1Amuia e ua sao l o latou ala, o e savavali i le tulafono a Ieova.
2Amuia i latou o e tausi i ana tulafono, o e sailiili ia te ia ma le loto atoa;
3e le faia foi e i latou se mea leaga; e savavali i latou i ona ala.
4O oe lava na e poloai mai ia matuā tausiusi i au feau.
5E! Fia faatatauina o‘u ala, ina ia ou tausi i au tulafono.
6Ona ou le mā lava lea, pe a a‘u manatu i au poloaiga uma.
7Ou te vivii atu ia te oe ma le loto faamaoni, pe a a‘a‘oina a‘u i au faamasinoga tonu.
8Ou te tausi i au tulafono; aua lava e te matuā lafoai mai ia te au.
PETA.9E faapefea ea ona faamamāina e le taulealea o lona ala? Ona ua tausi i ai e tusa ma lau afioga.
10Ua ou saili ia te oe ma lo‘u loto atoa; aua ne‘i ou sese i au poloaiga.
11Ua ou teu i lo‘u loto lau afioga, ina ne‘i ou agasala ia te oe.
12Ia faafetaia oe, Ieova e; ia e a‘oa‘o mai ia te au i au tulafono.
13Ua ou ta‘u atu i o‘u laugutu o faamasinoga uma o lou fofoga.
14Ua ou fiafia lava i le ala o au tulafono, e sili i le oloa uma lava.
15Ou te mafaufau lava i au feau, ma ou manatua lava ou ala.
16Ou te fiafia lava a‘u i au tulafono; e le galo ia te au o lau afioga.
GIMELA.17Ia e agalelei mai i lau auauna, ia ola ai a‘u ma tausi i lau afioga.
18Ia e faapupula mai o‘u mata, ia ou vaai lava i mea e ofo ai i lau tulafono.
19O le tagata ese a‘u nei i le lalolagi; aua le nanā ia te au o au poloaiga.
20Ua nutimomoia lo‘u loto i le manao tele i au faamasinoga i aso uma.
21Ua e aoai atu i e faamaualuga, o e ua faafanoina, o e sese i au poloaiga.
22Ia e ave ese ia te au le luma ma le inosia; auā ua ou anaana i au tulafono.
23Sa nonofo lava alii ma fai upu ia te au; a ua mafaufau lau auauna i au tulafono.
24O au tulafono o lo‘u lava fiafia ia, o a‘u faipule lava ia.
TALETA.25Ua pipii atu lo‘u ola i le efuefu; ia e faaolaola mai ia te au e tusa ma lau afioga.
26Ua ou ta‘u atu o‘u ala; na e tali mai foi ia te au; ia e a‘oa‘o mai ia te au i au tulafono.
27Ia e faailoa mai ia te au le ala o au feau; ona ou mafaufau lea i ou vavega.
28Ua sisina ifo o‘u loimata ona o le faanoanoa; ia e faamalosia a‘u e tusa ma lau afioga.
29Ia e faatea ese ia te au le ala o le pepelo; ma ia e foai mai lau tulafono ia te au i le alofa.
30Ua ou filifili i le ala o le faamaoni; ua ou tuuina au faamasinoga i o‘u luma.
31Ua ou pipii atu i au tulafono; Ieova e, aua e te faamaina a‘u.
32Ou te momo‘e i le ala o au poloaiga, pe a e foaiina mai ia te au le loto matala.
HE.33Ieova e, ia e a‘oa‘o mai ia te au i le ala o au tulafono, ona ou anaana lava lea i ai seia oo i le gataaga.
34Ia e a‘oa‘o mai ia te au, ona ou anaana lea i lau tulafono, ma ou tausia ma lo‘u loto atoa.
35Ia e ta‘ita‘iina atu a‘u i le ala o au poloaiga; auā ou te fiafia lava i ai.
36Ia e faauai atu lo‘u loto i au tulafono, a e aua ne‘i i le matapeapea.
37Ia e liliueseina o‘u mata ne‘i ou vaai i mea le aoga; ia e faaolaolaina a‘u i lou ala.
