1 O a‘u o Paulo, o le ua noanoatia ona o Keriso Iesu, o Timoteo foi lo tatou uso, o la ma tusi lenei ia Filemoni o le pele na tatou galulue faatasi;
2ma Afia le pele, ma Arekipa o le na tatou matātau faatasi, atoa ma le ekalesia i lou fale;
3ia ia te outou le alofa tunoa ma le manuia mai le Atua lo tatou Tamā, atoa ma le Alii o Iesu Keriso.
4Ou te faafetai atu i lo‘u Atua, o loo ou ta‘uta‘ua oe e le aunoa i a‘u tatalo,
5ina ua ou faalogo i lou alofa ma le faatuatua o ia te oe i le Alii o Iesu, atoa ma le au paia uma;
6ina ia galue lava lou mafuta faatasi i le faatuatua, ina ia matuā iloa mea lelei uma o ia te outou ia Keriso Iesu.
7Auā lo‘u uso e, ua tele lo matou fiafia ma le mafanafana ona o lou alofa, ina ua faamafanafanaina le au paia ona o oe.
8O lenei, e ui lava ina ua ia te au le pule lava mai ia Keriso e poloai atu ai ia te oe i mea e tatau,
9a e ou te aioi atu ona o le alofa, o a‘u nei lava o Paulo le toeaina, o le ua noanoatia nei foi ona o Iesu Keriso.
10Ou te aioi atu ia te oe mo lo‘u atalii o Onesemo, o le na fanaua e a‘u, a e noanoatia a‘u,
11sa le aoga o ia ia te oe, a o lenei e aoga tele ia te oe atoa ma a‘u,
12ou te faafoi atu ia te ia; ina e talia mai o ia, o lo‘u lava tino ia.
13Na ou loto ina ia taofi pea ia te ia ma te nonofo ma a‘u, ina ia fai mou sui, na te auauna mai ia te au i o‘u noanoataga ona o le tala lelei.
14A ou te le fia faia se mea e tasi pe a le to mai sau pule, ina ne‘i pei o se mea ua faatauanauina lou agalelei mai, a ia faia ma le loto.
15Auā atonu o le mea lea na te‘a ese ai o ia i sina itu aso, ina ia e toe maua o ia e faavavau;
16e le toe faapei o se pologa, a e sili i le pologa, o le uso pele ia ia te au lava; e le sili ea ona faapea ia te oe i la le tino atoa ma la le Alii?
17O lenei afai e te manatu i la ta uo, ia e talia mai o ia e pei o a‘u lava.
18A e afai na ia agaleaga ia te oe, po ua ia te ia sau mea, ia e tuu mai lea mea ia te au.
19O a‘u o Paulo, ua ou tusi atu i lo‘u lava lima, ou te taui atu lava; a e ou te le fai atu, e tatau ona e tuuina mai oe lava ia te au.
20E moni, lo‘u uso e, se‘i e faafiafia mai ia te au i le Alii, ina faamafanafana mai ia i lo‘u loto i le Alii.
21Ua ou tusi atu ia te oe, auā ou te faatuatua i lou gauai mai, ua ou iloa e te faia mea e sili lava i mea ou te fai atu ai.
22Tasi foi lea mea, ia e sauni se mea ou te nofo ai; auā ou te faamoemoe e tuuinaatua a‘u ia te outou, ona o a outou tatalo.
23O loo alofa atu ia te oe o Epafara, o loo noanoatia faatasi ma a‘u ona o Keriso Iesu.
24O loo alolofa foi Mareko, ma Aritako, ma Tema, ma Luka, e ua galulue faatasi ma a‘u.
25Ia i o outou agaga le alofa tunoa o lo tatou Alii o Iesu Keriso. Amene.
Who We AreWhat We EelieveWhat We Do
2025 by iamachristian.org,Inc All rights reserved.
