1Ua fetalai mai Ieova ia Mose, Ina ulufale atu ia oe ia Farao, ma fai atu ia te ia, O loo faapea ona fetalai mai o Ieova le Atua o sa Eperū, Ia e tuu mai lo‘u nuu e o, latou te auauna mai ia te au.
2Auā afai e te le mafai ona tuu mai i latou e o, a e taofi pea i latou, faauta,
3o le aao o Ieova e oo i au manu i le fanua, o solofanua, ma asini, ma kamela, ma povi, ma mamoe, o le faamai matuā mamafa lava.
4A e vavaeeseina e Ieova o manu a Isaraelu ma manu a Aikupito; e le mate lava se mea e tasi i mea uma a le fanauga a Isaraelu.
5Ona tuupo ai lea e Ieova, ua fetalai mai, A taeao e faia e Ieova lana i mea i le nuu.
6Ona faia lea e Ieova o lea mea i le aso taeao, ua mamate ai o manu uma lava a Aikupito, a e lei mate lava se manu e tasi a le fanauga a Isaraelu.
7Ona auina atu lea e Farao, faauta, e lei mate se manu a Isaraelu, ua leai lava se tasi; a ua maaa pea lava le loto o Farao, e lei tuuina mai e ia o le nuu e o.
8Ona fetalai mai lea o Ieova ia Mose ma Arona, Ia faatutumu oulua lima uma i lefulefu mai le umu, ma ia saaluu solo ai i luga e Mose i luma o Farao.
9Ona liu efuefu ninii ai lea i le nuu uma lava o Aikupito, e avea foi i luga o tagata atoa ma manu ma ma‘i fulafula e tupu ai le manunu i le nuu uma lava o Aikupito.
10Ona la ave lea o lefulefu nai le umu, ua la tutū atu i luma o Farao, ona saaluu solo ai lea i luga e Mose, ona avea lea ma ma‘i fulafula e tupu ai le manunu i tagata atoa ma manu.
11Ua le lavā taulāitu ona tutū i luma o Mose, ona o le ma‘i fulafula; auā sa i ai le ma‘i fulafula i taulāitu atoa ma Aikupito uma lava.
12A ua faamaaa e Ieova le loto o Farao, e lei faalogo foi o ia ia te i laua, e pei o le afioga a Ieova ia Mose.
13Ona fetalai mai lea o Ieova ia Mose, Ia e ala usu i le taeao lava, ma ia e tu i luma o Farao, ma fai atu ia te ia, O loo faapea ona fetalai mai o Ieova le Atua o sa Eperū, Ia e tuu mai lo‘u nuu e o, ina ia latou auauna mai ia te au;
14auā o ona po nei lava ou te tuuina atu ai a‘u mala uma lava i luga ia te oe, ma au auauna, ma lou nuu, ina ia e iloa ai e leai lava se tasi e tusa ma a‘u i le lalolagi uma lava.
15Auā o le a a‘u faaloaloa nei lo‘u lima, ou te taia oe ma lou nuu i le faama‘i, ina ia fano ai oe i le nuu.
16E moni lava, o le mea lava lea ua ou faatuina ai oe, ina ia ou faaali ai lo‘u mana ia te oe, ma ia ta‘ua lo‘u igoa i le lalolagi uma lava.
17E te faamaualuga pea ea oe i lo‘u nuu, ina ua e le tuuina mai i latou e o?
18Faauta, o le aso taeao e faapenei le itu la, ou te faatotō ifo ai le uato‘a tetele lava, e leai sona tusa i Aikupito talu ona faatoa āina, ua oo mai lava i nei ona po.
19O lenei, ia e aami atu ia tuui se mea e malu ai au manu, ma au mea uma lava o loo i le vao; o tagata uma lava atoa ma manu e maua i le vao e le faapotopotoina i fale, e alu ifo i luga ia i latou le uato‘a, latou te fano ai.
20O se na fefe i le afioga a Ieova i auauna a Farao, ua ia fai atu ia sosola ana auauna ma ana manu i fale;
21a o le na le manatu i le afioga a Ieova, ua ia tuu pea ana auauna ma ana manu i le vao.
22Ona fetalai mai lea o Ieova ia Mose, Ina faaloaloa ia o lou lima i luga, ona to ifo ai lea o le uato‘a i le nuu uma lava o Aikupito, i luga o tagata, ma manu, ma laau afu uma lava o le fanua i le nuu o Aikupito.
23Ona faaloaloa ae lea e Mose lona tootoo i luga, ona tuuina mai lea e Ieova o faititili ma le uato‘a, ua sosolo foi le afi i le eleele, ua faatotō ifo foi e Ieova le uato‘a i le nuu o Aikupito.
24Sa i ai le uato‘a ma le afi e fefiloi ma le uato‘a, ua mamafa tele lava, e leai lava sona tusa i le nuu uma lava o Aikupito talu ina āina.
25Ua toia le laueleele uma lava o Aikupito i le uato‘a, o mea uma lava sa i le vao, o tagata atoa ma manu, ma laau afu uma lava o le fanua ua uma ona toia i le uato‘a; ua gāugau ai foi o laau uma lava o le vao.
26Na o le nuu o Kosena sa i ai le fanauga a Isaraelu, ua le i ai lava se uato‘a.
27Ona feauina lea e Farao ua aami ia Mose ma Arona, ua fai mai ia te i laua, Ua ou agasala i lenei mea; o loo amiotonu Ieova, a e peitai a‘u nei ma lo‘u nuu, ua amio leaga i matou;
28ina faatoga atu ia oulua ia Ieova, ia soia le toe faititili tetele mai ma le uato‘a, ona ou tuuina atu ai lea o outou e o, tou te le toe nonofo lava.
29Ua fai atu Mose ia te ia, A a‘u alu i tua pa o le aai, ona ou faaloaloa atu lea o o‘u lima ia Ieova, ona mavae ai lea o le faititili, e leai foi se toe uato‘a; ina ia e silafia ai, o loo ia Ieova lava le lalolagi.
30A o oe ma au auauna ua ou iloa lava, tou te le matatau ai nei lava ia Ieova le Atua.
31Sa toia le lino atoa ma le karite; auā sa fua le karite, ma ua fuga le lino;
32a o le saito atoa ma le kaseme, e lei toia ia, auā ua le tutupu ae.
33Ona alu lea o Mose nai ia Farao i tua pa o le aai, ua faaloaloa atu ona lima i luma o Ieova, ona mavae ai lea o le faititili ma le uato‘a; ua le toe to mai foi le ua i luga o le laueleele.
34Ua iloa e Farao, ua mavae le ua, ma le uato‘a, ma le faititili, ona atili ai lea ona agasala o ia, ua faamaaa lona loto, o ia atoa ma ana auauna.
35Ona faamaaaina ai lea o le loto o Farao, e lei tuuina atu lava le fanauga a Isaraelu e o, faapei ona fetalai mai ai o Ieova ia Mose.
Who We AreWhat We EelieveWhat We Do
2025 by iamachristian.org,Inc All rights reserved.