38Ia e faatumauina lau afioga i lau auauna, o le ua mata‘u ia te oe.
39Ia e liliueseina lo‘u luma ou te fefe ai; auā e lelei au faamasinoga.
40Faauta, ua ou naunau lava i au feau; ia e faaolaola mai ia te au i lau amiotonu.
VAU.41Ia oo mai foi ia te au lou alofa, Ieova e, o lau olataga, e tusa ma lau afioga.
42Ona ou tali atu lea se upu i lē faalumaina a‘u; auā ou te faatuatua i lau afioga.
43Aua foi e te matuā aveesea le upu moni i lo‘u gutu; auā ua ou faamoemoe i au faamasinoga.
44Ona ou tausi lea e le aunoa lau tulafono e faavavau faavavau lava.
45Ou te savali foi i le mea lautele; auā ua ou saili i au feau.
46Ou te tautala foi i au tulafono i luma o tupu; ou te le mā ai lava.
47Ou te fiafia lava a‘u i au poloaiga, ua ou naunau i ai.
48Ou te sii foi i luga o‘u lima i au poloaiga ua ou naunau i ai; ou te mafaufau lava i au tulafono.
SAINA.49Ia e manatua lau afioga i lau auauna, auā ua e faatupuina lo‘u faamoemoe.
50O le faamatalaloto lea ia te au i lo‘u puapuaga; auā o lau afioga ua faaolaolaina ai a‘u.
51Ua matuā tauemu mai ia te au o e faamaualuga; ou te lei liliu ese i lau tulafono.
52Ieova e, ua ou manatu i au faamasinoga talu anamua, ona faamafanafanaina ai lea o a‘u.
53Ua maua a‘u e le tiga tele ona o e amio leaga, e ua lafoaiina lau tulafono.
54O au tulafono ua fai ia ma‘u pese i le fale ou te āumau ai.
55Ieova e, ua ou manatu i lou suafa i le po, ma ou tausi i lau tulafono.
56Ua ia te au lena mea, auā ua ou anaana i au feau.
HETA.57Ieova e, o lo‘u tofi lava oe, ua ou fai atu, Ou te tausi i au afioga.
58Ua ou faatoga atu i ou luma ma lo‘u loto atoa; ia e alofa mai ia te au e tusa ma lau afioga.
59Na ou manatunatu i o‘u ala, ona liliu atu lava lea o‘u vae i au tulafono.
60Ua ou faatelevave, ou te lei faatelegese ona tausi i au poloaiga.
61Ua siomia a‘u i mailei a e amio leaga; ua le galo ia te au o lau tolafono.
62Ou te ala i le tulua o po e vivii atu ai ia te oe, ona o au faamasinoga tonu.
63Ua matou uo ma i latou uma o e matatau ia te oe, ma e ua tausi i au feau.
64Ieova e, ua tumu le lalolagi i lou alofa; ia e a‘oa‘o mai ia te au i au tulafono.
TETA.65Ieova e, ua e agalelei mai i lau auauna, e tusa ma lau afioga.
66Ia e a‘oa‘o mai ia te au i le faautauta lelei ma le poto; auā ua ou faamaoni i au poloaiga.
67A o lei puapuagatia a‘u na ou sese; a o lenei, ua ou tausi i lau afioga.
68E lelei oe, ua e agalelei foi; ia e a‘oa‘o mai ia te au i au tulafono.
69Ua fatu fua e e ua faamaualuga le tala pepelo ia te au; o a‘u, ou te anaana i au feau ma lo‘u loto atoa.
70Ua lololo o latou loto e pei o le ga‘o; o a‘u, ou te olioli lava i lau tulafono.
71O le mea e lelei ai a‘u ina ua puapuagatia a‘u, ina ia a‘oa‘oina ai a‘u i au tulafono.
72E sili ona lelei ia te au o le tulafono a lou fofoga i afe o auro ma ario.
IOTA.73Na faia a‘u e ou aao, ua saunia ai foi a‘u; ia e faalotomatala mai ia te au, ina ia a‘oa‘oina lava a‘u i au poloaiga.
