e onā o Efaraima;

4o le fuga foi e mamae o lo latou mataofie e faamauanaia a‘i i latou, o le ua i le ulu o le vanu lafulemu, e avea ia e pei o mati ua muai otatā a o lei oo i le tausaga vevela; ua iloa ai e le ua vaai atu i ai, a maua i lona lima, ona folo loa lea.

5O lea aso e avea ai Ieova o ‘au ma palealii e matagofie, ma pale lalelei i e ua totoe o lona nuu;

6e avea foi ma atamai e faamasino ai i lē nofo e fai le faamasinoga, e avea foi ma malosi, i e o faafoisia le taua i le faitotoa.

7A e peitai o i latou, ua sese i latou i le uaina; ua feseseai i le ‘ava; ua sese le faitaulaga ma le perofeta i le ‘ava; ua faiaina i latou i le uaina, ua feseseai i latou i le ‘ava; ua sese lo latou vaai, ua latou tautevateva i le faamasinoga.

8Auā ua tutumu laoai uma i puaiga ma otaota, e leai lava se mea ua sao.

9Na te a‘oa‘o atu ea ia te ai i le poto? na te faailoa ea ia te ai le tala? O e ua te‘a ma le suāsusu, ua faateaina lava ma le susu.

10Auā o loo i ai le upu ma le upu, o le upu ma le upu; o le vavao ma le vavao, o le vavao ma le vavao; o sina mea itiiti iinei ma sina mea itiiti iina.

11Auā e tautala atu o ia i lenei nuu i upu e le matala, ma le gagana ese.

12Na ia fai atu foi ia te i latou, O le malologa lenei; ia outou avatua le malologa i e ua lailoa; o le malologa foi lenei; a ua latou le mafafai ona faalogo mai.

13E i ai foi le afioga a Ieova ia te i latou, o le upu ma le upu, o le upu ma le upu; o le vavao ma le vavao, o le vavao ma le vavao; o sina mea itiiti iinei ma sina mea itiiti iina; ina ia latou savavali ma pauu taliaga, ma ia momomo, ia maileia foi, ma ia maua i latou.

14O le mea lea ia outou faalogologo mai ai i le afioga a Ieova, outou tagata faatauemu, o e pule i lenei nuu o loo i Ierusalema;

15auā ua outou faapea mai, Ua osia la matou feagaiga ma le oti; ua fai foi la matou feagaiga ma seoli; a ui ane le sasa e lofia ai, e le oo mai lea ia te i matou; auā ua matou faia le pepelo mo matou malu; ua matou lalafi foi i tala oole.

16O lenei, o loo faapea ona fetalai mai o le Alii o Ieova, Faauta, ou te tuuina i Siona le maa e fai ma faavae; o le maa ua uma ona faata‘ita‘iina, o le maa tulimanu tāua, o le faavae ua mau; o lē faatuatua ia te ia e le popole lava ia.

17Ou te faia le faamasinoga ia faatatauina i le fua faataoto, ou te faia foi le amiotonu ia faatatauina i le fua faatautau; e tafea le malu o le tala pepelo i le uato‘a, e lofia foi le lafitaga i le vai.

18E faafuvaleina la outou feagaiga ma le oti, e le tumau foi la outou feagaiga ma seoli; a ui ane le sasa e lofia ai, ona solia ai lea outou e ia.

19A ui ane ia, ona avea ai lea outou; auā e ui ane ia i lea taeao ma lea taeao, i le ao atoa ma le po; a lagona na o le tala e matuā atuatuvale ai.

20Auā e puupuu le moega a le mafai e se tasi ona faaloloa ai o ia; e lauitiiti le ie afu e le mafai ona pulupulu ai o ia.

21Auā e tulai atu Ieova e pei ona faia i le mauga o Faresa, e toasa foi o ia e pei ona fai i le vanu o Kipeona, ina ia faia lana mea e fai, ua ese lava; ina ia faia foi lana galuega, o lana galuega ese lava.

22O lenei, aua tou te faatauemu, ina ne‘i atili ai ona faamauina o outou noanoaga; auā o le faaumatia ua pulea, ua ou faalogo ai mai le Alii o Ieova o ‘au, e oo i le lalolagi uma lava.

23Ina uai mai ia o outou taliga, ma faalogo mai i lo‘u leo; ina faasaga mai ia outou, ma faalogo mai i la‘u upu.

24Ua galue ea i le suotosina i aso uma lava le ua galue i le suotosina ina ia lulu ai saito? Ua suatia ea e ia ma faamaluluina lona fanua?

25A uma ona faalauleleia e ia le eleele, e le saaluuina ea e ia le kiseka, ma lulusoloina le kumina, ma totōina le saito faaatusolo, ma le karite i le mea e totō ai, ma le kaseme i lona tuaoi?

26Auā ua a‘oa‘o lona Atua ia te ia i le tonu, ua ia a‘oa‘o lava ia te ia.

27Auā e le solia le kiseka i le mea e soli ai saito, e le faataamilo foi i luga o le kumina le mea e taavalevale a‘i le fata faataavalevale; a ua sasaina le kiseka i le sasa, ua sasaina foi le kumina i le tootoo.

28E nutililii le saito; a e le solia pea lava e ia, pe toso ane i ai le mea e taavalevale a‘i le fata faataavalevale; e le nutililiia foi e ana solofanua.

29E ala mai lava lea mea mai ia Ieova o ‘au; e maeu lona faautauta, e sili lava lona poto.