74O e matatau ia te oe latou te iloa mai a‘u, ona fiafia lea o i latou; auā ua ou faamoemoe i lau afioga.
75Ieova e, ua ou iloa e tonu lava au faamasinoga, na e faapuapuagatia foi a‘u i le faamaoni.
76Ia fai lou alofa ma faamatalaloto ia te au, e tusa ma lau afioga i lau auauna.
77Ia oo mai ia te au ou alofa mutimuti vale, ia ou ola ai; auā o lau tulafono, o lo‘u fiafia lea.
78Ia masiasi o e faamaualuga, auā ua latou faapiopio fua mai ia te au; o a‘u, ou te mafaufau i au feau.
79Ia faasaga mai ia te au o e matatau ia te oe, atoa ma e ua iloa au tulafono.
80Ia sao lava lo‘u loto i au tulafono, ina ia ou le mā lava.
KAFA.81Ua lailoa lava a‘u i le manao i le olataga mai ia te oe; ou te faamoemoe foi i lau afioga.
82O le a avea o‘u mata i le vaai atu i lau afioga, o loo ou faapea atu, E te faamafanafana ai ea afea ia te au?
83E ui ina avea a‘u pei o se fagupa‘u i le asu, ua le galo ia te au au tulafono.
84E fia ea aso o lau auauna? E te faia ea afea le faamasinoga i e saua mai ia te au?
85O e faamaualuga, ua latou elia lua mo a‘u, ua le tusa lea ma lau tulafono.
86O au poloaiga uma e faamaoni lava ia; e saua fua mai i latou ia te au; ia e fesoasoani mai ia te au.
87Ua toe ina latou faaumatia a‘u i le nuu; a o a‘u, ou te le lafoaiina au feau.
88Ia e faaolaola mai ia te au e tusa ma lou alofa, ona ou tausi lava lea i le tulafono a lou fofoga.
LAMETA.89Ieova e, ua mausali lau afioga i le lagi e faavavau lava.
90E au tupulaga lou faamaoni; na e faatumauina le lalolagi, ona tumau lea.
91O lau pule o loo tumau ai ia mea i le aso nei; auā o au auauna ia mea uma lava.
92Ana le avea lau tulafono mo‘u fiafia, po ua ou fano i lo‘u puapuaga.
93E le galo ia te au au feau e faavavau; auā o mea ia na e faaolaola mai ai ia te au.
94O ia te oe a‘u nei, ia e faaola mai ia te au; auā ua ou saili i au feau.
95Ua lamalama o e amio leaga latou te fasioti ia te au; ua ou mafaufau i au tulafono.
96Ua ou vaaia le iuga o mea uma ua atoatoa ona lelei; o lau poloaiga e matuā lautele lea.
MEMA.97Ua tele lava lo‘u naunau i lau tulafono; ou te mafaufau i ai i le aso atoa.
98O au poloaiga e sili ai ona poto o a‘u i e ita mai ia te au; auā e ia te au lava ia e faavavau.
99Ua sili ona atamai o a‘u i e a‘oa‘o mai ia te au uma lava; auā o au tulafono ou te mafaufau i ai.
100O lo‘u lotomatala ua sili i e toeaina, auā ua ou anaana i au feau.
101Ua ‘alo ese o‘u vae i ala leaga uma lava, ina ia ou tausi i lau afioga.
102Ou te lei alu ese i au faamasinoga, auā ua e a‘oa‘o mai oe ia te au.
103Ua matuā suamalie au afioga i lo‘u gutu; ua sili i lo le meli i lo‘u gutu.
104O au feau ou te maua ai le lotomatala; o le mea lea ou te ‘ino‘ino ai i ala pepelo uma lava.
NUNA.105O lau afioga o le sulu lea i o‘u vae, ma le malamalama i lo‘u ala.
106Na ou tauto, ou te faamaoni foi, ou te tausi i au faamasinoga tonu.
107Ua matuā puapuagaina a‘u; Ieova e, ia e faaolaola mai ia te au e tusa ma lau afioga.
108Ieova e, ia e talia mai lava o taulaga e faia ma le loto na fai atu ai lo‘u gutu; ma a‘oa‘o mai ia te au i au faamasinoga.
109O i lo‘u lima lo‘u nei ola e le aunoa; a e le galo ia te au lau tulafono.
110O e amio leaga ua latou faia le mailei mo a‘u; a e lei sese a‘u i au feau.
111Ua fai mo‘u tofi o au tulafono e faavavau; auā o mea ia e faafiafia a‘i lo‘u loto.
112Ua uai atu lo‘u loto e fai au tulafono e faavavau faavavau lava.
SAMEKA.113Ou te ‘ino‘ino i e loto fetoa‘i, a ou te naunau i lau tulafono.
114O lo‘u lafitaga oe ma lo‘u talita; ou te faamoemoe i lau afioga.
115O ese ia ia te au, outou o e amio leaga; auā ou te anaana lava i poloaiga a lo‘u Atua.
116Ia e lagolagoina mai a‘u e tusa ma lau afioga, ina ia ou ola; aua foi ne‘i ou mā i lo‘u faamoemoega.
117Ia e lagolagoina o a‘u, ona faaolaina lea o a‘u; ona ou faasaga lea e le aunoa i au tulafono.
118Ua e faaleaogaina i latou uma o e sese i au tulafono; auā o le pepelo lo latou faa‘ole‘ole.
119Ua e aveeseina o e amio leaga uma o i le nuu pei o le otaota o ario; o le mea lea ou te naunau ai i au tulafono.
120Ua mogea lo‘u tino i le mata‘u ia te oe; ma ou fefe i au faamasinoga.
OINA.121Ua ou faia le faamasinoga ma le amiotonu; aua e te tuuina atu a‘u i e saua mai ia te au.
122Ia fai oe ma fesoasoani i lau auauna, ou te lelei ai; aua ne‘i saua mai ia te au o e faamaualuga.
123Ua avea o‘u mata i le manao i lau olataga, ma lau afioga tonu.
124Ia e faia i lau auauna e tusa ma lou alofa; ma a‘oa‘o mai ia te au i au tulafono.
125O lau auauna a‘u nei, ia e faalotomatala mai ia te au, ina ia ou iloa au tulafono.
126Ua oo mai ona po e galue ai Ieova; ua solia e i latou lau tulafono.
127O le mea lea ua sili ai lo‘u manao i au poloaiga i le auro, o le auro lelei lava.
128O le mea lea ou te manatu ai ua tonu au feau atoa uma lava; ou te ‘ino‘ino i ala pepelo uma lava.
PE.129O mea e ofo ai au tulafono, o le mea lea e anaana i ai lo‘u loto.
130O le faaalia mai o au afioga e faamalamalamaina ai; e faalotomatalaina ai e ua faigofie.
131Ua faamaga lo‘u gutu, ma ou ga‘ega‘e; auā ua ou naunau atu i au poloaiga.
132Ia e liuliualo mai ia te au, ma alofa fua mai ia te au, e pei ona e masani ai i e alolofa i lou suafa.
133Ia e faamautuina lo‘u savali i lau afioga; aua foi ne‘i manumalo mai se amio leaga e tasi ia te au.
134Laveai mai ia te au i le sauaga a tagata; ona ou tausi lea i au feau.
135Ia faamalamalama mai ou fofoga i lau auauna; ma a‘oa‘o mai ia te au i au tulafono.
136O loo tafe ifo o vaitafe i o‘u mata, auā e le tausi e i latou lau tulafono.
SATI.137E amiotonu lava oe, Ieova e, ua tonu foi au faamasinoga.
138Ua e poloai mai i au tulafono ua tonu, ma le faamaoni lava.
139Ua faaumatia a‘u i lo‘u maelega, ina ua galo i e saua mai ia te au au afioga.
140Ua se ario ua te‘a ma le otaota lau afioga; e naunau foi i ai lau auauna.
141E faatauvaa lava a‘u, ma inosia; a e le galo ia te au au feau.
142O lau amiotonu o le amiotonu e faavavau lea; o le mea moni foi lau tulafono.
143Ua maua a‘u e le puapuaga ma le tiga; o au poloaiga ou te fiafia i ai.
144O au tulafono o mea tonu ia e faavavau; ia e faalotomatala mai ia te au, ou te ola ai.
KOFA.145Ua ou valaau ia te oe ma le loto atoa; Ieova e, ia e tali mai ia te au; ou te anaana lava i au tulafono.
146Ua ou valaau ia te oe; ia e faaola mai ia te au, ona ou tausi lea i au tulafono.
147Ua muamua i le tafa o ata ona ou alaga atu; ua ou faamoemoe i lau afioga.
148Ua muamua ona pupula o‘u mata i leoleoga i itupo, ina ia ou mafaufau i lau afioga.
149Ia e faafofoga mai i lo‘u leo e tusa ma lou alofa; Ieova e, ia e faaolaola mai ia te au e tusa ma lau faamasinoga.
150O loo faalatalata mai e ua tausisi i amio leaga; e vava mamao i latou ma lau tulafono.
151Ua latalata mai oe Ieova e; o au poloaiga uma foi e moni lava ia.
152Talu anamuā ua ou iloa ai au tulafono, ua e faavaeina ia e faavavau.
RESA.153Silasila mai ia i lo‘u tiga, ma ia e laveai mai ia te au; auā e le galo ia te au lau tulafono.
154Ia e faia la‘u finauga, ma laveai mai ia te au; ia e faaolaola mai ia te au e tusa ma lau afioga.
155E vava mamao le faaolataga ma i latou o e amio leaga; auā e le saili i latou i au tulafono.
156Ieova e, ua tele lou alofa mutimuti vale; ia e faaolaola mai ia te au e tusa ma au faamasinoga.
157E toatele o e saua mai ma ita mai ia te au; ou te le liliu ese lava i au tulafono.
158Na ou iloa atu i e ua faa‘ole‘ole, ma ou ‘ino‘ino i ai, o i latou o e le tausi i lau afioga.
159Ia e silasila mai ua ou naunau i au feau; Ieova e, ia e faaolaola mai ia te au e tusa ma lou alofa.
160E moni lava lau afioga talu le amataga; e faavavau foi au faamasinoga tonu uma lava.
SINA.161Ua saua fua mai alii ia te au; a ua fefe lo‘u loto i au afioga.
162Ou te fiafia a‘u i lau afioga, faapei o le ua maua le vete tele.
163Ou te ‘ino‘ino i le tala pepelo, ou te matuā ‘ino‘ino i ai; a ou te naunau i lau tulafono.
164E ta‘i foi faafitu i aso ona ou vivii atu ia te oe, ona o au faamasinoga tonu.
165Ua tele le filemu o e naunau i lau tulafono; e leai foi se mea e tausuai ai i latou.
166Ieova e, ua ou faamoemoe i lau olataga, ma a‘u faia au poloaiga.
167Ua tausi au tulafono i lo‘u loto; ma ou matuā naunau i ai.
168Ua ou tausi i au feau, atoa ma au tulafono; auā o i ou luma o‘u ala uma lava.
TAU.169Ieova e, ia oo atu la‘u alaga i ou luma; ia e faalotomatala mai ia te au, e tusa ma lau afioga.
170Ia oo atu i ou luma la‘u aioi atu; ia e laveai mai ia te au, e tusa ma lau afioga.
171E ta‘u atu le viiga i o‘u laugutu, pe a e a‘oa‘o mai ia te au i au tulafono.
172E tautala lo‘u laulaufaiva i lau afioga, auā ua tonu au poloaiga uma lava.
173Ia fesoasoani mai lou aao ia te au; auā ua ou filifilia au feau.
174Ieova e, ou te naunau i lau faaolataga; o lau tulafono foi, o lo‘u lea fiafia.
175Ia ola lava a‘u, ina ia ou vivii atu ia te oe; ia fesoasoani mai foi au faamasinoga ia te au.
176Ua ou alu ese faapei o le mamoe ua sē; ia e saili mai i lau auauna; auā ua le galo ia te au au poloaiga.
Who We AreWhat We EelieveWhat We Do
2025 by iamachristian.org,Inc All rights reserved.
